終於過咗試用期，阿姐畀封通知信我嗰陣講咗段感言：「Vincent，提早兩個禮拜畀你過Probation，畀心機做喇，見你表現唔錯都好開心，你知唔知最初我唔係打算請你㗎，好在你自己爭氣。」
我並冇愕然，反而係我嘅對答令阿姐打咗個突：「我知呀，你哋一開頭係咪搞錯咗人，不過點都好，多謝你畀機會我，其實我喺度做得好開心，同事對我都好好。」阿姐聽完之後隨即反問：「你點知搞錯人？點解咁講？」
嚴格嚟講應該唔係我阿姐搞錯，係嗰位HR小妹妹搞錯先真，我嘗試將成件事嘅始末講返出嚟畀阿姐聽。
我：「Judy打畀我confirm offer嘅時候已經怪怪地，佢一開頭問我係咪李生，咁我真係姓李吖嘛，然後佢就話公司決定請我，呢下有啲意外，印象中我interview表現唔係好好。」
阿姐：「係吖！其實你in嗰日真係麻麻地，一來我估你緊張，二來你講返之前嘅工作經驗好似唔係幾solid，有啲嘢講唔到point。」
我：「我自己都知，可能嗰排見工已經見到冇晒信心，你睇我CV都知失業咗5個月，半年都嚟緊，偏偏Judy打電話confirm offer嗰陣，問我拎唔拎得切而家份工嘅reference letter？我心諗講咩呀？失業5個月喇喎，咩而家份工？何況我當日嚟interview係見Judy先再見你，佢咪睇過我啲cert同reference letter囉！仲記得Judy係一路對啲cert同reference letter，一路喺我份CV上面逐格剔，佢明明睇過係有，點會咁問呢？」
阿姐：「因為我哋公司唔會立亂影印求職者嘅身份證、畢業證書，同埋工作證明，除非係請咗，咁就會返工第一日先拎去copy，第一次in淨係由HR望一望，喺你CV上面剔即係代表望咗。」
我：「我又冇理由咁寸，走去challenge佢話『上次咪畀你睇過囉！』咁㗎嘛！Judy字面嘅意思係未睇過，但HR每日見咁多人，或者佢只係想講記得返工第一日帶齊啲cert同reference letter呢！」
阿姐：「講起Judy我都嬲嬲地，佢知我係想請另一個，已經特登入落個黃色file，你份CV係冇入file，我講得好清楚，本身想請嗰個都係姓李。」
我：「站於我嘅立場，都要當你請咗我㗎啦，嗰陣又唔肯定係咪自己多心呢，後來正式返工見到你就100%知道搞錯。」
我當日嚟到同receptionist講自己係新同事，第一日返工，receptionist安排咗我入房坐一坐先，然後阿姐入到嚟望住我呆咗。
阿姐：「你記唔記得我入完房之後就出返去？」
我：「記得，跟住Judy同你再一齊入嚟，你兩個一句說話都冇講，但就拎住一份相信係我CV嘅物體眉來眼去，基本上已經肯定你哋打錯畀求職者，其實你可以同我講搞錯，叫我走都要走㗎啦！」
阿姐：「你唔覺得奇怪㗎咩？你冇嘢做，我哋都叫你一個月後先返呢度，因為嗰位姓李嘅求職者講過，如果請佢就點都要一個月通知，換言之當我發現擺烏龍已經係一個月後，你足足等咗成個月，加上係我哋出錯……算啦，咪試下你囉！Ok嘅，都冇令我失望。」
其實Judy係幾唔專業，雖然我唔係HR，唔熟悉請人嘅正式流程，但係Line Manager揀完再落order，HR應該要re-confirm一下，甚至係有啲文件或者email去跟進，好明顯Judy係冇做到。
亦唔排除我阿姐當時個指令講得唔清唔楚，佢知道擺咗烏龍又婦人之仁，如果唔係另一位姓李嘅求職者要一個月通知，佢哋早啲發現個問題就會即刻更正，例如出返一日人工打發我走，但當時等咗成個月，相信Judy同阿姐嘅心態係「唔想麻煩」，甚至驚我「製造麻煩」。
至於嗰位李生，真係想同佢講聲唔好意思，不過聽得出佢係有工返緊，當個天可憐我囉，失業咗好耐喇，畀我符碌一次啦！
以前成日講笑：「最衰我老豆唔係姓李（李嘉誠）！」估唔到今次竟然會覺得好在我老豆姓李，其實我連中文名都普通，李偉文，英文名Vincent，一個招牌壓落嚟應該中好多個，原來普通都有普通嘅好處。
暫時我做得好開心呀，出面市道又一般般，好在符碌有份工咋，否則我隨時仲失緊業。（完）
新公司reference check 前上司打嚟傾住填
https://hkofficedaily.com/?p=18419