《你的樣子如何》上 派靚女同事去講數

中學畢業之後我冇再讀上去,玩咗陣就搵嘢做,當年喺葵涌一間電器品牌嘅客戶服務中心工作,識得同我一樣係19歲嘅Stephy,由於成個服務中心係仔多女少,仲有另一位女員工係30幾歲嘅女人,所以Stephy同我年紀相若最玩得埋。

嗰度啲同事好騎哩,有個脾氣好暴躁嘅男仔叫Kelvin,經常閙客;有個Dennis就會做做下嘢無端端扮老鼠,無厘頭兩隻手作狀挖泥然後發出「唧唧聲」,唔知佢做緊乜;另外有個叫Steve嘅男人就好鍾意蛇王匿喺倉,總之冇個正常,所以我同Stephy冇辦法唔friend,因為其他人根本做唔到朋友,連同佢哋食飯都唔想。

有一次性格火爆嘅Kelvin接咗個電話,係個客打嚟投訴產品用咗幾日就壞咗,Kelvin粗聲粗氣叫佢拎嚟維修中心,期間唔知點解愈講愈勞氣,雙方隔住個電話鬧交,驚動到坐入面房嘅服務中心主管都行咗出嚟聽,Kelvin臨收線前講咗句嘢:「咁你想點吖!隻揪囉!好呀!我喺度返工點解要走呀?唔嚟正契弟!聽朝10點準時等你!」

我同Stephy聽到呆晒,大佬呀,邊有人做客戶服務做到約個客隻揪㗎?係都約喺出面打啦,做咩約上嚟我哋個中心呀?

主管聽完之後捉咗Kelvin入房狂鬧,仲叫佢第二日如果個客真係上嚟,要自己搞返掂佢。

Kelvin之後好英雄主義咁同我哋成班同事講,絕對唔會向個客讓步,最多就打過喎!佢係咪睇得《古惑仔》電影系列太多呀?諗住第二日返工睇戲啦,以為有場「陳浩南vs烏鴉」㗎嘛,點知9點返到公司嘅時候,Kelvin竟然笠水……

主管:「Kelvin入咗倉,佢話唔想見到個客喎,你哋有冇邊個一陣可以接咗個客部機,順便為噚日嘅事講聲唔好意思呀?」

幾位男同事都耍手擰頭話唔想畀人打,其實個主管都係男人,仲係一個肥佬,好心就勇敢啲面對啦,個維修中心你in charge㗎!

主管將目光投向我身上,仲叫咗我入房:「Mandy,你入一入嚟。」

係呀,我叫Mandy,但你叫我入房做咩?想點呀?

入到房,主管又猶豫咗一陣,唔知係自言自語定對住我講:「Mandy,我想你……」佢好認真咁樣打量我,都話呢度啲人好奇怪㗎啦!

主管接住講:「冇事喇,你出返去,幫我叫Stephy入嚟吖。」

我唯有照做啦,Stephy入咗房大約10分鐘,嗰個找晦氣嘅客就上咗嚟,早咗喎!有冇咁嬲呀?

找晦氣嘅客人唔似有江湖味,不過就好大隻,一入到客戶服務中心已經咆哮:「邊個係Kelvin?出嚟!」當時現場仲有8至9個客排隊等緊放低產品維修,個個都嚇親,幾個男同事連答問題都唔敢,Kelvin就繼續龜縮,仲聽到「躂」一聲,條廢柴lock咗倉嗰度門(個倉就喺服務中心counter後面)。

正當大家唔知點處理嘅時候,Stephy喺主管房出返嚟,微笑向嗰位大隻佬打招呼,嗰陣已經見到大隻佬融化咗,唔止冇再大吵大鬧,仲由想殺人嘅樣變成另一副好溫和嘅表情,我估佢應該姓尹,唔係又點會鐵漢柔情尹揚明咁款呢?

Stephy直情步出counter拉咗個客去一邊傾,全程聽唔到講乜,只見大隻佬收晒火,仲頻頻展現微笑,目光離不開Stephy個樣,過咗冇幾耐,Stephy叫咗佢埋去counter,收返壞咗部機,畀過一部全新嘅對方,咁就解決咗件事。

尹揚明走咗之後,我問Stephy發生咩事,原來主管話佢夠晒靚,拍心口保證個客會冷靜落嚟,由於佢年資最淺,所以某程度上冇得Say No,結果頭先聽到有人大叫,主管就迫佢出嚟同個客「講數」。

咁都得?容許我講一句,呢個客戶服務中心裡面,在座每一位都係垃圾!

