有個求職者條件唔差，但奇怪在半年冇做嘢，佢同我講賦閑在家嘅原因係細公司唔做，一定要等大公司offer，仲話人才唔係去到邊都一樣，大公司係有分別。
唔……又唔可以話佢錯嘅，只係人人都想做大公司，唔通人人都做到大公司咩？我同意做過大公司，CV的確係靚啲，但係有兩樣嘢不得不提，首先係平民百姓要為口奔馳，未必個個嘅經濟條件都咁好，好多人真係手停口停，我都經歷過咁嘅階段，要食飯，要畀家用，冇大公司offer就唔做，唔通等到坐食山崩咩？我做細公司自食其力，總好過攤大手板問屋企人攞錢。
其次係，細公司未必搵唔到機會，我有朋友喺一間減肥食品細公司起步，學晒啲嘢同埋攞到network之後，自己同partner搞咗另一檔，最後都幾成功，如果去大公司做一粒螺絲，恐怕佢接觸嘅嘢冇咁多，又未必可以走出嚟創業。
其實大公司同細公司各有各好，最緊要係過程中學到嘢，摸索到自己想行嘅路。
細公司學做嘢，大公司學做人，總有得著。