「Hello Chris，HR打畀我話未見你喎，係咪唔記得今日第一日返工？定係塞車遲到呀？而家去到邊度？」其實Chris已經唔係第一次，之前5次介紹佢去interview已經no show，呢次以為好啲，因為有去見工，仲請埋，但係返工當日就唔見咗人。
Chris：「我都係唔返喇，麻煩係幫我同個HR講聲，份工都係唔適合我，唔該晒你。」作為一個headhunt，最怕就係聽到呢段對白，不過我介紹工作畀佢係冇佣收，因為我係受一個叫Owen嘅candidate所託，義務幫佢呢個朋友Chris搵工。
點解咁熱心幫個Candidate嘅朋友搵工仲要不問回報？事關我前前後後已經介紹過3份工畀Owen，佢呢6，7年每次轉工都係經我手，而且份份都高薪厚職，淨係透過Owen賺到嘅佣都唔少，加上之前要幫間大公司請IT嘅時候，適逢Owen細佬要搵工又啱條件，結果一擊即中，呢度又賺一筆佣金，所以Owen某程度上都係我恩人。
每次都係我求Owen轉工同埋介紹人，難得佢求返我轉頭，咁我當然唔會托手踭啦，因為一個成功嘅headhunt一定要同candidate保持良好關係，咁先會長做長有。
又點解呢幾次幫Owen會冇佣收呢？因為佢朋友Chris係傷殘人士，雖然出面好多公司都唔介意聘請，但係經headhunt去搵傷殘人士就真係比較少，幾乎係唔會有，所以我都係打人情牌，周圍問啲客有冇公司請一個坐輪椅嘅人，次次都係搭上搭，根本唔係我headhunt公司正常生意，咁當然冇佣收啦。
我：「唔好介意呀Owen，你朋友Chris真係有啲難搞。」
Owen：「我明白，不過你幫下Chris啦，佢已經好多年冇做嘢，一直喺屋企自暴自棄，我唔忍心見到佢咁呀！」
我：「我見過Chris，當然理解啦，上次佢上嚟headhunt公司見我嗰陣，其實已經發覺佢好頹，不過咁呀Owen，如果我介紹佢去見工同埋返工都甩底，啲人情牌遲早用晒，班HR會向我詐型，一次又係咁，兩次又係咁……」
Owen：「我代佢同你講聲sorry，不過你盡量幫啦，佢自己一定唔肯搵工，有你push下佢已經有進步，起碼今次有去見吖，係請完冇返工啫，我相信過多一兩次就得㗎喇，可能佢要時間適應。」
我：「好啦，咁我再搵搵，其實政府有啲機構同埋渠道幫傷殘人士搵工……」
Owen：「佢點會apply吖，你唔係唔知道Chris嘅性格，如果方便的話，不如你同佢傾下計吖，例如今次佢明明見得成份工，人哋請咗又唔返，會唔會係有咩顧忌呀？你幫我開解下佢吖，我講佢又唔聽。」
嘩，仲要做埋社工，算啦，其實我唔止視Owen為candidate，我仲當佢係朋友，因為我哋除咗講工作同轉工呢啲話題之外，耐唔耐都會WhatsApp吹水講無謂嘢，我都唔希望因為Chris而損害大家感情。
再打去同Chris傾兩句，但佢嘅態度都偏向敷衍：「唔啦！」「冇嘢喎。」「唔使再幫我搵工喇！」「太耐冇做嘢，我鍾意留喺屋企。」
隔咗兩個月，又有個客彈咗個contact畀我，有間公司請clerk + customer service，願意請傷殘人士，人工同埋福利都非常唔錯，最重要係個office好近Chris居住嘅地方，簡單啲講我哋正常人行10分鐘已經到，車都唔使搭，一條直路，淨係呢個條件已經冇理由唔去見啦！
歡天喜地同Chris講有呢個機會，起初佢都係拒絕，但我覆述返以上各項優勢，特別係地點好便利，當你唔需要搭車，唔需要坐地鐵，唔需要麻煩任何人幫手都可以一條直路返到公司，真係唔做都應該去見下啦。
我：「雖然你鍾意留喺屋企，不過你有咗呢份收入，咁就可以財務自由，又唔需要擔心屋企人有太大負擔，起碼你自給自足，仲有多餘錢用，咁樣唔係好好咩？你叫我再搵過一份工畀你未必太難，但要搵到咁近咁就腳就可遇不可求喇。」
話晒都係公司其中一個最好數嘅headhunt，憑住我嘅三寸不爛之舌，終於叫得郁Chris去見呢份工，最擔心嘅第一關－－－有冇去interview，結果好好彩係有去，而我今次亦都用咗啲技巧，就係特登約晏晝after lunch嘅時間。
如果candidate晏晝先去見工，我仲可以趁食lunch打去噓寒問暖，例如問下對方食咗飯未，又或者同對方複習一次interview要注意嘅事項，再順勢幫佢減壓，但如果約晨早9點interview，咁我8點幾打畀candidate就唔多恰當喇，仲減低咗唔知醒冇去見工嘅機會率。
順利完成Interview之後，嗰間公司個老闆Derek話好鍾意阿Chris，呢個反應都令我有啲喜出望外。
Derek老闆：「你介紹個Chris英文好好喎，我哋英文嗰條customer service hotline好難搵人，Chris可以兼任晒中英兩條線，咁我喺人工方面可以再加多啲添！」
我：「係呀，因為Chris以前喺加拿大讀書，前後喺溫哥華都住咗5年㗎喇！」
Derek老闆：「我知，原來佢係我師弟，大家都係讀Simon Fraser，我早佢10年畢業啦，頭先同佢傾得好開心，雖然大家去溫哥華個年代唔同，不過都有唔少相似嘅回憶，我想請Chris呀，人工方面加多$2500，你問下佢有冇興趣？如果有，睇下佢可唔可以下星期一返工吖，多謝你介紹個咁好嘅candidate畀我。」
我：「言重喇Derek，應該係調返轉，我要多謝你先啱，又畀機會我，又畀機會阿Chris，我打去同佢傾下吖。」
Derek老闆：「傻啦，我知你呢次介紹係唔經headhunt公司又唔收佣金，你做嘢都幾有熱誠，其實我公司仲有其他position有budget用headhunt㗎，另外我老婆都係做HR，佢公司都周不時要搵headhunt請人，介紹你畀佢識吖，另外呢，我公司可以用headhunt嗰個position，過兩日畀埋資料你。」
我：「多謝老闆！唔止請咗Chris，仲有生意彈過嚟，我一定會畀心機做㗎，希望之後可以幫你同埋你太太公司請到人。」
做Headhunt就係咁㗎喇，同Sales一樣，做得好有交帶自然有口碑，有口碑就自然有referral，生意同埋錢就係咁樣嚟，否則你死守住一堆舊客只會原地踏步，不過真心講句，其實我冇諗過義務幫Chris搵工可以換嚟新客，開始嘅時候純粹出於同Owen嘅交情。
好喇，又嚟到最關鍵嗰部分，就係氹Chris返工，我氹自己條女都冇咁有耐性，不如你估下Chris最後有冇take呢個offer吖。(未完待續）