我老細70歲有多，玩女人玩到癲，唔係道聽塗說，係我哋成班同事親眼目睹，老細每日都會拖住個妙齡女朋友返公司，而通常每個女朋友嘅「壽命」只會維持一個月左右，下個月好準時就換畫，我自己入職3年，睇足3年，數數手指，淨係計我喺度做咁耐，已經見過佢帶三十幾個唔同嘅女朋友返工。
所謂妙齡有幾妙呢？當然我哋班同事係唔知佢啲女朋友確實年齡啦，但目測就介乎於18至24歲，因為個樣真係好細個，即使每個都化超濃妝仍然睇得出好Young，其實我哋懷疑當中有啲連18歲都未夠，再加上我老細70幾歲之餘，仲要成頭白髮，所以佢拖住啲咁後生嘅女朋友就會有好大對比，直頭係爺孫戀。
「會唔會真係老細啲孫女呀？」有個新同事咁樣問我，坦白講，當年我初入職都問過相同問題。
無論換幾多次畫，老細都會拖住個女朋友行入office，邊行邊錫面珠都見過幾次，咁我寧願老細真係風流喇，如果咁樣錫孫女塊面仲嘔心。
又公道啲講，錫面已經係極限㗎喇，老細通常12點先返嚟，大約5點就走，一出一入呢兩轉佢會拖個女仔隻手，其餘時間就叫個女仔坐喺房，睇住佢做嘢，等佢收工，真係乜都冇做，因為老細係唔會閂房門，而且都好多同事會出出入入搵老細簽文件同傾嘢。
佢啲女朋友喺房裡面永遠得兩樣嘢做，一係自己玩電話，一係自己睇雜誌，總之就坐埋一邊，即使有高層入老細房傾嘢，個女仔都係坐喺度唔需要避席，好似冇靈魂咁。
最搞笑係老細雖然每個月都帶唔同女朋友返嚟，不過換人嘅同時，你又會發覺佢每個女朋友嘅style都一樣，短裙、長頭髮、高、瘦，非一般濃妝，而且個個都著到好靚，其實唔容易㗎！同一類型可以每個月更換一個，仲要肯跟住佢呢個老嘢，真係有錢大晒？有時我都想訪問下老細有咩溝女心得，係咪有咩情意結呢？你咁有錢唔轉下口味？
老細有錢，鍾意點玩咪點玩囉，起碼佢冇「嗰度食嗰度屙」，唔會搞啲女同事，咁講真，若果單計外表，老細嗰堆女朋友係高質嘅，只係我諗極都諗唔明呢班妙齡少女究竟諗乜，跟個阿伯都算喇，仲要喺公司冇靈魂咁等老細收工，背負住我哋成班同事70幾人嘅目光，呢班妙齡少女自己唔覺得尷尬㗎咩？
老細每個女朋友都唔睬人㗎！唔會同我哋任何一個同事打招呼，唔會同我哋講嘢。
由於呢班妙齡女友只會坐喺老細房自閉，同事得兩個機會可以接觸到佢哋，一係去廁所，二係佢哋去pantry斟水。
好多女同事講過，喺廁所遇見老細女朋友諗住say個hi，但係每一個，係每一個老細嘅女朋友都唔會回應，總之你有你打招呼，佢有佢扮睇唔到，久而久之大家喺女廁遇到都會當老細啲女朋友透明。
至於男同事……我哋當然想睇清楚老細啲女朋友啦，有啲真係靚嘅，始終青春無敵，可惜無論你講乜都好，呢班妙齡少女都唔會應你，有男同事試過講hello，個女仔當聽唔到，又試過斟水嘅時候同個女仔講：「你先吖！」咁正常人都會答唔該啦，點知個女仔粒聲唔出直接斟完就走，其實幾冇禮貌。
我有運呀！聽過3個老細嘅女朋友「開金口」，其中一個就係想斟水但搵唔到杯，佢問我：「有冇碑呀？」
碑咩呀？杯呀！不過點敢寸老細啲女吖，我咪喺個櫃拎隻Ikea「公家碑」畀佢囉，又係唔該都冇句。
另一個女仔就唔係同我講嘢，佢係喺pantry一路講電話一路沖茶，聽到佢講：「禾兼晚可以呀。」我估佢係講「我今晚可以」。
總括而言，老細啲女朋友一個二個都有鄉音，清一色北方佳麗，都唔係香港人嚟嘅，但諗深一層都正常，香港女仔比較有性格，點會日日跟住個阿伯返office吖！
仲有一個喺pantry見到佢開WeChat同人voice msg，條女用上海話錄音講嘢，我都唔知佢講乜。
雖然老細班妙齡女朋友全部Made in China，但真心想知佢究竟搵咩「供應商」，一定唔係自己溝㗎啦，70幾歲老人家，猥瑣阿伯咁，點可能個個月換畫呀？(講完都覺得自己係葡萄心態）
有錢佬鍾意點生活，我哋班窮L打工仔冇資格批判，何況老細日日拖個後生女返工係賞心悅目嘅，又唔會有客上嚟office，幾荒唐都係得班同事睇到啫，有靚女睇，有茶餘飯後嘅話題，幾好呀，起碼返工冇咁悶吖！（完）