有個女會員叫Serena，搵另一半時提出咗個條件，就係要鍾意貓，就算唔鍾意都唔緊要，起碼唔好傷害小動物，我嗰陣喺度諗：乜呢樣嘢唔係基本咩？不過聽完Serena上一段感情嘅分手原因，我先至知道原來唔係必然。
Serena前男友間唔中要幫屋企人湊住姨甥仔，一齊出街都好幾次，佢早就知道呢個小朋友好百厭，不過有一次真係忍無可忍動真火，事緣嗰次男朋友帶埋姨甥仔上佢屋企，咁Serena係有養貓嘅，隻貓叫波波。
波波見到咁多人已經有啲驚，自己爬上個架度周圍望，不過姨甥仔就係咁追住嚟玩，呢啲都冇咩嘢啦，Serena亦開聲講過唔好追住隻貓，點知睇漏一眼啫，姨甥仔唔知點解就捉坐波波夾硬抱上身。
正當Serena望過去嘅時候，姨甥仔竟然雙手捧起隻貓就咁掟，想掟波波去個書櫃度，呢個時候Serena已經喝住，但姨甥仔仍然完成整個動作－－－舉高隻貓－－－發力掟隻貓出去，好在波波身手敏捷，飛埋書櫃時用腳撐一撐反彈落地冇事，不過隻貓都驚到叫咗一聲。
Serena眼見愛貓畀人咁樣掟，即時怒不可遏，火遮眼之下行埋姨甥仔度一巴掌星咗落去，跟住就指住動作喇，姨甥仔係咁喊，而Serena前男友係完全冇理過隻貓，亦覺得咁樣掟貓冇問題，只係關心姨甥仔畀人星咗一巴，極速行埋去呵返。
前男友：「你痴線㗎？為咗隻貓打佢？細路仔嚟咋！」
Serena：「細路仔就可以咁樣掟我隻貓呀？」
前男友：「咁你隻貓而家有冇事吖？」
跟住Serena就同佢前男友喺度鬧交，伴隨嘅係姨甥仔嘅喊聲，波波就因為驚得滯已經匿咗唔知去邊。
由於涉及姨甥仔，小朋友返到自己屋企係咁同班大人告狀，聽講前男友阿媽同班親戚都好嬲，全部覺得Serena唔啱，竟然為隻貓打個細路，佢哋家族當姨甥仔如珠如寶，平時鬧都唔敢鬧，而家畀個仔嘅女朋友打，條氣勁唔順，同一日，Serena就收到前男友電話，內容盡是指責，仲講咗句：「我啲屋企人都話你冇愛心，分手吖！」
Serena話佢嘅情緒好複雜，一來傷心，二來覺得委屈，三來就係好嬲，動物都有生命，何況係陪伴自己多年嘅愛貓，究竟前男友成家人係乜嘢構造，掟貓係殘酷對待動物，波波冇受傷係好彩，但係咁都要縱容？仲要調返轉話自己唔啱？
我：「其實佢哋咁樣畀個姨甥仔睇到，呢個小朋友將來嘅行為同埋價值觀都會受影響，盞害死佢。」
Serena：「係呀，不過諗返都唔關我事，呢家人將啲嘢調轉嚟講，掟貓冇問題，只係無限放大我摑咗佢姨甥仔一巴，繼續同呢個男人一齊，第日都唔慌有好日子過。」
是非黑白同埋基本價值觀呢啲嘢，細個唔灌輸正確觀念，大咗之後仲難教，而且大人嘅反應同行為都會影響佢成長，而家姨甥仔見到全家人大動肝火，實會覺得自己掟貓係冇錯。
至於Serena前男友就……算啦，其實冇咗都唔使恨，唔係一定要鍾意動物先叫好男人，不過容許傷害動物嘅行為發生，又要覺得小朋友舉高隻貓咁樣掟都冇問題，我都唔知講咩好，不如落力啲幫Serena搵個更好嘅伴侶好過。