今次係男會員嘅故事，阿Sam本應喺2020年做人夫，但係疫情令到佢嘅婚禮要改期，而其實喺改期之前，阿Sam同當時仲係未婚妻嘅另一半感情已經有變化。
好快講下阿Sam嘅背景，佢喺2019年向拍拖3年嘅女友求婚，book咗2020年4 月嘅酒席，影相、租衫、場地佈置、餅卡等等嘅錢全部畀晒，連大禮都過埋，仲為咗影結婚相走去減肥，join嗰啲24小時健身室嘅會藉。
據阿Sam所講，另一半嘅父母有次話要去佢屋企參觀，因為想知個女嫁咗之後嘅居住環境係點，事後女友居然同阿Sam講：「阿媽話你間屋好細，屈屈質質咁，驚我住唔慣！」
阿Sam住荃灣麗城花園，個單位嘅建築面積係668呎，實用面積573呎，結咗婚兩個人住咋喎，就算生埋BB都冇問題啦，咁都話屈質？最令阿Sam谷氣嘅係，另一半同父母係住緊公屋……佢話唔係睇唔起人，因為佢自己未上車之前一樣住公屋，只係冇諗過有層麗城會調返轉被嫌棄。
至於禮金方面，阿Sam起初已經估計「來者不善」，心裡面預計對方父母會嗌10萬蚊㗎喇，點估到人哋要求18萬禮金。
阿Sam：「佢哋話18萬好意頭，1818，實發實發，仲話養到個女咁大，收18萬已經好相宜喎。」
我：「照咁講，佢哋冇嗌28萬都好錫住你，2828，易發易發添啦！」我講笑啫，嫌人間屋細，又要18萬嫁女費，世伯伯母都幾難捉摸㗎喎！
最終阿Sam都畀咗18萬禮金，過大禮嗰日畀嘅，可惜人算不如天算，疫情殺到，政府收緊社交距離，女方家人又唔想縮酒席，於是呢頭婚事押後咗幾次，當中又要夾好日，好日本身大把人爭，唔夠爭又要再延期，搞吓搞吓延遲咗成年都未擺得成酒。
而喺呢段日子裡面，阿Sam同另一半嘅關係產生咗巨變，唔關疫情事，係關第三者事，佢女友識咗第二個，主動提出分手，阿Sam多番挽留，最終都要接受呢個事實，佢話初時好大打擊，不過諗深一層，人哋個心已經變咗，苦苦哀求又可以點呢？結果女友變成前女友，一初都係過去式喇。
情已逝結唔成婚，阿Sam主動搵前女友講返禮金件事，問對方有冇同爸爸媽媽傾過幾時可以退返禮金，佢前女友咁講：「其實我已經同佢哋提咗，不過阿媽唔肯退，我都唔知點算，不如你自己問佢吖！」
阿Sam回覆：「禮金喎？你已經唔係嫁畀我，咁hold住我啲禮金做乜呢？呢啲唔係掟煲費喎！大嗱嗱18萬收返都好正常啫。」
無論點講都好，前女友都係叫佢自己搵阿媽傾。
我：「咁你有冇搵呀？」
阿Sam：「有呀！佢阿媽話我小家。」
我：「咁即係……拎唔拎得返？」
阿Sam：「到而家仲未拎返，最新傾到佢阿媽話畀返一半我，其實以你做呢行嘅經驗呢，知唔知禮金有冇得拎返㗎？」
睬過你咩！我未試過問人拎返禮金，我啲會員都未試過，不過呢單嘢真係考起，因為通常過大禮都係結婚前好短嘅日子進行，照計冇乜機會有差池，但係呢個疫情就令到好多新問題湧現，好似阿Sam咁，過完大禮先撞正收緊社交距離，所以婚期一改再改，改到情海翻波都未結到，我真係諗唔到例子可以參考。
其實疫情真係打亂咗唔少人嘅計劃，出國留學要hold住、工唔敢貿貿然轉、旅行就更加遙遙無期，估唔到仲有人嘅愛情故事係咁悲慘，18萬禮金嗰度我唔識畀意見呀，所以就出稿問下大家有咩睇法，留個言傾下吖。