「唔好意思，講兩句，我負責傳達㗎啫，冇惡意嘅，你今日條裙短得滯，有冇得拉低少少？同埋件恤衫呢，介唔介意扣埋嗰兩粒鈕？因為頭先顧小姐叫我提提你，如果條裙真係搞唔掂唔緊要，淨係扣鈕先吖，不過聽日就唔好著咁短。」
有位senior同事煞有介事咁同我講呢番說話，除咗嚇親之外，我都一度懷疑係咪著錯裙，自己望一望下身，呢條唔係咩短裙喎，豬二千買㗎喎，可以幾短呀？正宗返工裙一條，正經都無可再正經。
我：「呢條裙短？你搞gag咋下話？」
「其實……我睇就梗係唔短啦，不過顧小姐話短吖嘛，佢嘅標準係唔好短過膝頭，最好及膝，如果長裙就更好啦！」
不如講下邊個係顧小姐先啦，嗰陣我都係返咗工一個星期多啲，所以初初嘅印象就係老細嘅personal assistant，總之同事有咩要搵老細就要先搵顧小姐，老細同客食飯又係顧小姐book位，呢啲根本就係personal assistant或者秘書嘅工作啦！當然，後來我先知原來顧小姐仲有多一個身份。
容許我講完條裙再講埋件恤衫，你係咪以為我著咗咩性感衫返工？Sorry呀，件衫都係豬二千㗎，咁可以想像到唔會太暴露同埋sexy啦，新人返工冇耐例牌豬二千㗎啦，formal恤衫，扣淨最高兩粒紐啫，想點吖？
我：「但係件恤衫唔通扣到上頂呀？使唔使唱埋劉德華隻《中國人》？」
「唔係呀，你大吖嘛，好似我呢啲貧乳就梗係無所謂啦，你扣淨兩粒鈕就好大條罅㗎喇，你睇，我喺側邊見到個bra邊，一係你扣多粒啦，扣多粒好唔好？乖啦！」
我好唔爭氣地真係扣返多粒鈕，冇辦法，headhunt撬我嚟呢間公司係比之前加多咗成20%人工，呢份糧我暫時搵唔返，要份工同埋鬥氣兩者之間，我選擇咗前者，後來仲知道向我講以上一堆說話嘅senior都係睇錢做人，你咪睇佢貧乳呀，其實有條長腿㗎，冇得著短裙簡直冇天理。
唔止senior，呢度其他女同事都係一樣，難怪我返工初期都覺得好奇怪，10個女同事有8個著褲，有一個仲大波過我，但係大熱天時都著得好密實，明明係孭界波袋嘅典範，好可惜要「低調處理」。
好喇，鏡頭一轉就講下顧小姐係咩料喇，佢除咗溝埋personal assistant同埋秘書嚟做之外，更加係老細條女，我初頭以為係老婆，原來唔係，據聞同居，形式係夫妻，但就冇簽紙，不過已經以老闆娘身份示人。
顧小姐唔係喺度做先同老細一齊，而係老細後尾叫佢入嚟做（可能係顧小姐自己要求啦，太詳細嘅嘢我就唔知喇），佢醋意好大，無奈請人唔係佢可以話事，所以就要求啲女同事唔可以低胸短裙返工，呢樣嘢冇明文規定，但已經變成指定動作，老細亦冇say。
其實有好多前文後理搞唔清㗎，佢哋話顧小姐入咗公司5至6年，同事們嘅資歷又個個唔一樣，有人話老細以前搭上過女同事，亦有人話唔關事，係顧小姐嚟咗做先有咁多規矩，不過邊句真都好啦，大宗旨就係唔好喺衣著上太吸引老細囉！
佢哋話上年有個intern年輕貌美，波大大都幾索，可能係後生女又冇諗住長做，所以冇聽到勸告，結果差唔多日日畀捉去訓話，仲要每日行埋嚟檢查呢個intern啲衣着合唔合規格，返工啫，估唔到離開咗校園都會咁，訓導主任都冇咁嚴啦！
或者老細真係有前科，所以顧小姐先至會咁冇安全感，不過你唔管住自己條仔，反而走去管成間office咁多女就有啲講唔通，我睇份糧做人㗎啫，長裙就唔啱自己style，索性著長褲唔使煩。
做耐咗仲發覺原來被禁嘅衣著唔止咁少，太緊身唔得，熱褲唔得，背心唔得，瑜伽褲唔得（呢個我唔明，瑜珈褲明明屬於長褲喎），同事話黑絲都盡量避免喎，雖然黑絲就未經證實，但有一次我著完都畀顧小姐睥住，唔知係咪自己心理作用，真係煩過以前學校個訓導。