其實一個員工嘅離職成本（Turnover Costs）係點計呢？我發覺好多公司都冇概念，純粹就係：「要走就走，隨時可以搵人返嚟頂上。」
以我自己間headhunt公司為例，個別幾條team嘅turnover rate係極高，半年內可以面目全非，啱啱先記得佢哋個名或者熟少少，隔一陣又聽到佢哋resign，不過team head同埋老闆永遠都覺得問題喺員工身上，結咗婚就話你顧住屋企冇盡心盡力，未結婚又話你唔定性，後生嘅話你唔肯學，老嘅話你唔聽指示，總之管理一定冇問題，有問題嘅永遠都係下屬。
我以前公司老闆就係一個好例子，有位好Senior嘅會計平時一個人做幾個人嘅嘢，已經維持咗幾年，其中公司有兩年凍薪，另外加咗幾次人工都係幾百蚊，終於有一日頂唔順辭職，老闆要用返佢個價去請人返嚟，其實離職呢位會計同事話就話係senior，但本身份糧就低於市價，結果請人嗰陣好尷尬，收得平嘅人做唔掂，做得掂嘅人收得貴，結果係點？咪就係請兩個fresh嘅人去replace之前走嗰位同事囉。
好多人話離職成本就係出隻稿登job ad，圍返都係幾百蚊，如果咁諗就大錯特錯，呢個只係肉眼見到同埋可以用計數機計到嘅成本，仲有一啲係見唔到嘅。
當年請完兩個會計妹妹仔返嚟之後，佢條team足足用咗兩三個月去train，到正式上手喇，其中一個話頂唔順要辭職，然後又要HR再請人、再in人、再安排一切，嗰段時間每一位同事想claim錢真係慘過乞，終於公司又搵多個senior返嚟lead住呢兩個細嘅，以前一個人做嘅嘢，而家變咗3個，人工支出都多咗兩倍幾。
最初走咗嗰位會計後來又點呢？人哋已經搵到份人工高啲，工作量又少啲嘅工作喇。
無可否認，走咗任何一個員工，公司都可以繼續運作，不過成本同埋代價其實唔止幾千蚊或者幾萬蚊，有好多影響都係好深遠，甚至要用一段頗長嘅時間先可以重回正軌。