請咗個新仔，佢叫Alan，面對面interview又好，電話confirm offer又好，已經講咗公司係返9點放6點，雖然冇提佢要準時，不過咁大個仔唔通仲要千叮萬囑咩，等於我唔會特登提你記住呼吸一樣。
9:10，未見人，其實我掛住做嘢仲未得閒理，但後來Alan嘅直屬上司打畀我，問點解個新同事冇晒影，我望一望電腦個時間，原來已經9:20，諗緊佢係咪甩底唔返啦，去到9:32終於見到Alan出現喇。
Receptionist帶佢行嚟我個位，只見Alan好似上氣唔接下氣。
Alan：「唔好意思，我去錯咗公司！」
我：「去錯公司？唔好講咁多喇，帶你去返你個department先。」
因為Alan個直屬上司頭先嘅語氣已經麻麻，我決定晏啲先同佢搞入職手續，希望Alan嗱嗱聲露面先。
果然不出所料，帶Alan過去之後，佢上司塊面黑黑地，然後問咗句：「你第一日返工就遲到呀？仲要遲半個鐘？」
Alan當時仍然係氣來氣喘mode：「唔好意思呀，我去錯咗公司。」佢重複講返呢句，其實有少少覺得佢講sorry就夠，但我嘅身份又冇理由第一日返工就教Alan點講嘢。
佢上司：「去錯公司？點樣去錯公司呀？」
Alan：「因為之前見工嗰陣，有另一間公司又係觀塘區，嗰次仲要同一日interview，所以我混淆咗，收到電話話請我嗰陣，一直以為係嗰間公司，頭先去錯第二度返工，知道唔妥已經即刻跑過嚟，但係兩間公司一個街頭，一個街尾，搭的士又冇人載……」
其實Alan咁樣答之後，我已經感覺到不妙，你不如話塞車仲好啲。
佢上司：「即係你本身以為係另一間公司請你先至take呢個offer？」
Alan：「唔係唔係，你哋請我都會take㗎，總之有offer就得。」
點解好似「答多錯多」，然後我擺低Alan，自己返埋位做嘢，過咗一陣，佢上司又打內線畀我，都預咗會詐型㗎喇，不過同我講冇用吖，人係佢決定請，當日interview佢亦有份見。
佢上司：「覺唔覺得Alan好唔掂？」
我：「哦，第一日遲到，不過算好誠實，試下從呢個角度睇，畀個機會佢囉！」
佢上司：「你信佢呀？收到offer之後去錯第二間公司返工？而家拍緊笑片呀？頭先我再問Alan詳細啲，佢話人哋公司啲人都呆晒，話冇叫過佢返工……我反而覺得佢似吹水，遲到唔敢認，作個咁誇張嘅藉口。」
我：「不過咁喎，如果呢個藉口係作出嚟，咪仲蠢過用其他原因，應該唔會搵自己笨既。」
佢上司：「好，我就當呢個係直實原因，咁佢應該真係笨喇，第日叫佢見客，去錯第二間公司，第日叫佢send個email畀客，send錯畀第二個客，咁點搞呀？連自己第一日返工返邊度都搞唔掂，呢個人會唔會太粗心大意呀？」
我：「咁……你想點？」
佢上司：「想問下你勞工法例，係咪頭7日炒，或者頭7日之內覺得唔啱，即日通知就可以叫佢走？」
我：「你想唔要佢呀？不如咁啦，反正Alan都係返咗一陣工，睇多幾日先囉，我見佢頭先真係上氣唔接下氣，應該真係由街頭跑到過嚟街尾，咁佢咁傻去錯公司又講出嚟，都算係戇直吖，請個戇直好過請個古惑嘅人吖嘛！」
我盡晒力㗎喇，出動埋戇直呢個原因去幫手求情。
佢上司：「你真係信佢呀？個解釋好牽強喎！我偏向覺得係古惑，其實佢只係想推走遲到嘅責任，所以求其作個原因，點知愈作愈唔合邏輯。」
我：「唔係既，都有機會㗎，有時求職者同一時間見幾份工，真係好容易搞錯。」
佢上司：「如果唔係蠢，咁即係能力有問題啦！」
個人認為Alan第一日返工遲到超過半個鐘，佢上司已經有個唔好嘅印象，亦即係先入為主，站於HR嘅立場，我梗係唔想再重新請人啦，而家起碼說服到Alan上司睇多幾日先，希望呢位新同事可以用表現力挽狂瀾啦！
其實你哋認為Alan個原因算唔算牽強呢？覺得係真話定大話？