中咗Omicron唔算慘，大把人中咗之後都好返，一個人如果無腦其實仲慘，就好似我老細咁，其實佢最需要做嘅唔係咩快速測試或者核酸測試，反而去做個智力測試仲實際，腦袋是個好東西，希望佢也有一個。
話說公司有個同事確診，佢星期日晏晝msg直屬上司講咗件事，然後公司以email同WhatsApp group公布消息，咁有好多同事屋企有大有細，知道咗之後梗係會驚同埋議論紛紛啦，諗住第二日唔返工即刻去check㗎喇，一陣又成為咗A1頭條啲乜乜乜群組就唔好啦，點估到老細喺個WhatsApp group度打咗段好反智嘅說話。
老細：「各位同事，鑑於我哋office有人確診，已經叫咗Lydia（佢係Admin）買快速測試套裝，大家一齊返公司check，快速測試套裝嘅錢會由公司出，各位唔使擔心，希望早啲搞掂，各同事聽朝準時。」
佢呢番說話唔係搞gag，更加唔係曲，佢真心㗎！有冇常識㗎？如果揸正嚟做，根據指引應該要關閉工作場所，建議員工留家工作而唔係返office，仲要提供過去兩星期嘅員工名單，確診病例嘅緊密接觸者更加要被安排檢疫。
其他人睇完呢段msg竟然敢怒不敢言，只係轉去另一個冇高層在內嘅同事WhatsApp group傾，有人呻，有人爆粗，有人不知所措，妖！匿喺個山窿入面圍爐取暖有鬼用咩，直接同老細講啦！
冇人出聲我出聲，去返公司個大group，我直接@老細回應：「公司有同事確診，仲要我哋返office迫埋做檢測？咁樣唔中招都變咗中招啦，我唔返呀，會自己出去check，其實而家應該通知有關嘅部門同埋安排消毒。」
成個公司大group靜晒，反而另外嗰個同事group啲msg就係咁彈出嚟，個個話我大膽，收皮啦！人性就係咁，想爭取唔敢出聲，唔想自己冒險，等到有人開口先扮支持，一個二個無膽匪類。隔咗好耐先有另一位同事喺大group話自己都唔會返office，寧願自費喺出面做檢測。
然後老細夠膽死回我：「咁一齊check集中啲，可以即刻知吖嘛，如果中咗你都唔想惹埋屋企人啦！」嘩，講到大仁大義抗疫咁，帶埋睡袋返office住好冇？
我相信香港好多人都唔係驚中Omicron，只係驚中咗會牽連家人、朋友，甚至成棟樓嘅街坊，玩下手仲要去唔知邊度隔離，但而家公司已經肯定有同事中招，你仲叫晒全部人集中返office驗？有冇咁反智呀？
最終我堅持唔返，跟住再有幾個senior都話自己出去驗，老細先至放棄全體返office做快速測試嘅決定，最諷刺係有個同事竟然喺WhatsApp group度問：「如果測試完冇事，係咪可以返工，下星期本身有個online training？」成日話港豬港豬，呢啲咪係典範囉！一直以嚟都唔知咩係動態清零，而家明喇，原來係動態Training!
我知老細條氣唔順，佢今朝cap咗幅新聞圖出嚟，內容係話政府對密切接觸者更新咗定義，患者喺發病前兩日嘅同住家人或者一齊食飯嘅人，先會被界定為密切接觸，所以公司同事唔代表係密切接觸……講咁多嘢，都係想我哋即刻返office做嘢啫！
呢啲老細都係做咗智力測試先啦！Omicron有得救，冇腦就真係醫返都嘥藥費。