上司仲懶過下屬 幫佢執屎好忙碌

大家有冇遇過啲勁懶勁冇責任感嘅上司?我個阿姐就係咁,連埋我在內,有3個下屬跟佢,其實我哋都係廿幾歲嘅職場新人,最多工作經驗嗰個都係得2年半,估唔到嚟咗呢間公司之後要做埋上司嗰份,有時仲要教返阿姐轉頭。

呢位阿姐每個星期最少請一日假,最低消費嚟㗎喇,有時甚至兩日,仲會特登連埋星期五同星期一自製長假期,不過佢唔係用AL,係用事假病假,或者對一般打工仔嚟講係好平常,不過佢係上司,我第一日返工已經撞正佢請假,搞到全日齋坐唔知做乜,因為同部門幾位同事都係新人。

平時公司開會阿姐避得就避,嗰陣我試用期未過已經要代佢出席會議,寫低晒啲資料畀佢又唔睇,淨係一句:「得啦!你搞掂得㗎喇,呢啲簡單嘢嚟啫!」

我哋呢班下屬愈做得耐,阿姐就愈係肆無忌憚咁請假,有時會no show直至lunch hour先打返嚟講唔舒服,但佢第二日又會靜雞雞話畀我哋知去咗遊船河,仲畀相我哋睇,其實唔睇都知啦,因為佢嗰次曬到紅晒有印,你當公司其他人傻㗎咩,一個二個唔出聲啫。

咁廢都仲有得撈?我真係唔知點解,傳聞呢間公司係唔會主動炒人,其實老細都知我阿姐廢,有次又係我代佢開會,老細有單嘢叫我問阿姐意見,但佢同我講完又自言自語:「唉,同佢講都冇用,佢都係答啲模稜兩可嘅嘢。」

有次公司個system轉咗,入單同埋請病假嗰啲online步驟都轉晒,阿姐又請咗假,第二日要我呢個新人去教佢,點知阿姐唔肯學,淨係話:「哦,好易啫,Step by step咪得囉!」

其實呢一part阿姐最需要睇一次,因為全公司請得最多假嘅人就係佢,結果隔咗幾日佢又呱呱嘈,話公司轉system好麻煩,叫我埋去幫佢輸入啲資料,好心你學下啦,平均每星期一日sick leave,係咪次次都要幫你入呀?

阿姐對住老細就好好口,或者係因為咁,老細先至一直冇炒佢,唔明點解一個咁冇交帶同埋咁懶嘅人可以喺公司做5年咁耐,更加唔明我老細諗乜。就算阿姐平時喺office都唔代表佢做緊公司嘢,佢試過無數次嗌我埋去,以為講公事啦,點知佢喺淘寶買緊嘢,想問下我意見買邊一隻色好啲。

呢個阿姐其實點解會做到阿姐㗎?唔通以前好搏但而家回晒塘?

唔止我哋3個下屬,就算係隔籬team都有同事話我阿姐好誇張,大家都覺得如果佢quit咗呢份工,出到去根本冇公司會容納到佢。

問心嗰句,有咁嘅阿姐其實又愛又恨,佢份人太懶散,我哋作為下屬冇人監管,心理壓力點都細啲,不過有得必有失,要做埋阿姐嗰份,工作量真係好重,而且全程冇人教冇人lead,咩都要自己執生,仲要成日幫阿姐執屎執手尾。

無可否認,喺度做嘢令我急速成長,因為乜都要自己摸索自己搞掂,但係咁樣真係好攰,我人工得$18,500咋,同部門兩個同事都係咁上下,而我阿姐有5皮幾嘢一個月呀,上次幫佢填嘢見到,幾乎係我哋3個下屬嘅月薪總和,有時諗諗下都覺得接受唔到。

error: