公司有個外籍同事叫Timothy，由headhunt幫手搵返嚟，佢雖然係美國人，不過之前喺上海做嘢，3年前嚟咗我哋呢度，由於公司位處灣仔近盧押道附近，如果你有去過都應該知嗰度酒吧林立，而且主要係菲籍人士營運，當時已經好多同事見到Timothy晚晚放工就落樓下啲bar消遣。
放工去happy hour本身好正常，不過同事幾乎每次經過都見到佢攬住啲菲律賓女郎，真係又攬又錫玩到好high，而Timothy係完全唔避忌，見到同事唔止唔會鬆手，仲會向我哋say hi，呢個鬼佬嘅性格都幾豪邁。
一間公司咁多人，梗係個個都唔同睇法啦，有部分同事就覺得眼冤，認為Timothy就算玩都應該行遠啲，因為我哋公司真係好近條酒吧街，直頭喺啲紅綠燈對面，不過都有另一班同事覺得冇乜所謂，放咗工就係Timothy嘅私人時間。
疫情期間我哋斷斷續續work from home咗幾轉，呢啲場面自然見少咗，不過早排再返office又見到Timothy喺酒吧玩到癲，我哋唔係入去間bar呀，因為Timothy通常坐正門口啲枱，我諗佢想方便食煙，有時仲見到佢企喺間bar門口拎住支啤酒一路飲一路同人玩。
本身一切如常，冇眼睇嘅同事扮見唔到，冇所謂嘅同事直頭同佢主頭say hello，但係有一次lunch hour，我同幾位同事去咗公司附近篤魚蛋買燒賣，office嗰頭有幾間類似龍津嘅物體，隔籬除咗有酒吧之外，仲有間時鐘酒店，唔係百佳維多利亞，係好罨耷嗰類。
我哋一行幾人睇住Timothy喺上面行落嚟，仲要拖住個菲律賓女人，當時大家一齊望住佢，而Timothy就完全冇覺得唔好意思，一如以往咁同我哋打招呼，跟住個菲律賓女人就好似完成任務咁走咗。
Timothy冇避忌不特止，仲要行過嚟同我哋傾計，有個同事就問佢食lunch未，點解喺上面行落嚟，Timothy都答得好鬼馬，笑住做咗個老漢推車嘅動作，簡單答一句：fxxk！
其中一個同事唔知係天真定係想索料，竟然問Timothy頭先嗰個菲律賓女士係咪佢女朋友，Timothy亦好坦白咁答唔係，再補多句：one thousand.
佢呢餐「lunch」都幾貴……
然後呢件事就有手尾跟喇，因為問佢點解喺時鐘酒店行落嚟嗰位同事返到公司同老細講。
呢位同事後來解釋點解會去篤背脊，原來佢嫌Timothy污糟：「頭先佢行過嚟嗰陣我直頭想彈開。」
另一個同事：「佢都幾爛玩，個疫情爆成咁都仲敢叫雞。」
篤Timothy嗰位同事：「唔係疫唔疫情嘅問題，就算個世界正常，你都唔會想同個啱啱叫完雞嘅人有接觸啦！」
跟住佢兩個就問我點睇。
我：「其實同事嘅私生活我就唔過問嘅，Timothy畀我哋見到啫，可能其他同事都會去嫖，只係我哋冇撞到應。」
篤Timothy嗰位同事：「我明呀，私生活理得佢吖，不過lunch hour喎，公司附近喎，係咪有啲過份呀？」
呢啲咁嘅道德界線問題我都唔想參與，因為只會引嚟爭拗，lunch hour講到尾係私人時間，但你話有冇問題呢……喺公司附近嫖……lunch hour……貪就手搵個菲律賓女仔🤔🤔呢幾樣嘢加埋又好似有啲過火，我只可以話Timothy真係好大癮囉！至於啱定係錯我就冇意見喇。
我冇意見，不過老細有意見，老細聽完同事講之後就嚴肅跟進，叫咗Timothy入房傾，仲傾咗兩粒鐘。
Timothy喺房出嚟就執嘢走，即時離職。
我哋問過HR係咪老細怒炒Timothy，HR話唔係，老細本身係口頭勸喻Timothy唔好咁明目張膽，就算私生活唔檢點都係個人嘅事，只希望佢召妓都玩得遠啲，一來有咩事會損害公司形象，二來畀其他同事見到唔係咁好。
據聞Timothy覺得呢啲係佢自己嘅喜好，又認為只要唔影響到公事同埋工作表現，公司唔應該對佢嘅生活指指點點。聽返HR講，老細同Timothy全程係理性討論，唔怪得傾咗兩粒鐘咁耐但完全冇嘈吵聲啦！
Timothy最終選擇辭職，唔係畀老細炒（HR係咁講），公司亦多咗個茶餘飯後嘅話題，有兩批同事日日喺度開城市論壇，我將佢哋分為「保守派」同埋「開放派」，咁樣講會冇咁亂。
保守派呢班同事淨係覺得Timothy好爛滾，冇人care會唔會損害公司形象，只係唔想公司有個lunch time都去召妓嘅同事，仲話平時放工見到Timothy喺酒吧門口攬女已經為之側目。保守派同事唔知點解覺得鬼佬逢女都啱，仲懷疑Timothy之前喺上海做嘢，可能喺嗰度養成咗召妓嘅習慣，所以嚟到香港之後都改唔到。
至於開放派嗰班同事就哋認為私生活幾唔檢點都好，實在冇理由拉埋公事嚟講，仲話Timothy唔應該咁順攤辭職，寧願畀老細炒，起碼有得賠返一個月人工，甚至可以去勞工處告返公司轉頭。
因為我哋隔咗一重，唔知Timothy同老細係點樣deal，如果真係Timothy自己無癮提出離職，好似又冇得吞喎。
不過呢啲假設性問題講嚟都冇用啦，始終Timothy已經走咗，或者佢真係覺得開心至上，唔志在老細賠一個月呢！我反而想知一般人認為Timothy嘅行為有冇問題？換轉你係佢同事又接唔接受到呢？