我同老公係舊同事，當時其實佢係高級過我，但係拍咗拖兩年之後，大家嘅職位已經平起平坐，佢話一直被上司針對，做得無癮又停滯不前，所以就決定轉工，咁我作為另一半點都會支持佢。
佢轉工初期的確一帆風順，我哋亦差唔多同一時間準備結婚，請咗好多同事（對佢嚟講係舊同事，對我就係現役同事，因為我仍然喺同一間公司做），不過婚後冇幾耐就有大變動，佢話工字不出頭，想趁後生嘗試搞啲生意自己做老闆。
嗰陣時佢35歲，我28歲，如果以創業嚟講，確實係算後生嘅，即使有咩挫折亦有足夠時間翻身，點知我呢個諗法原來好天真，老公開咗自己公司一年半左右就選擇結業，佢話啲客淨係信大企業，所以得一啲濕星嘅單，個個月蝕住做，決定搵返嘢做冇咁嬲。
我從來都冇要老公畀家用，佢亦都冇畀過家用，因為婚後佢已經創業，我知佢每個月嘅財政都好勉強，所以佢願意重新投入職場絕對係一件好事，無奈當時搵工唔順利，寄咗好多CV出去都冇回音，一係就面試完之後冇下文，過咗3個月左右，老公就放棄求職，走去開咗個股票戶口炒股。
如果你有係咁易留意股票，應該知道早一兩年啲錢算易賺，例如Tesla最高去過$1,200，Facebook（而家叫META）最高去到接近$400，Zoom去到近$80，老公喺升浪當中購入仍然有斬獲，所以個心就愈嚟愈雄，仲話終於明白點解香港咁多人乜都唔使做，日日坐喺電腦面前撳幾撳就有錢收，好過出去返工受氣。
雖然我完全唔識股票，不過都知呢種諗法係冇可能，亦都好危險，問題係講都冇用，嗰段時間佢買股票真係日日升，就算短期跌一波，趁低撈又再賺過。
老公玩美股，上年幾乎每晚都聽到佢講以下對白：
「嘩，又執幾千，好過返工啦，當你3萬蚊一個月，日薪都係1,000，但要做到隻積咁喎，我不如玩股票！」
「今晚跌喎，正！撈返少少先，最好佢跌多幾日，咁先有肉食。」
「老婆你都開個富途牛牛啦，我買乜你跟住買乜，Tesla可以重倉，我睇好上$1,500，而家買抵呀！」
「其實香港好多隱型富豪唔使返工，唔怪得以前office hour出中環見客，硬係見到啲人好似好chill咁，high下tea，入下名店shopping又一日，肯定係夜晚玩股票，日頭出街享受人生。」
講過老公好多次，咁樣嘅生活冇安全感，好唔穩陣，但現實中佢又真係賺緊錢，所以對我嘅勸喻充耳不聞，而我哋又確實享受過人生，因為老公日日贏股票嘅時候，幫屋企添置咗Dyson風扇、Dyson風筒、Samsung唔記得幾多寸大電視，吸塵機械人……樣樣都好奢華。
「老婆，以後你返工做back up，我用股票賺錢，公一份婆一份，家頭細務等我做得喇，掃地拖地都有機械人。」
今年環球股市向下（唔知咁樣形容啱唔啱），總之老公手上嘅美股例如Tesla、META、Zoom等等都喺高位回落，佢成手蟹貨砸住好多積蓄，放就硬蝕，唔放就冇晒流動資金，財政問題開始愈嚟愈沉重。
冇畀家用唔緊要，因為結婚後我從來冇問過佢拎；冇再添置任何高級家電都唔緊要，我以前就係用最原始嘅掃把，用最舊式嘅風扇，你賣咗個掃地機械人同Dyson風扇都冇影響，問題係老公開始問返我攞錢。
兩公婆共患難我可以，不過老公每次攞親嘅金額都唔細，因為佢想要生錢趁低入貨，所以下下都攞十萬八萬，最少都三萬，佢話金額愈大，即使即日鮮賺少少波幅都有唔錯收入，無奈現實中仍然keep住蝕，砸住嘅流動資金亦一日比一日多。
OK，兩個人一齊無分你我，蝕錢同砸住啲錢唔緊要，我一次又一次叫佢再搵嘢做，有份工墊底，起碼唔使咁傍偟吖嘛，但係老公話已經冇做嘢幾年，好難再適應朝9晚6返工嘅節奏，更加受唔到老闆氣，而且年紀唔後生，出去interview成日被質疑，佢受唔住。
受唔住嘅唔止佢，仲有我，捱唔緊要，從來冇追求奢侈生活，借錢畀佢都唔緊要，兩公婆應該要共渡時艱，但佢已經冇晒目標同鬥心，我睇唔到前景，睇唔到將來，如果呢種生活要咁樣過一世，好抱歉，我無法接受。
近呢大半年，大家嘅矛盾愈嚟愈多，爭拗亦變得愈嚟愈頻密，適逢年頭嘅時候，公司嚟咗個新男同事，細過我幾年，但係對我好好，我講咗畀個男同事聽，喺佢未入嚟做之前我已經結咗婚，老公仲係呢間公司嘅舊人。
我對呢位新男同事有好感，佢亦都對我好好，大家咩都會傾，佢講佢屋企同埋過往嘅事畀我聽，我亦有講自己目前同老公遇到嘅問題，除咗冇拖手之外（亦冇親密行為），我哋嘅感情交流層面基本上同一般情侶係冇分別。
呢位男同事話願意等我，仲好誠實咁話心態上希望我同老公分開……問心嗰句，我都有考慮呢個問題，或者冇呢位男同事出現都好，我亦可能會同老公分開，但呢位男同事嘅表態，無疑成為咗我心理上嘅催化劑。
我而家好糾結，內心有好多問題，呢個時候選擇離婚（或者分居），算唔算係絕情呢？因為老公嘅事業同埋財政狀況都處於谷底，但我自問已經容忍咗一段時間，金錢上都前前後後幫咗佢6位數。
另外，如果呢位男同事係街外人，我可能容易啲豁出去，不過佢係我同事，而其他同事又知道我老公係舊同事，好多人當年仲出席過我哋嘅婚禮，如果我選擇同呢位男同事拍拖，或者要長期保密發展地下情，但如果畀人撞見仲衰，個個唔知前因後果以為我不忠，所以個人唔想咁，再唔係就辭職，無謂招惹是非。
我真係唔知可以點做呀……