帶個仔返公司 家事人人都知

老闆有段時間好鍾意帶埋個仔返公司，班同事非常受落，人人爭住同老闆個仔玩，唔排除部分係為咗擦老闆鞋啦，但呢個6歲嘅小朋友真係超得意勁可愛，口齒伶俐，好識講嘢，活潑得嚟又唔係亂叫亂跳嗰種，所以就算佢唔係太子爺都好，我相信一樣會深得同事嘅歡心。

俗語話童言無忌的確冇錯，6歲人仔講嘢完全冇過濾，呢方面亦為我哋成班同事帶嚟無窮歡樂……同埋八卦，老闆通常自己返入房做嘢，然後由得個仔周圍走同人玩，而太子爺亦會失驚無神丟低啲「震撼彈」，佢第一日返嚟office已經同我哋班哥哥姐姐講：「爸爸同媽媽離婚呀！」

唔係啩！雖然我從未見過老闆個老婆，不過已經從佢個仔口中得知老闆娘叫陳X鳳（費事開人全名），又知道老闆娘36歲，連老闆個老豆老母叫咩名都知，然後得悉老闆兩公婆之前喺屋企鬧交，而家搞緊離婚……

「媽媽話好後悔同爸爸結婚呀！」

有個同事追問：「點解呀？」

老闆個仔答：「媽媽話爸爸玩女人。」

乜咁Juicy呀！不過老闆嘅家事都係唔好問落去喇。

又有一次老闆個仔拎咗架玩具車返嚟玩，咁個男同事就陪佢玩一陣啦，點知玩玩下老闆個仔問佢：「我爸爸架車藍色㗎！哥哥你架車咩色㗎？」

同事：「我冇車呀！」

老闆個仔：「點解呀？」

同事：「哥哥冇錢買車囉！」

老闆個仔：「點解你日日返工都冇錢嘅？」

我哋成班已經忍唔住笑，個同事仲要解釋：「哥哥唔係冇錢，係唔夠錢啫！」

老闆個仔又問：「咁點解日日返工都唔夠錢買車嘅？」

問得好呀，真係要問下你爸爸，點解我哋日日幫佢打工都咁窮喇！

另外一次，老闆個仔又突然望住我個Manager講：「叔叔你吸毒呀？我爸爸都有吸毒。」

咩料？老闆吸毒？

原來Manager食完煙返入office所以有陣煙味，小朋友聞到之餘，又指住我Manager手上包煙同火機講：「爸爸晚晚都去廚房吸毒，媽媽話爸爸好臭，叔叔你好臭呀！」

Manager嚇到眼都凸埋，指住自己包煙：「吸毒？你爸爸吸毒定食煙呀？」

老闆個仔再指住Manager包煙講：「爸爸嗰個同你呢個一樣㗎，你哋都好臭呀！叔叔吸毒，叔叔吸毒，叔叔吸毒！」

就係咁，老闆個仔不斷重複「叔叔吸毒」，然後跑咗去第二個department……同我哋講好喇，唔好同警察叔叔講呀！

如是者，我哋再喺老闆個仔口中知道好多嘢，例如佢爸爸喺屋企唔著褲，我估佢意思係淨係著住條底褲，斷估唔會赤裸啩！班同事又知道老闆住邊度同埋幾多樓幾多室，簡單啲講，關於老闆所有唔需要知同埋唔應該知嘅嘢，我哋班同事都已經知道晒。

有次做做下嘢，老闆個仔走嚟對住我講：「爸爸冇錢呀！」

其實當時好忙，所以我都係hea回：「你爸爸點會冇錢呀！」

老闆個仔：「爸爸爭人好多錢，好多好多錢。」

咦，細路仔唔識講大話㗎喎，老闆爭人咁多錢，我份工有冇危險？

正當我諗緊點追問嘅時候，老闆原來行咗出嚟，仲聽到個仔講啲咁嘅嘢：「喂！你亂講啲咩呀？」

估唔到老闆會同我呢個二打六員工解釋：「佢上次扭我買玩具，我唔肯買，要同佢講爸爸爭人好多錢，冇錢買，你唔使理佢㗎！」

我梗係識做啦，即刻笑住同老闆個仔講：「哦，原來你扭爸爸買玩具呀！」

呢個時候Manager又食完煙返嚟，老闆個仔突然指住Manager：「叔叔吸毒呀！叔叔同你一樣吸毒呀！」

老闆忽然跳掣大聲鬧佢個仔：「邊個教你講㗎？叔叔係食煙，唔係吸毒，爸爸都係食煙，邊個教你講呢啲嘢㗎？」

幾驚老闆以為係我哋教壞佢個仔呀！好在佢個仔有解釋：「媽媽話你吸毒好臭呀！」

老闆：「你媽媽都不知所謂！你唔准再講呀！」

自從呢次之後，老闆就冇再帶佢個仔返嚟office喇，唔知嗰晚返去有冇打鑊甘呢？小朋友你幾好嘛！公司班哥哥姐姐好掛住你呀！（完）