利申，唔係利物浦球迷。
坦白講，利物浦首回合輸0:3，次回合仲要殘陣，完全唔睇好佢哋可以起死回生。
最後結果係，利物浦創造咗一幕奇蹟，殘陣之下反勝有球王美斯嘅巴塞隆拿4:0，兩回合總計贏4:3殺入歐聯決賽，真心佩服，預咗利迷今日大洗版，抵你哋威。
如果你嘅人生輸緊0:3，全世界睇死你唔掂，加上條件比之前更差，希望你唔好放棄，就算奇蹟並非經常出現，最緊要都係力戰到底，做人一樣有首回合同埋次回合，只要未吹雞完場，仍然可以上演驚天大逆轉。
