Lorraine「褫奪」咗我嘅伴娘資格，再叫我唔需要出席佢嘅婚禮之後，我哋嘅好朋友關係亦等同決裂，冇興趣思考點解佢男友出軌，但係就要將呢腔怒火遷怒於揭發事件嘅我，我自己都好嬲Lorraine，反正手頭上仲有十幾日大假未放，我就拎盡嚟清假，務求喺佢婚禮前後都唔使再對住做嘢，費事眼冤。
其實Lorraine喺公司就坐正我旁邊，諗到以後大家要咁近距離相處，個心就非常唔舒服，呢件事簡直癲覆我嘅思維同價值觀，曾經諗過係咪自己做錯，唔通發現好朋友嘅另一半有出軌嫌疑，要扮睇唔到同埋唔好提醒對方先為之啱？
喺呢度想特別多謝Fiona，呢篇文所有嘅人都冇化名，講事實何需遮遮掩掩？Fiona作為同事同埋其中一個姊妹（後來頂咗做伴娘），佢不斷咁做中間人同埋磨心，既要力勸Lorraine諗清楚係咪繼續婚禮，又要安慰我試圖修補大家嘅關係。
Fiona：「明白你感受，我都同Lorraine傾咗幾次，佢係唔啱，自己接受唔到未婚夫出軌，就賴你揭發件事令佢難堪，一來係面子問題，二來距離婚禮得返好少時間，如果而家先至話唔嫁，佢又走去擔心唔知點同親戚朋友交代，我覺得Lorraine嘅情緒都好唔穩定。」
我：「所以我發現到個問題就講出嚟，係我嘅錯？」
Fiona：「你冇錯，你100％啱，問題唔喺你身上，Lorraine同我講，你截圖send相當晚，佢已經同未婚夫吵咗鑊甘，不過條仔話會改，仲講到如果唔係真心愛Lorraine，就唔會決定結婚，誓神劈願唔會再出軌。」
我：「佢咁白痴都信真係冇辦法，不過唔好走嚟怪我，調返轉講，如果我發現又唔出聲，第日佢知道老公原來一直出軌一樣係嬲我㗎啫！」
Fiona話，原來係Lorraine嘅未婚夫唔畀我做伴娘，因為佢知道啲相係我send去，又話我心地唔好，臨結婚之前想拆散佢哋，搞到佢哋唔開心，仲反覆強調如果婚禮當日有我出現，氣氛一定會相當尷尬。
Fiona：「Lorraine選擇相信愛情，所以最後演變到唔需要你出席嘅局面。」
我：「都係嗰句啦，佢條仔就係人渣嚟㗎喇，但係我都唔會原諒Lorraine，為咗個擺明呃你嘅男人，咁樣對一個為你好同埋講真話嘅朋友？」
Fiona：「冇辦法，我都承認係你唔好彩，你真係完全冇做錯，其實同類型嘅事件我都遇過。」
我：「你唔使安慰我喇，邊有咁多捉姦在床嘅戲劇性情節吖！拍戲咩！」
Fiona：「唔一樣，的確冇咁戲劇性，不過就好心淡囉！嗰陣我有個女仔friend，好熟好熟嗰隻，佢男朋友好花弗，大把人撞過佢男朋友同其他女仔出街，擺到明一腳踏幾船，成日唔見人，我一早話個男仔靠唔住，唔好再擺咁多感情落去，個friend把口就答應，實質就拖拖拉拉唔斷尾，掟煲唔掟蓋，直至有一次佢男朋友失蹤咗5日，我個friend擔心到走去個男仔屋企，點知人哋阿爸阿媽都唔知個仔去咗邊，全部人以為有咩意外。」
Fiona繼續講：「我記得陪呢個friend去個男仔屋企等嗰陣，仲有個男仔嘅爸爸媽媽同一個唔記得咩親戚在場，大家都慌晒，我個friend話要行出屋外嘅走廊講電話，唔知發生咩事，一講就講咗個兩個鐘，間屋得我同個男仔嘅家人，喂，我連佢男朋友都唔識，但你要我對住啲三唔識七嘅人兩個鐘喎，你想唔想像到幾尷尬？」
