4日連假嘅天氣好似識得追蹤打工仔心情一樣，頭兩日陽光普照，有種唔出街都對唔住自己嘅感覺，噚日同今日雖然冇落雨，不過就天陰陰，完完全全代表咗心理上嘅起伏，仲要微涼，諗起聽日要返工，個人都涼咗一截。
其實頭兩日出街都唔係好舒服，四周圍人山人海，行一條直路都好似打機咁樣要不斷避開障礙物，食乜都要排隊，等位已經花咗唔少時間，長假期加埋派咗消費券係咁上下啦，對於疫情期間一直處於捱打狀態嘅舖頭始終係好事嚟嘅，但有時太多人又好難買到嘢，好懷疑呢個假期都係旺丁唔旺財。
最唔開心係老細今日晨早已經send廢話去公司group嗰度，扮晒親切問同事呢幾日假期過成點。
「關心下你哋先，點呀，呢幾日有冇去邊度玩呀？」
走啦！冇人想同你傾計呀！老細嘅WhatsApp根本係remind緊大家要收拾心情返工，長假期已經唔知做過啲乜，睇埋佢嘅message仲抑鬱。
Senior嗰班係咁易回覆咗老細幾句，我呢類小角色就冇搭嘴，點知老細仲未癲完，竟然打咗篇千字文出嚟，雖然都知佢係copy & paste，不過都好心咪咁痴線啦！
篇千字文嘅主旨係「如何克服长假后遗症」，睇到條題已經火滾，成個group都係香港人，畀少少誠意copy段繁體中文嘅文章得唔得呀？睇埋落去，第一段已經好精彩，佢話如果唔想聽日返到公司太多嘢覆，建議大家今晚同埋聽朝返工搭車嘅時候，可以好快咁樣預覽下有啲乜嘢email，甚至可以覆定先，唔使喺office睇到裙拉褲甩。
另外，第二段就叫各同事整定個list出嚟，將所有工作排先後次序，唔好見到乜就做乜，先揀重要嘅事情出嚟做……其實你呢啲廢話真係鬼唔知阿媽係女人，我見佢個msg係長到褶疊咗， 要撳「查看更多」先睇得晒，係咁易撳咗下，成個手機mon都睇唔晒，即刻去WhatsApp個setting揀「關閉通知8小時」，如果唔係平時工作要靠個group溝通，我真係想揀「保持關閉」。
明白老細係想員工收拾心情，但其實對員工最好嘅關心，就係假期咪搞搞震，長假期係有後遺症，但呢啲唔使老細分享千字文去提醒員工啦！算唔算係一種情緒勒索呢？
投稿前再望多眼，睇下老細仲有冇喺個group裡面發表偉論，原來真係未完，頭先嗰堆只係開場白，之後終於露出真面目，開始分配工作，仲要tag咗相關嘅同事：「＠Ying 你聽朝記住準時返公司，帶一帶個新同事；@Raymond ＠Michael @Alan 之前個客又要橋，其實deadline未到嘅，不過想你哋趁今晚諗定先，唔係要今晚交，諗定先啫，聽日先同我講……」
其實諗定先咪即係做嘢囉，有分別咩？正式嚟講，個假期係未完㗎，但我哋嘅holiday mood就隨住呢個水蛇春message成為過去式，放假都放得咁有壓力，唔抑鬱就假。
佢最後一個msg係咁講：「如果大家因為聽日要返工先搞到今晚失眠，可以諗下而家市道有幾差，有份工已經好好，要學識感恩，我以前打工都係咁樣安慰自己。」
見到有啲同事仲要同老細講多謝分享，有啲就擺明敷衍都要打幾個emoji交差🙏🏻🙏🏻、❤️、💪🏻💪🏻 唉！搵食真係艱難。
投稿讀者：Jessica
大家睇咗今日個IG未呀？
https://www.instagram.com/p/Ccfb2gbBE5t/