投稿讀者：Nikki
介紹返，我阿哥，十大傑青－－－－－佢覺得佢自己係。
我阿哥冇份工做得長，最長嗰份係保險，因為返工時間彈性自由，問題係佢根本唔自律，朝朝都十一二點先起身，返一陣工就走，當然我唔係做保險呢行，唔清楚呢種返工模式同節奏係咪正常，冇資格去批評，亦唔係對呢行有任何異議，但我阿哥就真係好唔負責任。
佢叫晒我哋全家同埋親戚幫襯開單，好多長輩都冇睬佢，始終太清楚我阿哥為人喇，我同阿媽為咗支持佢，分別買咗兩份保單，不過呢條友又係做做下唔做，而家我哋仲有個別親戚啲單變咗孤兒單。
返過文職，佢話班同事冇料；返過份健身教練，佢話啲教練要做鴨先開到單；返侍應，佢話氹仔浸蛟龍，委屈自己；返保險，最初話要點樣點樣做區域經理，而家就話要同師奶阿嬸開床單……究竟佢係咪有妄想症呀？係咪睇得TVB太多睇壞腦呀？
早排仲巴閉，我阿哥叫一個做地盤嘅親戚介紹佢去做紮鐵，其實佢根本未做過，純粹聽到人哋日薪過千就扯晒旗，個親戚起初唔肯，不過我阿哥日日電話轟炸人哋，聽到佢喺電話講：「得啦！你睇住我咪得囉，紮鐵有幾難呀？咩話？好重？妖！我之前做過健身教練㗎！幾條鐵冇問題啦！成千蚊日，我捱三個月都有接近十萬，到時先唞下囉！」
等阿哥收線之後，我就直接問佢：「紮鐵喎，你都唔識，唔好咩都以為好容易啦！要學㗎！」
阿哥：「嘥氣啦！地盤工，冇學歷都做得啦！手板眼見功夫！我之前唔做咋，如唔唔係做到判頭啦！」
無論係文職、健身教練、侍應、保險，甚至係地盤，佢所有嘢都覺得好容易，覺得唔使學，覺得人哋好廢，只要佢肯做就全部人都要行埋一邊，佢睇嘢好簡單，睇得人哋好低，睇得自己好高。
親戚最後唔知安排咗地盤邊個崗位畀佢，我阿哥即刻走去買咗對安全鞋，仲話：「嘩，呢啲咁嘅安全鞋又老土，又貴，仲好！買咗對貴鞋，有啲心機做，等我賺返佢幾個月錢，到時再諗係咪做呢行啦！」
結果，我阿哥返咗一日工就冇做，好記得佢嗰晚講：「痴線！地盤多釘到呢，著安全鞋都唔安全呀！頂你啲鐵又重！又曬！唔鬼做啦！搵返文職好過。」
辛苦唔想做，冇問題，但係唔好咩都用門外漢身份去睇唔起人，成日覺得人哋份工好易做，原來自己根本做唔掂。