我想問呢……如果呢……我開live呢，有冇人會想睇㗎？
件事就咁嘅，好多人都話inbox我但收唔到回覆，其實寶寶心裡苦，但寶寶不說，我試過趁假期全日坐喺屋企覆inbox，可惜用咗超過大半日時間都覆唔到5個人嘅問題，情況如下：
「你好呀聶瞳，想問下如果咁咁咁，我係咪應該辭職呢？」
我答：「哦，咁你而家咁咁咁，會唔會咁咁咁，再唔係咁咁咁，考慮清楚先。」
好喇，當我覆完一個，去覆第二個嘅時候，第一個朋友又有新問題，第二個覆完又係，去到覆第三個，第一同第二個朋友又會繼續有其他新問題，結果我點都覆唔到超過五個人的問題，因為當我覆完一堆之後，之前嘅讀者都會不斷提出新問題。
我知道就算全職24小時不斷覆都唔會覆得晒，不如我開live，嗰段時間我會開住inbox即睇即答，唔公開名，講出嚟之後其他讀者又可以透過live嘅comment畀意見，最緊要係幫手解決難題嘛，我都試過孤立無助，好明白有時需要樹窿傾下計，互相交流下意見。
仲有，其實我只係熟recruitment，C&B應該有其他讀者比我更熟，有多幾個專業智囊會差好遠。
最近仲有啲比較有趣嘅情況出現，事關我set咗個auto reply，內容係咁：
「喺度作出個呼籲先，因為最近收到好多讀者朋友send cv嚟，辦公室日報唔係headhunt公司，冇牌照係唔可以做中介幫人搵工，不過我好歡迎大家喺度交流心得同講故事，我會做一個好好嘅聆聽者，亦會盡量畀專業意見，感謝你哋一直不離不棄咁支持呢個page。」
有次個讀者inbox我講咗句：「Hi 聶瞳！」
然後auto reply半秒已經彈出以上嗰堆字，跟住對方就咁話：「我唔係想你幫我搵嘢做呀！你唔使覆得咁快住，聽埋我講先啦好冇？」
冷靜少少先，我半秒真係打唔到咁多字，呢個係auto reply……
最近再收多咗一種message，因為辦公室日報改咗名，拆走咗「x聶瞳」，所以就有以下呢堆問題：
「聶瞳係咪冇做喇？」
「聶瞳係咪冇返工？」
「個page賣咗？」
真係好鬼可愛，聶瞳仲有喺辦公室日報做呀，我冇同自己遞辭職信，個page都冇賣出去，放心！
所以我就諗，不如每兩晚都開個live同你哋傾計兼即場答問題啦，起碼大家啲inbox message唔會石沉大海，我又可以畀到回應，只係有啲擔心個live冇人睇啫，好傷我自尊心㗎嘛！