上星期有個客嚟公司開會，我、阿頭，仲有老細一齊出席，對方就係一個阿姐帶住個目測廿零歲嘅女仔（最多三十左右），真係未試過Meeting會O晒嘴，因為個阿姐全程係咁鬧女下屬，雖然一粒粗口都冇，但係所有說話都極具侮辱性。
嗰個阿姐典型係又鬧唔係又鬧，一開會叫個女下屬拎啲資料出嚟，其實個女仔本身已經拎緊，咁都要畀阿姐醒一句：「快啲啦！踢一踢郁一郁，全世界等緊你呀！」因為語氣好倔，當時我同阿頭都互望咗一眼，心諗使唔使咁呀？
但呢個只係序幕，緊接落嚟鬧得仲勁。
客：「你出下聲畀啲意見啦！叫你上嚟開會定係做默劇呀？聽眾呀？如果你唔出聲我不如叫個office boy跟我出去開會仲好啦，office boy起碼可以擔擔抬抬。」
咁好啦，個女仔畀阿姐鬧，咪參與下一齊講囉，點知又唔啱……
客：「你講乜嘢啫？我問你講乜嘢呀？可唔可以帶個腦返工呀？你唔諗清楚先㗎咩？你呢啲叫做idea？樓下看更都識啦！」
唔係幫個女仔講好說話，而係個女仔講嘅嘢根本冇問題，起碼我哋公司呢邊唔覺得冒犯先，不過佢阿姐仲未鬧完。
客：「其實你知唔知我哋傾緊乜㗎？叫你開會之前一定冇做準備功夫啦！點解你咁都可以做到半年嘅？你呃飯食㗎？」
佢個女下屬：「我有睇過啲資料㗎，另外有份research……」
都未講完，個阿姐又鬧：「唔係睇過就大晒㗎！你咁嘅資質做咩research都係冇用，仲想嘥我哋時間去睇你啲垃圾呀？」
我老細都頂唔順個客，率先講咗句：「唔使咁勞氣既，任何意見都有用㗎，或者我哋繼續傾埋落去先啦！」
個阿姐：「唔係呀，呢啲人唔鬧唔得㗎！冇心做可以出去搵過份工吖嘛，唔好拖累公司，成嚿雲咁！真係垃圾嚟㗎！」
我都忍唔住，但對方始終係客：「又唔使話佢係垃圾嘅，可能疫情過後大家都未習慣開會，慢慢warm up啦！」
個阿姐：「係垃圾就係垃圾，乜都唔識，教又冇用，公司冇減人工機制咋，唔係起碼要減佢一半人工，都唔得添呀，減一半都畀多佢。」
其實以上都只係節錄，當日個阿姐係全程未停過係咁鬧，咩都鬧一餐，出聲又鬧，唔出聲又鬧，最後個女仔終於喊咗出嚟，睇住佢兩行眼淚流落口罩度，點解要搞成咁呀？開個好普通嘅會啫，何必搞到咁唔開心呢？
今次到我阿頭出聲：「不如唞唞先啦，take個break吖！」
個阿姐：「唔使唔使，講兩句就喊，冇理由要因為佢暫停，唔好再為啲垃圾浪費時間。」
唉，見到個女仔淚如雨下，真係好心悒，臨尾個阿姐直頭黑面唔講嘢，叫個女仔同我哋再schedule下次開會時間，望住佢一路喊一路schedule，走嗰陣都係喊住走，實在唔知講咩好。
送走咗佢哋，我同阿頭仲有老細都相視苦笑，因為身份問題，又冇可能代個女仔鬧佢阿姐，同埋又唔知有冇前傳或者咩內情，不過無論點都好啦，打份工啫，要畀個咁尖酸刻薄嘅阿姐不斷侮辱，真係有需要做到咁咩？
希望個女仔都見到呢篇投稿，作為路人甲，我唔知道份工係咪對你嚟講好緊要，不過喺我哋面前都可以口口聲聲稱呼你做垃圾，相信你阿姐平時鬧得更加兇狠，會唔會諗諗轉換工作環境？份工係重要，但尊嚴都好緊要，一個人長期喺呢種氣氛之下做嘢絕對唔係好事，外人未必幫到你咁多，要改變就要靠自己。