上司：「搞咩呀？你想轉工咩？搵工都唔好send去總公司吖，頭先head office人事部打嚟，佢哋話收到我下屬份CV，問我發生咩事。」差唔多食lunch嘅時候，上司叫咗我入房講呢件事，語氣明顯係埋怨緊我。
我聽到之後梗係嬲啦，但並唔震驚，所以就答佢：「唉，又係咁，我冇諗過轉工，都冇send過CV去總公司，你當我傻㗎咩，我畀人整蠱呀！有人將我份CV周圍send出去，今年已經第7次喇！」
雖然上司畀head office問到口啞啞，面色有啲難睇，不過佢係信我嘅，話晒我都喺呢間公司做咗接近5年，會唔會咁白痴連總公司都認唔到呀？
上司：「邊個咁無聊周圍send你份CV出去呀？佢幫你搵工呀？係咪你老婆想你轉工呀？」
我：「唔係我老婆啦，呢單嘢佢都知，其實上年開始已經係咁，淨係計2023年都第7次，我都幾肯定自己得罪咗人，只係唔知邊個，試過去差館想備案，冇人理我。」
亂咁將我份CV周圍send嘅情況喺2022年已經發生，當時有間不知名公司打嚟約我interview，對方第一句就問：「Hello Michael，收到你份CV喇，想問下你而家份工係咪仲做緊？如果arrange聽日晏晝見工有冇問題？」
我當時聽到一頭霧水，又唔係搵緊工，又冇send過任何CV同resume出去，突然有人叫得出我英文名仲想約interview？究竟發生緊咩事？結果我同對方確認自己冇應徵就匆匆收線，相信嗰位HR都覺得好奇怪。
初初我都有諗過係咪咩新型騙案，但又唔似，因為打親嚟都係正經公司，有個別一兩間仲幾出名添，打嚟嘅人亦冇叫我入錢，而最麻煩係我份CV仲畀人send咗去獵頭公司，呢下就真係騷擾到我喇。
記得有個headhunter打嚟係咁講：「Michael Li？我叫William，收到你份CV喇……」
我：「等等，你叫William？Sorry，我想澄清返先，我冇send過CV畀你哋。」
Headhunter：「冇？你apply Marketing Manager喎！我今朝收到㗎喎！Michael Li吖嘛，電話係94465……」
我：「我係Michael Li，電話都冇錯，我意思係有人拎咗我份CV四圍send，應該係畀人玩，你delete咗我啲資料啦！」
Headhunter：「咁都得？好搞笑喎，我真係未聽過，會唔會係天意呀？你嘅experience好適合呢份工，你聽咗先啦！」
我：「好搞笑咩？我完全唔覺得搞笑，總之我真係冇打算轉工，麻煩你delete咗我啲資料啦，唔該晒！」
後來呢位叫William嘅Headhunter應該冇做，更加冇delete我嘅資料，因為過咗幾個月我又收到呢間獵頭公司另一位headhunter嘅電話，今次係女仔，對方話喺database搵到我CV，覺得有份工好啱我……
2023年年頭，呢間獵頭公司又有第三個人打嚟，重複返差唔多嘅對白，搞我嗰條友send去獵頭公司真係好毒。
因為打嚟叫我見工嘅電話真係太多，我曾經同個別一兩個打嚟嘅HR講，可唔可以畀個sender嘅email address我，因為你send我份CV出去都要經電郵㗎嘛，但係冇人理我，或者覺得冇義務幫我「緝凶」啦，佢哋淨係提議報警。
好啦！咁我嘗試去差館備案，當值個警察仲好笑，佢問係咪啲親戚朋友想我轉份好工，又話周圍send CV冇令我招致金錢損失，嗌我睇多一排先喎，仲叫我諗下係咪得罪咗咩人先會出現呢啲惡作劇，大佬呀！我知就唔使嚟備案啦！
本身都諗住唔理，因為都理唔到，點知惡作劇條友而家send我份CV去總公司，明玩嘢，但我又唔知點做，呢啲究竟算唔算刑事？係咪屬於商業罪案？定係要求助私隱專員公署？坦白講，老婆都冇我份CV，有得我CV嘅人，照道理係我send過去嘅公司，不過我都好耐冇搵工喇，我都想知係咩人咁無聊！（完）
咁多人打畀樓主約見工，某程度上反映佢份CV好掂，然後我就諗起以下呢個連載。
見工達人（上）自製CV任佢噏
https://hkofficedaily.com/?p=21103
見工達人（下）見工必請可惜做唔
https://hkofficedaily.com/?p=21117