夏天嚟到，街上多咗曱甴，星期日同男友陪屋企人出去飲茶，沿路就有一隻，跟住我男友成個彈起再退後，一腳踩咗落我阿爸度，兩老冇嬲，反而喺度笑，我阿媽仲話：「男人咁驚曱甴？第日你哋屋企有曱甴點算？」
我慣咗㗎喇，平時同男朋友出街佢都係咁，有次佢屋企有四腳蛇，夠膽死打電話叫我過去捉，佢認真㗎，唔係講笑搞gag，發現廚房有四腳蛇之後，佢足足一個星期唔敢入廚房。
我：「其實四腳蛇係益蟲，屋企有佢會少啲蚊。」
男友：「理得佢吖，嚇親我就唔得。」
除咗驚曱甴同埋驚四腳蛇，男人老狗仲會驚鬼，有次睇鬼片佢嚇到個人彈起咁滯，隻腳不由自主猛力踢向前面張凳，搞到前面嗰pair情侶擰過嚟睥住，睇完戲當晚仲話急尿都唔敢去廁所……
順帶一提吖，佢連機動遊戲都驚㗎，去親樂園都唔玩，有次同我阿爸阿媽跟團，其中一個景點就係機動樂園，我阿爸不嬲大膽就唔好比較，阿媽就怕一啲會反轉嘅遊戲，例如過山車，但佢可以接受海盜船，因為唔使反轉吖嘛，而我男友就連香港迪士尼嗰個玩具兵團跳降傘都玩唔掂，所以跟團嗰次，佢全程企喺外圍睇我哋玩。
有人問過我兩條問題，第一條係：「你男朋友有冇嘢係唔驚㗎？好似你保護佢多啲喎！」
首先我男友的確係有嘢唔驚，佢唔驚我，每次我鬧佢同埋警告佢嘅時候，佢真係完全冇反應。
另一條問題係：「佢乜都驚，見曱甴可以彈起，有四腳蛇唔敢入廚房，睇鬼片唔敢去廁所，你有冇考慮過搵一啲Man嘅男仔？」
咁我又冇，佢成日陪我屋企人飲茶，雖然唔小心踩咗阿爸一腳，但真係好肯花時間陪老人家，你見佢肯為咗帶兩老去旅行而跟團就知啦，佢真係好錫我家人，家庭觀念亦好重，每個人都有優點同缺點，我會取笑佢細膽，但都識得欣賞佢好嘅地方，兩個人一齊係咁㗎喇，一世人流流長，唔可以無限放大對方嘅不足之處，而忘記咗對方嘅好。
最多我操fit啲，保護返呢條廢柴囉！
===
如果男朋友好鍾意9up呢？你又鍾唔鍾意🤣
《男友9up辣著女友》
https://hkofficedaily.com/?p=14780