思前想後，覺得兩個人應該坦白，唔係指Gladys捐10萬畀同事冇向我坦白，因為捐幾多係個人自由，加上籌錢嗰陣我哋的確未拍拖，所以我係指自己對佢有疑問應該坦白，唔明問到明。
不過問Gladys嘅時候，佢似乎唔係好明我背後嘅意思，所以淨係答：「係呀，咁佢真係有急切需要，幫得就幫啦，鏢靶藥真係好貴㗎！」
其實我唔係想知你點解捐10萬，而係想知點解你捐十萬可以面不改容咁輕鬆。
Gladys住馬鞍山，我住天水圍，所以平日出街好難接送，今次食飯終於知佢屋企喺聽濤雅苑，總之比起我住緊嘅公屋係兩個檔次啦，客飯廳相連直望就係無敵大海景，兩公婆加一粒女但有3間房，原來其中一間係Gladys嘅書房，我諗起自己連房都冇間，床就係書枱，成間公屋嘅面積只係大過佢客飯廳少少。
我開始明白點解Gladys人品咁好，因為佢Daddy Mommy都好好人，呢啲應該係遺傳基因同身教。無論係嗰晚第一次見面，定係之後再飲咗幾餐茶，我都覺得Gladys父母好Nice，唔係扮出嚟，係從個心發出嚟，而其實以Gladys嘅條件可以搵個比我好十倍嘅男朋友。
仲有，我見到Gladys父母都戴咗隻鑽勞，以前我冇咁留意啲人係咪戴勞力士，但自從畀老細潛移默化之後，不知不覺留意多咗。
有鑽石嘅勞力士好威咩？一啲都唔威囉！因為後來我仲知道Gladys嘅Daddy總共有三個聽濤雅苑嘅單位，其中兩個放咗租出去……呢啲就真係龍咁威喇。
我：「你Daddy又會買三個聽濤雅苑單位咁多嘅。」
Gladys：「Daddy話係情意結，因為我由細到大都住馬鞍山，Daddy細細個就住沙田乙明邨，Mommy就住大圍新翠邨，佢哋對沙田同馬鞍山呢邊啲樓係情有獨鍾。」
同點解捐10萬單嘢一樣，其實我唔係想知你Daddy點解買三個聽濤雅苑嘅單位，潛台詞係問點解你Daddy可以買到三個聽濤雅苑嘅單位呀！我後來留意過，聽濤雅苑絕對唔平，三房單位更加過千萬，雖然知道佢Daddy做生意，不過普通人買一層幾百呎私樓都要供一世，點樣可以買到三層咁靚嘅樓㗎？
Gladys：「其實Daddy仲講過……如果我哋結婚，佢就同其中一個單位嘅租戶停止租約，留畀我哋之後住，又話留間3房畀我哋，Mommy想抱孫喎，傻㗎佢哋，我都冇話嫁畀你。」
我：「Uncle太客氣喇，我仲以為佢唔鍾意我。」
Gladys：「佢話你份人老實呀！」
兩年後，Gladys唔再係我女朋友……
因為佢做咗我老婆。
Uncle講啱咗一半，我真係老實，不過係老實不客氣，另一間聽濤雅苑三房望海，建築面積1,300呎，實用面積大約1,000呎嘅單位，我以女婿嘅身份接收咗喇。
呢次婚事反對得最犀利嘅係我老豆老母，因為佢哋覺得竹門應該對竹門，如果老婆嗰邊咁有錢會令到我自卑，兩老甚至諗埋啲好細節嘅位，例如未來襯家會唔會餐餐鮑參翅肚，未來新抱會唔會買樣樣嘢都要名牌，而要咗層樓又會唔會叫我入贅等等。
直至結婚前我哋先至叫雙方家長出嚟同枱食飯，我老豆好緊張呀，第一次見佢用髮蠟，不過嗰餐飯食得好開心，老母返到屋企仲話：「襯家要求5萬蚊禮金會唔會太少呀？不如畀8萬啦！酒席你再畀多啲佢哋，阿媽都有少少私己錢㗎！」
我：「放心啦，佢Daddy本來叫我象徵式畀1萬咋，夠㗎喇，你哋唔使出。」
老母：「咁對龍鳳鈪我買粗啲貴啲吖！」
一直以嚟我都唔會妄自菲薄，我一開始鍾意Gladys唔係因為佢屋企有錢，而且勞力士又好，名車又好，無敵海景單位都好，坦白講我有又得冇又得，只係Gladys嘅Daddy要畀層聽濤雅苑我哋住，咁點解唔要呢？我唔係貪，只係想個老婆維持返現有生活水平同環境，我冇可能等到自己有錢過外父先娶人個女，睇你個page之前一個故事講過：「人生唔似煮飯，冇可能等到萬事俱備先落鑊」。
無論Gladys嘅背景係點，我都係咁愛佢，而佢亦唔介意另一半係公屋仔出身，我嘅首要任務係對佢好，而唔係不切實際去諗超越佢Daddy嘅身家，一個男人腰纏萬貫唔代表會錫老婆，所以冇話高唔高攀得起呢個問題，全心全意愛錫你嘅另一半就係最好嘅回報。
凡事兩面睇，Gladys嘅家境反而係我工作嘅動力，婚後我開咗間IT公司，副業幫人寫網站寫程式，客源穩定之後就quit咗正職去做呢壇生意，當然都有唔順利同埋心灰意冷嘅時候啦，例如曾經有個客搵我做嘢，記得佢係咁樣講：「我哋有8萬蚊budget，想寫個同淘寶一樣嘅website，你照抄就得，轉一轉啲色。」
呢啲咁奧妙嘅客係冰山一角咋，仲有好多㗎！
又有一次幫客寫咗個app，online store嚟嘅，然後喺app store評分有人咁樣閙：「垃圾app！入面啲嘢樣樣都要錢！」
大佬呀，online store嚟㗎，買嘢梗係要錢啦，download咗個app就免費咩！咪咁痴線啦！
創業路最初並唔平坦，仲幾難行，不過人生同做生意一樣，最緊要身邊嗰個人陪你風雨同路，甜酸苦辣一齊面對，慢慢地，我自己呢間IT公司都愈run愈順，縱使唔會搵到外父咁多錢，但除咗有層免費樓住之外，我從來冇用過外父嘅一分一毫，而家一樣養得起老婆，唔會餓親，唔使求人，咁已經好夠啦！
所以最近個朋友叫我買勞力士當投資保值，我話已經有一隻喇，之前老婆大人生日，我送咗隻畀佢，同時買多隻畀自己，人生終於擁有第一隻勞力士，但我唔會不斷買嚟投資，「勞力士無止境」，邊追到咁多款，又邊預測到邊一款將來爆升吖，我反而想提醒自己「勞力是無止境」，繼續努力工作，唔好畀老婆仔女捱窮，呢個先係我嘅人生目標。
（完）
＝＝＝＝＝
《過來人》係辦公室日報嘅新功能，你可以喺度留低工作評論同埋見工經驗，以過來人身份去幫其他搵工嘅人，同埋《過來人》每日都有好多新嘢睇㗎！你今日睇咗啲最新評論未呀？
👉 https://hkofficedaily.com/job-review-list/