之前份工hea到暈 轉咗公司忙到震

近呢一年半裡面已經轉咗四份工,其實我唔鍾意自己咁樣,但真係適應唔到正常返工嘅節奏,最近我又想辭職喇。

之前喺葵涌一間公司做嘢,嗰份工超級得閒,每日真正工作嘅時間唔夠一個鐘,其餘時間就係同同事吹水煲劇,有啲人仲誇張,織冷衫、砌模型、畫畫乜都有,係差在冇打麻雀同埋冇打邊爐,大把同事直頭公然做freelance,開IG shop賣飾物再喺公司pack貨又有,幫人整網頁又有,成間office好似嗰啲workplace公用空間咁。

點解公司會長期處於「無政府狀態」?主要係headcount多過workload,我入嚟嘅時候已經係咁,老細開頭畀咗個budget請人,各部門唔執輸用到最盡,間唔中我都會良心發現想做多啲嘢,然後就會有人同我講:「搏升咩?聽日先整啦!」最好笑係講呢句說話嘅人係我阿姐,佢仲會話:「你咁勤力,我會唔好意思煲劇㗎!」

其實我哋部門已經唔算最懶,公司有兩個sales仲癲,長期唔見人,傳聞話佢哋喺出面仲有另一份工,雖然未經證實,不過我選擇相信,因為試過好多次想開單,有少少問題要搵呢兩個Sales,可以打足全日都冇人聽,Sales喎!Office Hour喎!

好多嘢都係環環緊扣,一個department嘅人唔郁,會令其他department嘅工作都行唔到,結果咪大家鬥拖囉!喺呢度太勤力仲會犯眾憎,因為你阻住人哋吖嘛。

個個都話如果份工太得閒,其實時間會好難捱……er,我明,但有邊個想份工好忙好忙呀?當你習慣咗份工有好多時間淨,你就自然會識得搵娛樂打發時間㗎啦!嗰個好鍾意喺office砌模型嘅同事成日都呻:「好悶呀,幾時先放工呀?」你唔好以為佢真係好悶,其實佢砌模型係砌得好開心㗎,純粹象徵式呻下㗎咋!

有咁耐風流就有咁耐折墮,公司得閒到咁嘅地步,諗都諗到唔會賺大錢啦!風平浪靜嘅時候大家可以「圍威喂」,當個市差咗落嚟之後,問題就開始逐一浮現,開頭只係裁員,裁下裁下就裁到我,隔多一排仲執埋,我前後喺呢間公司三年嘅蜜月期就咁過咗。

做咗呢份hea工三年,成個人都已經冇晒火,冇晒動力,我之前每日嘅工作時間都唔超過一小時,突然要出去做份朝九晚六真係有嘢做嘅工,根本係好難適應。

搵到新工之後,我做咗一個禮拜就辭職,因為同之前太大對比喇,多少少嘢做已經有想嘔嘅感覺(我認真),見到啲document同email直情會頭暈,其實我知呢份新工唔錯,比起出面已經唔算好忙,但我成日將佢同之前份hea工比較,始終適應唔到。

後來我又再轉另一份工,呢份進步咗,不過都係做得一個月,成個人已經頹到一個點,仲記得嗰間公司嘅阿head問我點解咁快唔做,我話因為太忙適應唔到,佢直頭呆咗:「呢度都唔係好忙咋喎,人人準時6點收工,甚少OT,你咁都話適應唔到?」

係呀,適應唔到,我知呢度唔係好忙,但係我之前份工真係太得閒喇,搞唔掂呀!呢度雖然冇OT,不過office hour內真係冇停手,唔係你哋公司有問題,係我有問題😢

跟住轉第三份工又係咁上下情況,呢份叻啲,做咗四個月。

而家係我離開葵涌嗰間hea公司之後嘅第四份工喇,今次做得耐咗,但其實呢份工係最辛苦,忙到想屙尿都要儲埋一次過,仲成日OT,人工亦係最低,仍然未走全因為啲積蓄用得七七八八,雖然每朝起身都好想搵藉口請假同resign,不過我冇條件任性喇。

搵到一份好hea嘅工,真係要求神拜佛可以長做,否則再出去搵其他工作係好難適應,因為你嘅意志喺不知不覺間已經磨滅,我唔止跟唔到正常公司嘅節奏,仲覺得自己適應唔到社會嘅步伐😭我最後悔係離開葵涌嗰間公司之後,一開始搵到嗰兩份新工都好快冇做,而家呢份堅難做呀!係咪報應嚟㗎?講講下又想辭職喇。

投稿讀者:Venus

=====

😎 投稿人咁快搵到四份工,講真已經好好喇,或者睇睇以下個故事會搵到堅持落去嘅理由。

《人到中年先嚟失業,轉工轉行壓力好似山咁大》
https://hkofficedaily.com/?p=12668

error: