真心，冇諗過會到達10萬likes呢個里程碑，唔係客套說話，我真係從來冇諗過，好多謝大家呢兩年零三個月以嚟嘅支持，其實我係記得晒你哋啲名，而每個留言亦令我更了解你哋嘅background，有好多朋友仲add咗我私人facebook，所以每次有客人同我講：「你啲fans、你啲fans。」我都會不厭其煩去更正：「唔係fans，係朋友同埋讀者。」
如果你比我時光倒流去返2017年，我未必會開呢個page，當時真係憑一股傻勁，有時如果諗得愈多，愈想準備更充足，愈想追求零瑕疵，其實反而會阻礙咗自己。
「等我瘦啲先同佢一齊啦！」
「等我再儲多啲錢先旅行啦！」
「等佢跌多幾蚊我先至入市啦！」
「等我做多陣再研究下係咪轉工啦！」
「等我整靚個logo同banner先開個page啦！」
其實好多嘢都冇所謂嘅最好時機，你選擇等，不過時間同埋機會永遠唔會等人，踏出第一步去行動就得㗎喇，我哋都唔完美，亦等唔到完美，無論你今日做得幾好，之後睇返都會覺得可以更好，正如我當年出本書覺得好型，而家睇返內容都想一把火燒咗佢，因為有啲問題係要一路遇到一路糾正，過程中只要投入同埋真心鍾意呢件事，自然就會成精。
時間唔等人，想做嘅嘢快啲行動快啲做，我永遠都支持你哋，正如你哋一直都咁支持我一樣，我哋大家會繼續睇住對方成長。
種一棵樹最好嘅時機係10年前，但如果你10年後又睇返轉頭，其實最好嘅時機亦都係而家呢一刻。