老細派糭好恐佈 食完隨時會報到

一年一度嘅端午節係所有同事嘅惡夢,因為我哋老細幾日前已經開始派糭,首先佢唔係派一隻半隻,而係每個人起碼有4至5隻,其次係啲糭唔係喺出面買,全部係老細嘅老婆親手包,睇到呢度,應該好多人覺得有免費糭食仲彈三彈四要落地獄係咪?

如果你真係咁諗,可能要睇埋落去先作定論,我第一次食老細嘅糭係五年前,嗰陣啱啱入嚟做,心諗:「嘩!呢間公司好撚warm呀!」真係《我們這一家》咁款,班同事見我係新仔,仲將佢哋手上面嘅糭畀撚埋我,嗰次我攞咗廿幾隻,兩個大袋拎到我手都跛。

我一路打呢篇稿嘅時候一路「訪問」個同事:「記唔記得當年我啱啱入嚟做,你班仆街塞撚晒啲糭畀我?」

同事:「記得,見到有條戇鳩仔咁開心,點會唔記得呀?」

我:「重點係你哋叫我拎返去嗰晚唔好食,呃鳩我話要過幾日食先至最新鮮,我都覺得奇撚怪,新鮮唔係要即刻食咩,過幾日點會新鮮呀?你條仆街仲同我講原來食糭要等佢發酵,我又心諗發乜撚嘢酵呀?」

同事笑到癲咗:「因為你第一晚試咗如果知道中伏,第二日就唔會再攞,嗰次你攞得兩袋咁少,公司仲有30幾隻,邊個處理呀?」

當晚我攞咗「第一批」糭返屋企,阿媽好開心,一來有免費糭,二來佢覺得我搵到份好工,老細同埋同事都好有人情味,結果阿媽老豆細妹同我四個人一齊食,有三個入咗醫院,我老豆係流浪狗,百毒不侵,嗰晚得佢一個冇入醫院,不過都喺屋企屙到仆街,阿妹嬲到叫我辭工,阿媽就話唔好搞大件事。

我:「嗰晚仁濟醫院仲要好爆,冇晒房,我張床喺走廊,曾經諗過係咪要同死神報到。」

同事:「即係好似大學嗰啲O Camp玩新人咁囉,呢間公司有邊個未經歷過吖,個個都死裏逃生,唔通你又係好人咩?老細今朝畀你嗰啲糭而家去晒邊呀?咪又係去晒3月返工嗰個新人度,我有冇講錯先?」

我:「咁真係好難做吖嘛,丟咗又浪費……」

同事:「屌!你上到庭咪試下咁樣同個官講囉!」

其實老細啲糭表面上係一隻普通嘅糭,拆開之後個樣都仲正常,我講唔出有咩唔妥,不過食完幾啖就會發覺唔對路,班同事已經詳細研究過,可能係豬肉太肥或者冬菇過期,總之啲味怪怪地,最陰濕係食咗幾啖先會慢慢發現,呢個時候已經太遲喇。

有人坦白同老細講過㗎喇,話自己食完之後個胃好唔舒服,不過老細話自己都有苦衷,原來啲糭係佢老婆包,家庭主婦平時冇嘢做,所以一到大時大節就會整蘿蔔糕呀、年糕呀、椰汁糕呀……而整糭嘅量就係最多同埋最災難性,老細話佢自己反映過畀老婆聽,點知畀老婆屌返轉頭,話佢唔識欣賞,又話佢覺得唔好食並唔等於其他人覺得唔好食喎!

咁點解老細又要拎幾廿個糭返嚟派呢?因為公司有啲擦鞋同事仲會夾硬話好食,老細係咁易都會同老婆講,佢老婆又當真,結果就年年端午節都整一大堆,叫佢車返嚟公司派畀人。

老細自言後悔,因為最初傳達有同事讚賞只係氹下老婆,冇諗過老婆聽完就上晒頭,所以老細講嘅對白係同我一樣:「唔通丟晒咩,好折墮㗎,我哋做生意嘅人最忌做啲折墮嘢,好邪,有朋友提議捐去啲機構,咁你捐糭呢個動作原意係想做善事啫,如果食到人又屙又嘔就變咗做壞事啦!」

雖然明白佢咁做嘅原因,但我聽完又覺得奇怪喇,唔想捐出去害人,咁你又派畀同事?同事唔係人呀?

老細話,佢冇規定同事一定要食,喺公司派就等於將個波交畀我哋,點樣處理佢唔想知,不過行為上佢就冇浪費,拎去丟就係我哋折墮,其他嘢一概唔知唔理……老細真係好仆街呀!

自從嗰次一家幾口入醫院之後,我就再冇食過老細啲糭喇,有一年讓咗畀個新同事,仲記得嗰個男仔未過試用期就辭職,唔肯定關唔關啲糭事。

今年我哋都讓咗啲糭畀一個3月先返工嘅新人,佢同我當年一樣,見成班同事咁踴躍,話有啲受寵若驚,早兩日開開心心拎住兩大袋糭返屋企,仲要call Uber呢下先悲壯,新人話老細啲糭咁珍貴,怕天氣太熱搭公共交通工具會變壞,所以就豪一次坐Uber……

嗱!我有作出提醒㗎,分享咗自己入院差啲報到嘅事,不過新人笑住話我太誇張,如果真係咁嚴重,成班同事就唔會生勾勾坐喺度,新人打算留返端午節正日先食,因為咁先夠應節喎,警告咗㗎喇,下星期再update啦!

error: