較早前約咗一位50歲嘅男士上嚟interview，佢對份工好有興趣，我對佢都好有信心，不過自己今次好大意，約上嚟之前唔記得問佢住邊，份CV亦冇寫。
「係喎，呢間公司喺九龍灣，你住邊區？」
「我住屯門。」
「如果請咗你，驚唔驚車程太遠？」
「唔驚，再遠啲嘅工都返過。」
其實咁樣問對方，係因為返工地點絕對係求職嘅考慮因素之一，office工可以朝9晚6唔OT已經難得，但一個唔覺意搵咗間超長距離嘅公司，返工放工加埋要額外用多幾粒鐘，毫無疑問係一種折磨，更何況我仲遇過住灣仔返太古都嫌遠嘅例子，所以呢把尺人人唔同，我登稿時有list埋location係九龍灣，冇諗過對方住屯門都照apply同埋唔介意。
我面前呢位叔叔話，對上一份工其實每星期都要返佛山，後來公司裁員，搵咗好耐都搵唔到嘢做，最迷失嘅時候拎咗全部積蓄同人夾份搞生意，結果蝕埋。意志消沉咗一排，終於重新振作，走去上一個保安牌兩日課程，若然再搵唔到工，大不了就去做實Q。
「一個人去到咁上下年紀，見工已經好難有人請，好多公司雖然冇寫出嚟，但個心始終有年齡歧視，搵工已經難，仲要搞生意損手，有段時間真係日日捱麵包，貴啲都唔敢食，係揀啲$2.5、$3嘅平價包，所以你問我屯門返九龍灣怕唔怕遠，我怕冇飯開多啲。」
臨走時喺門口循例握個手，叔叔好真誠咁同我講多句：「其實世界咁大，走遠啲又有咩所謂，屯門去九龍灣我ok，希望你個客唔好介意，畀個機會我。」
結果我大大力推介叔叔畀個客，對方真係驚佢住得遠，我照住講：「其實世界咁大，走遠啲又有咩所謂。」最後叔叔有得去in，保安牌亦未用得住先，祝福佢嘅事業可以再走得更遠。