諗返主管叫我入房打量完又叫我出返去,嗰次係第一次親身感受到原來職場咁注重顏值,但我又冇唔開心,畢竟從未覺得自己係靚女,亦都冇靚過,加上呢個客一行入嚟個勢咁粗暴,唔使行出去近距離接觸梗係好啦!

因為已經係10年前嘅事,當時唔識得形容Stephy似邊個,只係覺得呢個女仔好甜好靚,不過隔咗咁多年之後我終於講得出Stephy似邊位明星喇,有90%以上似日本嘅石原聰美(石原里美),近幾年識得佢嘅人都係咁講,即係唔止我個人主觀覺得啦!

大隻佬件事未完㗎!尹揚明換完新機第二日無啦啦殺上嚟,不過唔係找晦氣,佢已經完全忘記咗Kelvin嗰條廢柴,尹揚明係上嚟搵Stephy,仲買咗一打西餅話請我哋食,最好笑係Kelvin都有份食……

尹揚明基本上每隔一個禮拜就會上嚟一次,次次都會買嘢畀Stephy,擺到明係溝女啦!不過Stephy冇受溝,只係禮貌地當一般客人咁招呼佢傾幾句。

其實我哋個客戶服務中心係喺葵涌啲工廠區,根本一啲都唔就腳,睇返尹揚明填嘅保養卡上面嘅地址又唔係呢頭,所以佢都幾神心㗎!

喺嗰度做咗一年多啲,我搵到份真正坐喺office嘅文職就轉工,不過同Stephy仲keep住friend,間唔中會約出嚟行街食飯,大家當時都仲係細路女嘛,得嗰20歲鬆啲,興趣又相近,同埋好多話題,淨係講客戶服務中心班騎哩怪都可以笑足成餐飯。

Stephy都係當CS呢份工係踏腳石,中學畢業求其搵啲嘢做住先嗰種,所以佢做到咁上下亦開始想轉,適逢我新公司要請人,個老細成日問有冇人可以介紹,連出招聘廣告嘅錢都想慳返,咁我咪因利乘便嘗試介紹Stephy去做囉。

我interview嘅時候明明係見兩round,但Stephy去見竟然一round就請,仲記得佢上完office之後,公司成班男同事湧埋嚟我度,來來去去都係講呢幾句:你個friend好靚喎、佢有冇男朋友㗎、一定要叫佢take offer呀、你個friend幾歲呀、你同佢點識㗎……

我個老細仲誇張,突然當我貴賓咁叫入房傾計,但係內容都離不開讚Stephy好好,點解唔一早介紹,唔使咁下話,你班狗公冷靜啲!

最震撼係咩?當我問Stephy會唔會考慮入嚟做嘅時候,個衰妹竟然話:「做呀!人工咁高!即場應承咗喇!」

我:「人工咁高?呢度出名刻薄㗎喎!會唔會係之前客戶服務中心人工太低咋?」

Stephy:「$25,000喎!客戶服務中心嗰度$14,000咋,仲要返5日半,呢度返5日但係多咗$11,000,點會刻薄呀?」

$25,000?我喺客戶服務中心一樣得$14,000,但我入嚟呢度做得$15,000咋!輕微多咗$1,000,我哋年資一樣,年齡一樣,學歷一樣,舊公司一樣,舊公司嘅職責一樣,仲要係我介紹入嚟,點解Stephy會多我大嗱嗱成萬蚊人工㗎?

如果我話冇唔開心,一定係呃你啦,但我並冇嬲Stephy,因為話事開$25,000人工嘅一定係老細,唔知點解我自己會唔好意思講出嚟,將啲屈委吞咗落肚,所以Stephy初初都以為我又係$25,000人工,唔明點解仲要話老細刻薄。

我:「咁你記得返去辭職喇,係咪叫你下個月1號返工?」

Stephy:「唔係呀,個老細叫我抖幾日,下星期一返工。」

我:「客戶服務中心嗰邊唔係要一個月通知咩?」

Stephy:「老細話幫我賠錢,叫我嗰邊即遞抖幾日,畀自己抖一個weekend,下個星期一返工喎。」

有冇咁嘅需要呀?真係你的樣子如何,你的待遇也必如何。

老細你好似已婚㗎喎……(未完待續)

error: