公司某條team走咗個人，咁自然要出post請返啦，嗰條team嘅manager走嚟同我講：「想請啲後生嘅，你請啲太多經驗嘅人我好難教，我寧願要junior，慢慢train佢哋，最緊要人工平，抵啲吖嘛！急㗎！睇下可唔可以呢兩日搵到幾個上嚟見工吖！」
實得㗎！最緊要你指示夠清晰，嗱嗱聲出job ad搵人，好快已經收到一堆CV，係咁易過濾下，再拎畀個manager過目，佢旋即揀咗4個人出嚟，然後叫我約佢哋第二日見工，仲要我一齊in，因為想快啲請到，唔想分兩次interview喎，咁真係大半日時間都畀晒佢。
非常不幸，第一位約2:00，可惜遲到，雖然我擔心個求職者「蕩失路」，但都唔想過份催促人哋，所以2:20先打去問下係咪嚟緊？嗰個女仔有聽電話呀，佢話塞緊車，轉埋個彎就到，但係轉到3:00都未見人，第二位求職者已經到咗喇，冇辦法只好見咗第二位先。
第二位求職者係男仔，interview頭15分鐘正常發揮，然後個manager問佢：「你接唔接受到OT㗎？」
「OT有冇補水？」
Manager：「有，但其實唔多嘅，可能每星期一次半次㗎啫。」
「每星期一次半次？咁即係一個月最少4晚OT喎，咁多我唔做喇！」
Manager：「咁都叫多？」
「係呀，唔好意思唔係太適合，其實我有另一份工要見，走先喇！」
個男仔真係起身走人，我同manager O嘴互望，唔係鼓吹港豬或者奴隸文化，但我真心覺得每星期一次半次OT唔算過份，而且所謂OT都係講緊8點幾走得，公司除咗會計部之外，好少department會OT超過9點，我反而喺度諗，如果呢個男仔追求零OT，會唔會太難搵到工呢？
Manager：「使唔使咁有性格呀？佢都未聽我講OT幾多錢補水……」
「其實個男仔都幾有禮貌吖……佢頭先有講唔好意思㗎！咁可能人哋有其他嘢做，例如夜晚要讀書進修，唔方便OT呢！」
由於呢一round interview太早結束，我又出返去搵頭先個女仔，睇下佢個彎轉咗去邊，但個女仔冇聽我電話喇。
4點，輪到第三位求職者，呢個都係女仔，interview頭30分鐘又係好順利，我以為可以請得，點知Manager最後問佢：「睇你個working experience淨係做過一份工啫，個reason of leaving冇填嘅？」
「我冇reason of leaving喎！」
Manager：「咁你離職總會有啲原因㗎……」
「我冇離職喎！咁點會有原因？」
我即刻介入：「佢意思係未辭職，份工仲做緊，所以冇填reason of leaving！」
Manager：「我知，雖然未離職，但都有一個想轉工嘅原因㗎嘛，我就係問佢點解想離職轉工囉！」
輪到個女仔插嘴：「我都未離職，咁邊有原因啫？」
Manager：「Okok，當我講錯，咁你點解想轉工？」
「你想問我點解要轉工，唔係reason of leaving，我都未走，未走點樣講原因呀？」
Manager：「得啦，我錯，我講錯，你點解想離職吖？」
「都話我未離職咯！」
當時我個腦浮現出張家輝同慮惠光……我已經多次幫佢哋互相補充同埋緩和氣氛，但都阻止唔到佢兩個嘈嚟嘈去，我覺得Manager的確問得唔好，未離職當然冇reason of leaving，不過既然解釋咗係想知佢點解要轉工，其實個女仔亦無須咬文嚼字繼續拗。
Anyway，最後一位，5點嗰個求職者係男仔，壓軸登場果然特別精彩。
呢位求職者25歲，但係已經做過5份full time，當時我係一疊CV畀manager揀，我都好奇怪佢會揀呢個男仔嚟見，不過最緊要manager鍾意啦！
In到中段，manager問呢位男仔：「我見你轉工都密喎，幾個月一份，最長嗰份一年，如果今次請咗你，你會唔會有信心做得長？」
「你轉工都密啦，你呢份工都係2024年尾入職之嘛，兩年都未夠，你之前份份工都係差唔多兩年。」
我當時係諗發生緊咩事？難道佢同manager係認識嘅？
Manager：「你點知我2024年入職？」
「嚟見工之前上LinkedIn睇過你啲資料啦！」
Manager：「你做咩睇我啲資料？」
「見工前做功課好出奇？我去咩公司interview，in邊條team，咁咪去睇下條team有咩人囉！我有睇過你profile呀，你轉工仲密過同team另外幾個人，你呢10年都轉咗5份工啦！」
雖然我係HR，但我從來唔用LinkedIn，你話我老土又好，保守又好，硬係覺得將自己資料擺晒上平台任人睇嘅感覺好赤裸，加上又唔想畀啲舊同事知道我新去向，所以嗰一刻係幾慶幸自己冇用LinkedIn，真係鬆一口氣。
見完呢4個求職者之後，sorry，應該係3個，因為約2:00嗰位由始至終都冇出現，Manager放工嗰陣已經冇咗半條人命咁款，臨尾佢又修正返請人嘅要求。
Manager：「都係請返啲成熟嘅人啦，三十零歲，四十樓上都得。」
「但係聽日仲有一男一女嚟in喎，見埋先囉！」
Manager：「你見吖，見完真係啱先嗌我，照搵啲成熟嘅求職者，人工高少少唔緊要。」
唔使咁灰喎manager，見工係咁㗎啦，你揀人，人揀你，就係要in過先知大家夾唔夾㗎嘛！
（完）