我公司喺河田街，office啲人都叫我做屯門小富婆，起因係啱啱入嚟做嘅時候，唔知道後樓梯係班煙鏟嘅勝地，其中兩位同事原來喺上一層食緊煙，仲全程聽住我講電話，後來佢兩個行落嚟就對住我講：「嘩！Kelly你屋企做咩生意㗎？」
嗰次我同電話裡面嘅人講：「20萬？咁少賺嚟做咩？老豆間公司每季都會分紅，我咩都唔使做已經有幾廿萬收，得閒到我而家要出去搵其他嘢做攝時間，我投資落你個plan度冇意思㗎，講真幾十萬要我嘥咁多精神時間，跌咗都費事執啦，你壇嘢太細喇，冇利潤。」
除咗兩位煙鏟同事之外，仲有幾個女同事都周圍同人講我好富貴，因為一個星期裡面，有3至4日都見到我放工坐的士走，佢哋提出過「痴車坐」，但由於唔同路，所以呢幾位女同事後來就再冇問我可唔可以一齊搭喇。
八卦是非嘢永遠傳得最快，搞搞下全公司都知道我係小富婆，其實麻煩㗎，已經先後有4個同事問我借錢，幸運係借嘅金額唔太多，一次$500，一次$1000，最多嗰次$1500，更幸運嘅係全部都有借有還，總之佢哋去到月尾冇錢就會第一時間諗起我，so far冇人拖數，不過長貧難顧，我擔心遲早出事。
事實上，我根本唔係咩小富婆，嗰次吹到幾十萬跌咗都費事執，全因電話裡面條友係做「旅遊時光」，呃人買酒店membership同埋旅遊套票，點解會惹埋啲咁嘅騙徒埋身？話說有個friend之前中咗招，雖然後來醒覺，不過都冇咗6位數。
重點係我呢個friend畀人洗腦去做「旅遊時光」嗰陣，個上線要佢交張potential client list出嚟，身邊啲朋友嘅contact全部畀佢填晒落去，結果呢個friend一唔做之後，佢個上線就拎住張list係咁打畀我哋，真係好恐怖，旅行都冇得去，你叫我買酒店membership同套票，係咪有病呀？
真係多得個仆街friend唔少，所以我係特登講到咁浮誇去hea電話裡面條友，基本上係玩緊嘢串佢，點知兩條煙鏟同事聽啲唔聽啲走去當真，嗰陣我啱啱入嚟呢間公司做，又覺得屯門工廠區麻麻地，考慮緊試用期內辭職，所冇解釋得太多。
至於差唔多日日放工坐的士……係因為我老豆揸的士，仲要係專接order做屯門出市區，或者市區入屯天元嘅客，一般嚟講，我每日都會OT到8點左右，基本上過咗放工時間，屯門call的士出市區嘅人就會減少，老豆成日空車走，佢話寧願快快脆出九龍跑多兩轉，好多客食完晚飯call車返屯天元喎！我又衰嘅，坐老豆車鍾意坐後座乘客位，佢架混能車後座好闊好舒服㗎！
唔係想呃啲同事，我曾經解釋過「旅遊時光」單嘢係老吹，目的係要對方知難而退，不過啲同事唔信，佢哋話我呢啲小富婆係刻意低調，仲話通常愈窮嘅人就愈鍾意扮有錢，而愈有錢嘅人反而會扮窮，又用一個星期搭幾次的士做例子，話老細都係搭巴士同西鐵，叫我唔使唔認……
咁點解唔同大家講老豆揸的士？一來因為呢班同事只不過work咗幾個月（都已經有4個人問我借錢，雖然有還🤦🏻♂️），但係父母嘅職業始終係私隱，唔想透露太多，二來有個同事見我成日搭的士，問過我點解唔搭Uber。
「你唔覺得搭的士好受氣咩？遠又唔鍾意，近又唔鍾意，都唔知佢哋想去邊，搭Uber仲好啦！」
我：「都唔係嘅，樹大有枯枝啫！」
「總之我唔會幫襯的士狗！」
我：「點解要叫人的士狗呢？每個行業都有好人同壞人，好多的士司機都好好㗎！」
「聽我講啦，你一個星期搭三四次，不如搭Uber，啲車舒服好多㗎！」
我：「唔一定㗎，有冇搭過混能的士，好舒服好闊，又高身唔使屈住隻腳。」
原來佢曾經受過氣，所以開口埋口「的士狗」，然後有幾個同事又附和，見佢哋咁憎的士司機，咁就更加冇特別提喇。
今日，第5次畀人問借錢，呢個同事之前借過一次$1500，月尾借，月頭出糧有還，但佢今次借2萬……
我：「唔好意思呀，我冇。」
「真係好快還㗎，1號，1號出糧即刻過返數畀你。」
我：「其實係咁嘅，公司份糧呢，我一出就用晒嚟買嘢，平時啲錢都係用老豆張附屬卡，唔會就咁攤大手板問佢拎，如果我問屋企拎幾萬蚊，一定會問長問短，知道我借畀同事仲大鑊，佢哋聽日叫我辭職都似，sorry，幫唔到你。」
你睇，畀人誤會係富家女幾煩吖，唔明點解因為一兩個case就覺得我有錢，就算係賺錢買花戴，都唔需要紆尊降貴嚟到屯門工業區返工啦！用下個腦好唔好？不過我好似畀之前個同事講中咗，通常愈窮嘅人就愈鍾意扮有錢，老豆有鬼附屬卡畀我咩，佢自己都周身卡數囉！