我：「咁你個friend其實去咗邊度講電話？」
Fiona：「唔知佢打畀咩人，都唔知講咩電話，兩個鐘後返入屋同我哋講，個男仔原來同朋友去咗離島玩，嗱！呢啲就真係白痴喇！唔使問阿貴都知係陪其他女啦，成個離島都收唔到電話呀？冇電話亭呀？當你真係住離島，度假屋同酒店冇電話㗎？總之點講都係唔通，不過你吹咩，我個friend又信喎！」
我：「原來愛情真係可以令人盲目，是非黑白不分，真話仲聽唔入耳。」
Fiona：「未完呀，我戇居居同佢男友家人相對無言兩個鐘之後，仲陪呢個friend去搵佢男朋友，冬天嚟㗎嗰陣，我趕出嚟嘅時候唔記得著外套，凍到癲咗，但我個friend完全冇關心過我一句，冇問返我喺人哋屋企係咪好無聊好尷尬，一見到個仆街男朋友就衝前問佢凍唔凍，其實我最凍呀，你有冇理下我呀？我成個傻婆咁跟住佢兩個後面行，好似透明人一樣。」
我：「雖然我仲係覺得自己慘啲，但你呢個經歷都唔弱。」
Fiona：「我個friend同佢男友和好如初之後，同我漸漸疏遠，原來係個男仔覺得我成日講佢壞話，叫我個friend疏遠我。」
我：「一模一樣呀！有啲人真係愛情至上，明知畀人呃都要椿個頭埋去，三個字－－－抵Q死，條路自己揀，仆街唔好喊！咁你個friend同個男仔有冇開花結果？」
Fiona：「散咗十世啦，散嘅時候我個friend仲要生要死。」
我：「你又理返佢？」
Fiona：「冇呀，因為佢要生要死嘅時候我去咗杜拜training，都係聽其他朋友講佢狂隊安眠藥搞到入醫院。」
聽完Fiona嘅分享，我冇咁唔開心喇，可能係知道唔止我受過咁不公平嘅待遇啦！而最煩惱嘅事－－－以後點樣同Lorraine相處，亦都有突破性進展，因為喺我放大假嘅期間，Lorraine返咗公司辭職，仲要係賠一個月即走嗰隻，聲稱係個老公想佢做全職主婦喎，是但啦！唔使見住仲好。
其實呢件事係2016年發生，2022年都過咗差唔多一半，點解無端端又再提起？因為Lorraine上星期約Fiona食飯，竟然第一次承認當年咁樣對我係好唔啱，仲託Fiona問我想唔想一齊出嚟見面？
我：「No！Never！」
Fiona：「算啦，咁耐冇見，其實……佢離咗婚。」
我：「唔係黑心，但坦白講，唔意外，衰婚外情？」
Fiona：「係呀，佢老公有第二個，個女人惡到搵Lorraine攤牌，不過我費事問咁多啦，其實Lorraine都好慘嘅，你會唔會考慮下出嚟？反正大家咁耐冇見。」
我：「唔喇，真係唔想再聯絡。」
Fiona冇強迫我，呢個話題亦告一段落。
好對唔住，我只不過係一個女人仔，亦係一個普通人，我冇咁大量，聽到人哋離婚我唔會心涼，反而係冇咩感覺，唔係想幸災樂禍咁講句抵死，純粹唔識得再同Lorraine做朋友，呢幾年我間唔中會諗下自己係咪做多咗，不過如果時光真係倒流，2016年嘅時候一樣會將件事講出嚟，寧願你嬲我，甚至侮辱性地褫奪我嘅伴娘身份，都唔想若干年後你發現個老公係人渣先怪我唔出聲。
至於做返朋友，真係唔需要喇，我朋友雖然唔多，但起碼大家嘅價值觀同理念都相似。（完）
《伴娘》上
揭同事未婚夫出軌「你點解要話畀我聽呀！」
https://hkofficedaily.com/?p=21644