本身做嗰間公司簡直係西人集中營，老屎忽 X 2打，卸膊精 X 1打，擦鞋仔 X 無數，小圈子 X 多到數唔到，咁你都想像到有幾麻煩啦，每日返工嘅感覺就好似上戰場一樣，朝朝換衫總係會諗藉口想請假，呢種心理狀態我維持咗接近兩年，因為我係2020年入職。
「叫咗你要入晒A呢part啲資料先，然後去B呢part對清楚，再去C呢part確認，點解我見你唔係咁做嘅？」其中一個老屎忽早兩日先咁樣同我講，而其實成件事根本唔使咁複雜，我啪個number就一定唔會錯，亦都從來未錯過，不過佢偏偏覺得自己嘅方法係最好，仲要控制人哋跟佢嗰套。
「呢單嘢唔係我跟開喎！」次次叫呢位跟單同事做嘢，佢睇都未睇就會講呢句。
我：「你睇清楚先啦，個客嘅公司名係B字頭，A至D係你負責㗎！」
「你搵阿良吖，我好多單要開呀。」
講到尾又係唔肯做，都唔緊要喇，搵完阿良，阿良又叫我搵返佢……
我：「阿良又話唔係佢跟喎，幫幫手啦，個客趕住呀！」
「妖，麻鬼煩，擺低啦，冇咁快呀，等得就等啦！」最後咪又係你做，個個喺度推波。
有個擦鞋Sales見親我哋呢啲小角色就西口西面，欠你㗎咩，不過我親眼睇住佢一見到啲高層同老細就會變臉，可以一秒間由黑面神變成笑騎騎嘅烚熟狗頭，現實到你唔信，其實咁樣做人唔攰㗎咩？
好在同部門有幾個同事玩得埋，所以呢兩年嘅日子先至叫做好過啲，因為大家都受緊相同嘅苦，有時一份工好差，可以撐住你做落去嘅除咗份糧，就係一班同聲同氣嘅好同事，如果冇咗佢哋，我相信自己一早已經resign喇。
不過咁……我最後都係resign，因為上兩個月有獵頭撬我去一間新公司，雖然嗰間嘢係新，但係個brand本身喺外國有名氣，佢哋只係開多個香港分部，所以一口氣請好多人。
收到獵頭電話嘅時候，其實我都係抱住試一試嘅心態，interview唔成功咪維持現狀囉，如果一個唔覺意搞掂咗，咁就當係bonus喇，既然冇得輸點解唔搏？
幾個同事知我有機會轉工都話好羨慕，仲叫我介紹個獵頭畀佢哋識，當時我係有少少自私既，即刻介紹咪多咗人同自己爭？所以就決定in完先同獵頭講。
見工過程好順利呀，In 2 round，再等咗幾日就已經有offer，對比本來嗰間公司雖然唔算大躍進，但係人工都有合理升幅，至於大假同埋其他福利就差唔多。
成日聽人哋講，香港地轉工就好似由一隻賊船跳去另一隻賊船，我明白，但既然已確定自己呢艘係賊船，點解唔搏一鋪呢？淨係唔使再見到嗰班老屎忽同卸膊精都夠啦，諗起就精神爽利。
結果我返新工嘅第一日……
「咦，你過咗嚟做呀？又話幫屋企人搞生意嘅？」我竟然喺新公司重遇返舊公司其中一個卸膊精……
由於我同佢本身唔熟，大家又唔同部門，所以之前根本八唔到佢轉工，佢亦都冇提，反而係我早兩個星期搵佢跟張單嘅時候，略略提過自己就快last day。
喺舊公司，除咗幾位傾得埋嘅同事之外，我係唔會同其他人講真心話，加上唔想有人問嚟問去，當時又怕阿頭唔放人，結果我就用「幫屋企人做生意」為辭職理由，而且口徑統一，點估到個世界可以咁細。
我：「哦……本身係幫屋企人做生意既……不過……」
「得啦，明㗎喇，求其搵個藉口辭職啫，明㗎喇，我呢度都係啱啱返咗3日，一齊食lunch吖！」
食你老母呀！我轉工其中一個原因就係舊公司有你呢種人，我寧願識過啲新同事，不嬲同你唔friend。
我：「唔喇，第一日返工，雖然未知有冇welcome lunch，但費事啦，可能同返自己team啲人食先。」
「咁聽日先一齊食囉，Jackson都嚟咗呢度做呀，我叫埋佢吖！」
我：「唔撚係啩……sorry，我意思係仲有舊同事過咗嚟？」
「係呀，我都係嚟到先知，好似而家撞見你咁囉，不過Jackson早過我入嚟，Michelle都會嚟做喎，佢下星期返工。
聽到呢度更加係晴天霹靂，Jackson係舊公司其中一個老屎忽，估唔到佢都會轉工，而Michelle就係Sales，擦鞋婆一名，見高拜見低踩，換言之，最唔想面對嗰班西同事，有部分已經移植咗過嚟，咁我轉工做咩呀？
我：「Michelle都嚟做？佢喺我哋舊公司已經係Sales Team阿姐喇喎。」
「所以應該會多幾個Sales跟埋過檔。」乜咁撚大鑊呀！
我：「世界真係好細，估唔到轉工都撞返咁多舊同事。」
「呢間新公司乜人都冇，啱啱起步係要周圍撬人啦，獵頭搵我先嘅，係喎，你係咪經獵頭㗎？」
我：「係呀，你個獵頭係咪叫Peter？」
「Peter話佢exclusive（獨家）幫呢間新公司請人㗎，即係如果你唔係睇招聘廣告send CV嚟，就一定係經Peter㗎喇，所以我哋咪會撞返Jackson同Michelle呢班舊同事囉，其實啲獵頭都係想搵錢啫，如果搵到間公司啱，梗係因利乘便一次過撬埋其他人啦，唔使再左搵右搵吖嘛，如果Michelle真係帶班下屬過嚟埋班，咁舊公司都畀Peter撬走好多人喎！」
心情仲未平復到，最friend嗰位舊同事嘅WhatsApp msg又到，佢話：「喂，你知唔知你走咗之後呢，全公司最西嘅女人Michelle都宣布會走，聽講佢班柒頭下屬都遞晒信，仲有呀，原來Jackson條old seafood走咗，唔怪得咁耐冇見啦，以為佢中Q咗武肺，正呀，而家公司正常返好多。」
我：「你講嘅嘢我都知，因為呢班西中之星而家全部同我做埋同一間公司……」
「點解嘅？」
我：「因為係經同一個獵頭，個獵頭係exclusive幫呢間新公司請人，唔好再講呢啲喇，你之前咪話叫我介紹個獵頭你識，想一齊轉工既？」
「而家唔轉啦！啲西人都走晒咁滯，而家得返少量old seafood啫，唔使介紹個獵頭畀我喇，我起碼做埋2022年先，今年唔郁住。」
由一隻賊船跳去另一隻賊船好慘？慘唔慘得過成班舊賊跟我上咗呢艘新賊船呀？以前都話有幾個friend啲嘅同事苦中作樂吖，而家未識到新同事，我變相係孤立無援，想呻都冇得呻，真係估唔到轉完工仲大鑊過之前，多謝你呀Peter，人生第一次經獵頭搵工，呢個經歷肯定畢生難忘。