你同另一半係點樣認識同埋開始㗎？經常處理男女會員嘅感情事，間唔中都會同同事交流，原來佢哋嘅愛情故事一樣咁精彩，不過呢單有少少唔同，應該用驚險嚟形容會比較貼切。
我同事叫Terence，佢同另一半係喺夜場……出面條後巷認識，聽返Terence嘅憶述，當晚同個friend飲嘢之後先行離開，跟住路經一條巷仔，佢本身只係直行，唔需要轉入去，不過就見到有對男女喺度拉扯。
夜場附近有痴男怨女拉拉扯扯本屬平常，Terence見個女仔幾靚就本能地望多兩眼，然後發現對方嘅神色好慌張，唔似係一般嘅調情，而呢個女仔亦都好醒目，向住Terence嗌咗聲：「威哥！」
Terence：「從來冇人叫我威哥，我中文名都冇個威字，雖然有一秒猶豫，但我意識到件事唔係咁簡單，所以就應咗個女仔，大大聲同佢講：落咗嚟唔出聲嘅，龍哥同標哥嚟緊喎，一齊宵夜啦！」
根據Terence形容，後巷裡面個男人都幾大隻，講打就一定唔夠人打，好在個女仔識得趁住對方滿腦子問號嗰陣衝返出嚟，仲要識答佢：「好呀！一齊宵夜吖！」
當時個男人似乎想跟埋出嚟，由於一路走出巷仔，光線亦愈嚟愈充足，Terence見到對方個樣根本係惡煞嗰type，個心即刻涼咗一截，心諗係咪做錯好人呢？會唔會無啦啦畀人打一身呢？究竟仲有冇命走得甩呢？思前想後之際，咁啱佢細佬打電話嚟。
Terence：「我一接細佬個電話就講：標哥帶埋咁多人出嚟？我book咗一張枱咋喎，是但啦，你哋係咪到咗路口呀？等埋我。」
我：「咁細佬聽到你咁講咪好錯愕？」
Terence：「佢喺電話問我係咪飲醉酒，然後cut我線，我心諗唔好即刻打返嚟呀，好易穿崩㗎，因為佢cut線後我仲講咗幾句先扮收線，細佬又真係冇call back喎，後來諗返個衰仔都幾冇人性，如果覺得阿哥飲醉咗，唔係應該出嚟接我或者關心兩句咩？」
細佬冇人性唔緊要，Terence有人性咪得囉，結果佢拖住個女仔一口氣行出大街，兩個人唔敢回頭望，總之就出返去人多嘅地方先，呢個就係佢哋第一次拖手嘅情景喇。
後來佢兩個即刻上咗的士，期間個女仔猛咁講多謝，仲解釋嗰晚係出嚟同個朋友慶祝生日，不過朋友又叫埋朋友，啲朋友又叫埋朋友嘅朋友，所以後巷個男人都係啱啱先識，連對方叫咩名都唔知。
Terence：「最初都唔多信㗎，好似講到本身唔鍾意飲嘢咁，似足啲港姐冠軍永遠話自己唔想參加選美，純粹陪個friend去玩咁，不過後來喺埋一齊，又真係知佢唔太鍾意飲酒同落bar，呢個劇情算唔算英雄救美呀？第時結婚擺酒上台講相識經過，應唔應該講出嚟呢？」
咁都唔算英雄救美？Terence嗰晚為安全起見，送埋個女仔返屋企，對方話要多謝佢，隔晚就約Terence出嚟食飯，兩個人就係咁樣開始，呢個愛情故事既驚險又夢幻。
我：「有冇諗過對方有黑底背景，你講啲咩龍哥標哥出嚟仲危險，可能佢打個電話吹雞已經有一百幾十個兄弟衝出嚟，到時天若有情華Dee上身都搞唔掂喎！」
Terence：「後尾諗返咪知驚囉，不過當時點諗得咁多啫，換轉係任何人睇到個環境同氣氛都知道唔對路，我唔係咁樣帶佢走，我諗當晚已經畀人溶咗喇，所以逢親我哋嗌交，或者佢有時無理取鬧，我就會搬返當晚件事出嚟，然後我女朋友就會即刻收火冧返晒。」
溝女溝到搵命搏，我按奈唔住內心嗰份渴望，好八卦咁叫Terence畀我睇佢女朋友張相，果然唔錯喎，好似蔣怡嘅細粒版，唔怪得會畀條MK拉入後巷，又唔怪得我同事會不顧一切出手相救啦！因為以Terence副尊容嚟講呢，搵到個咁靚嘅女朋友真係超額完成……講笑啫，佢兩個拍埋一齊都登對嘅。
我：「如果當晚個女仔唔係靚女，你會唔會救人先？」
Terence：「梗係會啦，唔好睇到我咁現實好冇？」
咁真係抵你搵到個蔣怡2.0嘅。