「腦霧還腦霧，老母還老母，就算我真係做錯嘢都冇理由講粗口，更何況係佢自己記錯。」我係直接同阿姐講辭職，信都冇打，佢無意挽留我，事實上亦都留唔到我，所以呢個復活節假期大家有3至4日休息，我隨時有3至4個月唞，雖然冇信心係短時間內搵到工，不過絕對冇後悔過遞信。
我係3月開始返呢份新工，但未到4月已經走咗，其實入職第1日已經發覺唔對路，因為聽到老細咁樣鬧個同事：「DLLM呀！你有冇腦㗎？咁樣同個客解釋咪即係認自己錯囉，係咪白痴㗎你？」好大聲加上語氣兇狠，作為新人嘅我當然嚇親啦！
唔知係我接受程度低，抑或係同事嘅接受程度高，被老細問候老母嗰位同事竟然粒聲唔出，周圍嘅人仲要完全冇反應繼續做自己嘢，正常公司裡面有人聲大夾惡鬧人，本能反應都會望一望發生咩事啦，所以咁嘅氣氛絕對唔正常，亦反映佢哋一早習以為常。
由於我係新人，眼見勢色唔對亦無謂問咁多，只係自己默默觀察，後來發現呢種情況好頻密，幾乎每日都會出現，呢度班同事真係咁忍得？帶埋老母返工都冇問題？當時已經心大心細想辭職唔做，但根據勞工法例所講，試用期內嘅首個月內辭職係無需通知期，亦無需代通知金，咁我就睇定啲先，底線係你唔好用粗口鬧我，否則我一定鬧返你。
第二日老細又鬧另一位男同事，夾雜粗口問候娘親，個男同事有試圖解釋，但幾次都係未講完就畀老細截斷，然後鬧得更勁，所以佢最後都放棄咗爭論，毫無表情咁由得老細指住嚟鬧，
第三日輪到個女同事遭殃，佢雖然冇駁嘴，不過反應總算正常少少。
老細：「你冇心做咪唔好做囉！DLLM！下下都踢一踢郁一郁，咁我使L請你做全職呀？請個學生返嚟兼職都得啦！屌！」
我唔知個女同事做錯乜嘢，但係做錯乜嘢都好，個老細當眾用粗口鬧人就一定唔啱，嗰位女同事喊住咁衝入洗手間，公司裡面其他人又係冇反應，我睇到好嬲，所以隔咗陣就走入去洗手間睇下有咩幫到手。
我：「Hello，我係新嚟嘅同事Debbie，你ok嘛？」遞上紙巾，其實我都驚佢尷尬。
「冇事。」
冷冷嘅回應，聽嘅時候多少覺得佢冇禮貌，喂我關心下你啫，都唔係食花生吖，不過諗深一層，個女同事有咁嘅反應都好合理，首先佢哋平時畀人鬧慣，要呻一早呻咗，其次係我新入嚟做，要講壞話或者發洩都唔會搵個新人做傾訴對象啦！
我反而感受到呢位女同事係唔想節外生枝，畀老細鬧完就算喇，唔想多說話一陣傳咗出去，再加上佢真心驚，亦選擇咗默默承受，咁我都好識做冇追問，假裝順便去洗水間打圓場，出返嚟之後佢都返咗入office做嘢。
呢間公司有一種強烈嘅氛圍，就係份人工包埋畀人鬧，唔係話老細唔可以鬧員工，不過如果下下出動到粗口，下下都問候人老母，試問咁樣係正常咩？舊人嘅容忍係一種潛移默化，新加入嘅人如果選擇留低，咁就即係同化，物以類聚，人以群分。
明白每個人都有自己嘅生活負擔，我唔應該批評別人點解要接受呢種工作方式同埋呢種老細，畢竟大家嘅薪酬待遇唔同，我係Junior得萬零蚊當然可以話唔做就唔做，不過講乜都好，每個人底線唔一樣，返工返到要畀人問候老母，我就幾多錢都唔會做。
我呢條唯一嘅底線唔夠一個月就被「試探」，因為做耐咗，負責嘅嘢多咗，終於有機會同老細喺工作上交接。
老細：「話咗唔要呢一部份，你有冇耳性㗎！DLLM！」
我：「你頭先唔係咁講，佢話唔要嗰part係另一度，呢一部份你冇講到唔要，仲有，我份糧唔包畀你屌老母。」
可能佢慣咗鬧人唔會畀人鬧返轉頭，加上冇諗過一個連試用期都未過嘅女仔會駁嘴，所以情緒更加激動。
老細：「DLLM呀！我話唔要你就改啦！」
我：「你自己記錯仲屌人老母？有病睇醫生啦！未見過老細好似你咁衰！」
第一次見到班同事有反應，阿姐直頭衝上嚟拉走我，如果冇估錯的話，老細轉頭應該都會DKLM，因為竟然請咗個下屬返嚟落佢面，我亦冇再糾纏落去，本身想做到試用期前最後一個星期先辭職，始終出面難搵工，收得一個月糧得一個月糧，可惜最終都敵不過隻癲狗老細，我冇用，真係忍唔到。
阿姐其實無意勸我留低，佢都知道咁樣同老細頂嘴法，唔遞信都冇運行，只係估唔到佢會咁樣講：「老細之前中過肺炎，佢有腦霧，你點解唔忍下啫？佢記錯你咪好聲好氣提佢囉，咁樣嘈法我好難做㗎！」
我：「關腦霧咩事？根本係個格有問題，腦霧還腦霧，老母還老母，就算我真係做錯嘢都冇理由講粗口，更何況係佢自己記錯。」
講完我就執嘢走，慶幸返工第一日見識到老細用粗口鬧人，所以自知做唔長，唔止冇擺任何私人物品喺公司，就連私家杯都冇一隻，拎返個手袋就走得，執嘢唔使一秒。我唔知個阿姐同埋留喺度嘅同事點解可以忍受，不過呢啲係人哋嘅事，我冇義務做社工去聽佢哋嘅心路歷程，可能喺其他同事嘅眼中，我就係嗰種唔鬧得嘅後生女，是但啦，道不同，顧掂自己就算。
唔開心一定有，因為搵工真係會搵到個人好頹， 而家又一次加入失業大軍，所以呢個復活節假期都有少少氣餒，真係冇乜心機出街，希望長假期後有工見啦！