結婚擺酒冇請同事 現實生活難以啟齒

噚晚我一如以往咁樣,放咗工泊架車去停車場,然後喺車上面打一陣機先至上樓,好衰唔衰我老婆叫咗佢個friend嚟我哋屋企(對方係兩公婆),然後落停車場接佢哋,期間發現我喺架車度玩電話遲遲唔上樓。

嗰兩公婆喺我屋企食完飯後離開,跟住我老婆就開始發脾氣,原來佢以為我有外遇,仲話好耐之前已經見過我揸車返嚟但隔咗45分鐘先至上返屋企,懷疑我一直都匿埋同二奶玩電話談情,仲強調呢條刺喺佢個心入面已經好耐。

我:「好明顯我係打緊機啦,同人電話打msg談情會唔會將部電話打橫咁用呀!」

老婆:「我理得你部電話打橫定係打直啫,總之你都唔係第一次鬼鬼祟祟匿喺車玩電話啦,根本準時放工,晚晚都扮OT。」

其實老婆有一半係講啱咗,我並唔係晚晚OT,但我匿喺架車玩陣電話先至上樓絕對唔係有外遇,只係公司壓力太大,個人太多鬱結,有時好需要一個獨處嘅空間同埋時間,想唞順條氣先返上去面對家庭方面嘅各種問題啫。

追溯返轉頭,老婆好多年前已經質疑過我有古怪,因為當年結婚擺酒,我一個公司同事都冇請(舊同事有,而家呢間公司嘅同事就冇),老婆編排婚宴座位嘅時候已經話過我。

老婆:「得舊同事嘅,你而家公司啲同事呢?一個都唔請呀?」

我:「係呀,唔熟吖嘛!」

老婆:「唔熟都要請㗎,都要知會而家班同事一聲你結婚㗎喎,你老細呢?你上司呢?你下屬呢?」

我:「平時同佢哋都冇兩句,無謂啦!」

老婆:「你轉咗呢份工都一年多啲啦,咁耐都冇兩句?你係唔係唔想畀公司啲人知你結婚呀?」

我:「點會呀,我有講㗎,係唔請佢哋嚟飲啫!」

我老婆喺呢件事上面已經問過幾次,但當時距離婚期太近,最後都不了了之,佢冇再問,我最終亦冇請。

結婚擺酒,一定要請同事㗎咩?同事,一定friend㗎咩?老細同上司,一定會祝福你㗎咩?

當年轉呢份工,係因為人工高,嗰陣plan緊結婚,好自然會考量生活同收入問題,而其實我喺度返工係極之唔開心,老細會捉人入房鬧,講晒粗口嗰隻,唔止對我係咁,其他同事都有呢個遭遇,可能係咁嘅原因,公司氣氛長期緊張,由上司到同事到下屬都係極度卸膊,因為唔做唔錯,多做多錯。

公司好似戰場一樣,交心?講真唔害你都已經好好㗎喇,每日要防小人,又有豬隊友,冇一個department係可以好好合作,唔知點解同一個office做嘢可以好似仇家一樣。

講到咁慘仲做?5個字,食得鹹魚抵得渴,當時我貪人工高跳咗過嚟,其實多少都有心理準備,問題係冇諗過真正要面對嘅時候係幾難捱,特別係畀老細粗口問候嗰陣,好幾次都想鬧返佢轉頭,但係生活呢?老婆呢?仔女呢?供緊嘅樓呢?

既然食得鹹魚抵得渴,自己條路自己揀,咁就唔好呻啦!啱呀,我冇呻呀!所以咪每晚放工匿喺架車度玩陣電話放鬆囉!我唔想將啲壞情緒帶返屋企,想將啲壞情緒釋放出去先返上樓。

或者我應該選擇同老婆坦白,不過男人有時喺工作上受到挫折或者唔開心,莫講話同另一半講,其實同朋友都未必會講得咁詳細,一來唔係人人都喺自己公司做,有啲感受好難理解,二來要敍述成件事,對方唔明你公司架構,又要解釋一大輪。

請呢班老細、上司,仲有同事去飲我嗰餐?人生大事,結婚一世人一次,我真係唔想喺咁開心嘅日子見到呢班人,每個星期見5日乜都夠啦!嚟緊我放工可能會揸去其他地方,盡量唔好喺自己座樓嘅停車場逗留,費事煩完公司嘢,返到嚟又要同老婆解畫。

error: