瞞住老婆買電單車 同事唔覺意爆大鑊

其實我好鍾意電單車,拍拖嘅時候已經知道老婆好抗拒,不過當時都係偷偷地走去學,東窗事發之後當然俾佢鬧餐懵啦!老婆成日同我講:「你揸私家車,就算係鐵包人都有危險啦,更何況揸電單車係人包鐵。」所以我考到牌之後係冇買車。

後來我轉工嚟咗而家呢間公司,識咗兩個同事都係揸電單車,每晚放工睇住佢好瀟灑咁揚長而去,你話唔羨慕就假喇,公司樓下有條巷仔仲要任泊唔嬲,次次見到成排電單車喺度都忍唔住望多兩眼。

成日同嗰兩位同事交流,講講下忍唔住做「壞事」---偷偷地買咗部,咁點收埋呢?情況就真係有啲坎坷,返工我當然泊喺公司樓下啦,不過放工就要泊喺屋企兩條街以外,老老實實,真金白銀買部電單車返嚟,除咗要型要爽要快感,重點都係追求方便,如果每朝出門口要行兩條街攞車,放工又要行兩條街先返到屋企,基本上已經失去揸電單車嘅意義。

一直心大心細想同老婆坦白,不過冇辦法鼓起勇氣,後來我終於知道咩係天網恢恢,疏而不漏,有次喺公司打畀老婆傾偈嗰陣,有個落完街煲煙嘅同事衝埋嚟同我講:「Cyrus,有兩條茂利係咁掂你部電單車喎,有個仲坐咗上去,你使唔使落去睇睇呀!」

真係冇預計同事會走埋嚟講呢啲,想cut線都cut唔切,我老婆已經即刻喺電話入面問:「咩你部電單車?你買咗電單車呀?」

呢劑真係杰撻撻,就咁講電單車都冇乜嘢,問題係講之前清楚叫咗聲Cyrus,我明白同事係出於好心,不過今次真係百辭莫辯,反正都想搵機會坦白,唯有將錯就錯認咗佢啦!

仲記得發生呢件事嘅時候係晏晝三點幾,因為啱啱嗌完下午茶,然後老婆嬲到癲咗,放工返屋企一定有排受,嗰幾個鐘嘅感覺喚起我求學時期回憶,就好似喺學校收到張唔合格嘅成績表,一路擔心放學返屋企會比阿媽家法侍候,四個字形容:如坐針氈。

夜晚返到去老婆一直唔肯同我講嘢,佢仲執嘢走話要返外家,搞搞下我自己都發脾氣,講到底都係買電單車啫,又唔係包二奶玩女人,使唔使咁呀?

嘈多兩嘈老婆一時火遮眼話要離婚,呢條係我嘅底線,無論幾嬲都好,冇理由攞離婚呢樣嘢嚟講,真係好傷感情㗎!

冷戰咗兩三日,我再鄭重同佢道歉,雙方冷靜咗落嚟之後老婆講咗件真人真事畀我聽,原來未識佢之前,我老婆有個好好好好嘅女性朋友,由細識到大嗰種,當年佢呢個 best friend啱啱畢業搵到份新工,人生第一份工,同年又識咗個考完電單車牌冇幾耐嘅男朋友。

老婆個best friend第一日返工,個男朋友特登揸電單車去送佢,點知中途發生意外,電單車炒咗,老婆best friend失去平衡跌落地再碌過隔籬線,比部貨車輾過,送院後證實死亡,但係best friend個男朋友只係輕傷……

因為我老婆同個best friend嘅家姐都好熟,知道件事之後都有趕去醫院,老婆話直至而家仲好記得best friend嘅屋企人喊得好淒涼,係咁叫個男仔賠返個女畀佢哋。

老婆仲話best friend出事之後,緊接嗰一兩年佢覺得自己有抑鬱,用咗一段時間先至走出陰影,但每逢聽到電單車啲響喉聲或者睇到交通意外新聞都會有種恐懼,佢一直冇同我講係因為回憶太恐怖,唔想再提起,而唔畀我揸電單車係體會到自己作為朋友都咁痛苦,best friend屋企人肯定難受一萬倍,所以唔想我有事。

我唔識佢best friend但聽完好難過,第二日我想賣咗架電單車唔再揸,不過老婆話唔買都買咗,唔想將自己嘅陰影夾硬套落我身上,佢唔會坐,只要我承諾小心啲揸就得,起碼安全抵達目的地之後要講聲佢知。

其實兩夫妻最緊要互相尊重同體諒,而家雖然有繼續揸電單車,但密度減低咗,因為唔想老婆咁擔心,各位揸電單車嘅朋友都一樣啦,路面狀況有時唔係你一個守規矩就冇事,馬路上仲有其他盲毛,冇嘢緊要得過自己條命,雖然話生死有命,搭車做乘客一樣會有意外,不過好似我老婆best friend嗰啲事實在太恐怖喇,我相信個男仔都會內疚一世。

===

你今日睇咗過來人未呀?好多朋友都寫咗最真實嘅分享,絕對值得參考,如果你都有工作評價同埋見工體驗,記得唔好吝嗇,留返個言同大家一齊share啦!
https://hkofficedaily.com/job-review-list/

error: