近日睇到一單澳洲嘅新聞，內容係有個員工回覆老闆同老闆前妻嘅WhatsApp嗰陣，冇喺msg句子當中加入笑臉emoji，結果遭公司炒魷，雖然事件告上當地法庭並取得勝訴，不過間公司只係賠咗幾萬蚊港紙同部分養老金，咁就冇咗份工真係唔抵。
有感而發係因為我公司嘅情況都差唔多，要求方面甚至更過份，唯一唔同嘅係我哋冇畀人炒魷，不過唔排除有朝一日打漏個emoji就要食無情雞，所以成班同事喺覆msg嘅時候都會好小心處理，無謂要睇個阿姐嘅面色啦！
規定同事要用emoji嘅係一位阿姐，雖然佢從不透露年齡，但40到尾50歲都走唔甩㗎喇，單身，你自己諗喇。
當年率先出事嘅人就係我，阿姐用WhatsApp指派我做嘢，而我只係覆咗一句：「ok」同日下午就畀佢照肺喇，阿姐問我係咪好唔願意做？係咪好唔耐煩？係咪要佢自己做返先滿意？
佢有幾多條問題，我個頭就有幾多個問號，你叫我做嘢，我咪答咗ok囉，仲要即刻去做，點解仲要認為我唔願意、唔耐煩、唔滿意呢？
嗰陣時佢仲未硬性規定回覆msg要加emoji，直到第二第三第四個同事相繼「出事」，其中一次係阿姐voice msg畀另一位同事，voice msg嘅內容係「叫齊啲人聽朝10:30準時開會，嗌埋隔籬team嘅Peter同Icy入嚟傾。」
咁呢個同事份人就唔多鍾意voice msg，阿姐要錄音都冇計，佢唯有用返文字覆：「10:30？」
然後阿姐就發火喇，覺得呢位同事challenge佢同埋唔樂意開會，後來同事向佢解釋返，因為公司10:00本身有個meeting，相隔半個鐘應該未開完，所以「10:30？」係疑問句再confirm個時間啫，冇咁多意思同情緒。
大家接連「瀨嘢」（其實同事都冇做錯）之後，阿姐叫晒啲人開會講態度問題，佢話我哋平時嘅文字回覆冇語氣，好容易令人產生錯覺，仲話就算對客都一樣，會搞到對方以為發緊晦氣、hea答、冇heart……會唔會諗大咗呀？
阿姐下令要同事回覆佢msg，又或者同事之間互相msg嘅時候，一定要加返emoji，例如「ok😊」「10:30👍🏻」「下星期一畀你💪🏻」「冇問題🥰」「我問咗個客先😉」「好😍」「可唔可以話我知呢份文件應該畀邊個😀」
另外，阿姐仲話嚴禁使用某啲emoji，情況就好似某電台禁止DJ播黃耀明、何韻詩、RubberBand、Dear Jane佢哋啲歌咁……
😅= 阿姐話代表勉為其難接受工作
😨= 唔滿意同埋challenge😢= 覺得委屈唔願意做
🤷🏻♂️= 對上司或者客人嘅決定感到無奈 🤦🏻♂️= 不服從及質疑上司及客人
😠😕😡😤= 呢幾個全部屬於嚴重級別，工作上用都唔用得
阿姐嘅金句係：「冇表情符號即係冇禮貌」以為得佢一個咁騎呢，點知睇新聞先知，原來遠在澳洲都有呢種人，唔知將來有冇同事會搞到好似個事主咁，又要炒魷又要對簿公堂，不過為咗免卻工作上嘅麻煩，我哋都慣咗順住佢加啲emoji，呢啲大齡單身老女人上司特別難服侍。
同事之間嘅私人msg都會用emoji，當然係玩嘢為主啦，例如：「做啦！屌你🥰」「食蕉啦😉😊」「廢柴🤗」其實加個emoji係咪就可以解決所有問題呢？職場果然特別虛假，連用個emoji都皮笑肉不笑，返工真係辛苦。