我老細係超級阿仙奴球迷，佢有個慣例，就係每逢阿仙奴贏波，無論係英超、盃賽，定係歐洲賽，第二日就會萬歲請全部同事食lunch或者食tea，因為我入嚟呢間公司都係兩年左右，聽講以前仲會拉大隊去食lunch buffet添！
究竟我老細有幾鍾意阿仙奴呢，佢間房有玻璃畫框鑲起兩件阿仙奴波衫，一件係亨利簽名，另一件我已經唔記得係乜水，佢話分別係英國嘅朋友幫佢簽返嚟，同埋喺拍賣網站bid返嚟，另外仲有好多件阿仙奴戰衣掛喺度，一季一件，不過其他嗰啲就冇簽名嘅。
之前英女皇離世，老細放咗我哋一日假，佢話英女皇其實都係阿仙奴fans，呢樣我唔知真定假，不過作為一個打工仔有得放假唔通唔放咩！
除咗贏波請食飯之外，老細仲許下一個承諾，就係阿仙奴如果捧走英超冠軍，佢會請晒全公司同事去日本旅行4日3夜，包晒機票酒店同埋三餐，我哋自己帶零用錢就得喇，老實講，我自己就唔睇足球嘅，阿仙奴個名就梗係聽過啦，但而家先知拎英超原來咁難，因為呢幾年來來去去都係得曼城同埋利物浦爭冠軍。
如果老細呢一連串嘅動作係要推廣阿仙奴，咁佢就真係好成功喇，因為我呢啲唔睇波嘅人都會走去留意，有個女同事仲變咗會陪老公睇波，而且個個都mon住阿仙奴嘅賽果，目的當然係為咗第二日有免費餐食啦！
呢度有啲男同事係其他球隊嘅fans，老細成日會同佢哋互窒同講笑，仲話呢度如果有人鍾意熱刺就會即刻炒，但公司真係冇熱刺迷，曼聯、利物浦、車路士，同埋皇馬fans就大把。
老細咁樣同我哋分析：「鍾意曼城嗰班通常係勝利球迷，未有錢之前又唔見你鍾意，鍾意巴黎聖日耳門仲衰，呢啲人最啱打政府工，個格係想輕輕鬆鬆收錢，冇鬥心，不過我哋公司好似冇呢兩隊嘅球迷。」
有同事駁佢：「係啦係啦，鍾意阿仙奴先係好人喇得未？」
老細：「咁又未必喎，依我嘅觀察，鍾意利物浦啲人通常比較腍善，你留意下Terry同阿Don，係咪成日喺office畀人欺凌？」
雖然我唔識波，不過細心諗下Terry同埋阿Don嘅性格又好似係喎！佢哋平時做嘢雖然會發牢騷，但講到尾係幾有交帶，而且就算未去到腍善咁誇張，性格同作風方面都係好易話為。
老細：「嗱，利物浦迷係咪最腍善你哋自己諗喇，但係曼聯迷特別乞人憎就好肯定。」
呢個時候公司幾位曼聯迷梗係唔同意啦，點知老細個分析又幾中。
老細：「你哋留意下，鍾意曼聯啲人鍾意推卸責任，聲大夾無準，佢哋話人就得，人哋話佢就唔得，串柒柒，冇料扮四條。」
幾乎用晒最負面嘅評語，公司幾個曼聯迷即刻反擊，跟住佢哋又同老細嘈餐飽，今次有少少動真火🙈
曼聯我識，但係呢支球隊有咩人就完全唔知，淨係知碧咸踢過，同埋C朗又返咗嚟，不過老細嗰啲評論用嚟對比返公司幾位曼聯球迷，好似又準準地喎……
有個曼聯迷同事問返老細：「咁阿仙奴呢？鍾意呢隊濕鳩又有咩特性呀？你唔講下？」
老細：「睇下啲曼聯fans，好地地係要話人哋濕鳩，鍾意阿仙奴啲人咪特別有耐性囉，唔係點忍到你哋咁耐？我仲好重視青訓，所以公司先會肯用咁多新人，明唔明？有冇講錯？」
曼聯迷同事：「屌，你請新人擺明係想用最低工資搵廉價勞工，收皮啦！」
雖然佢哋嘅對話充滿火藥味，不過我哋呢班食花生嘅同事又睇得幾過癮嘅，係咪認同老細啲分析都好啦，office咁樣吵吵鬧鬧幾開心，我以前做過一間公司，成班人淨係低頭做嘢粒聲唔出，返工簡直度日如年。
其實老細嘅分析算唔算統計學呢？如果淨係用我間公司去評測或者唔夠中肯，所以好想問下其他人身邊嘅曼聯迷、利物浦迷，又或者係曼城迷有冇上述共通點，估唔到睇一個人鍾意邊支球隊都可以用嚟測性格。