一份工做兩年，對有啲人嚟講好長，對有啲人嚟講好短，情況因人而異，不過要三個同事一齊做夠兩年，諗諗下又真係冇乜保證，講緊嘅當然係我、Julie，同埋Fiona啦！
當我同Fiona因為帶男仔返屋企過夜嘅問題發生磨擦之後，其實好需要一個和事佬喺中間協調，偏偏Julie冇擔當呢個角色不特止，佢仲喺呢個時候提出退租，原因係搵到另一份新工，如果繼續住將軍澳好唔方便。
我個人嘅睇法係，新工 = 前途 = 錢途，呢樣嘢遠遠凌駕於分擔租金嘅利益問題，所以我嘅態度係成人之美，不過都希望Julie有個緩衝期畀大家，搬返屋企又好，再搵地方都好，始終需要時間，不幸中之大幸係租約一年生一年死，我哋有條件同業主講提早幾個月搬走，因為當時已經住咗喺呢度超過一年。
Fiona就持相反意見，強烈要求Julie履行埋餘下嘅租約，一來佢唔想自己大失預算，三個人夾租變咗兩個人夾，負擔大好多，加上住咗成年大單位，如果搵個細嘅甚至係劏房就有好大落差；二來Fiona同家人關係麻麻，現實唔容許佢搬返屋企住。
一件事還一件事，雖然頻繁地帶不同男人返嚟過夜令我好嬲，但係Fiona的確為呢個合租單位付出好多，佢經常主動做家務，例如掃地抹地洗衫，有時我想幫手都慢一步，Fiona太有效率。
Julie決定要搬走但又被Fiona阻撓之後，佢兩個亦開始交惡，Julie唔知係有心定無意，會講啲好過份嘅說話，其中一次Fiona掃完地抹完地，Julie講咗句咁嘅嘢：「廁所呢？橫掂你都洗開嘢啦，點解唔洗埋個廁所呀？」
結果點？咪宇宙大爆炸囉，兩條女鬧交鬧到粗口橫飛，更激嘅係，Julie喺last day當日請假，原來趁我哋返工嘅時候搬嘢走，一句bye bye都冇講，當時大家都未有共識係咪退租定點樣，仲記得同Fiona放工返到屋企見到Julie間房空空如也，連床褥都搬走埋。
邊個啱邊個唔着都好，彼此係同事，亦一齊住咗一年有多，點解要無聲無息走咗去呢？直至2021年嘅今日，我都冇再見過Julie喇，佢當時連電話都改埋，曾經日對夜對嘅同事、朋友、同屋住，突然消失得無影無蹤，彷彿呢段友誼從未存在過一樣。
留低我同Fiona亦唔好得幾多，由於我曾經講過前途要緊，唔會阻止Julie退租，只係想大家有商有量set個緩衝期，所以Fiona指責我企喺Julie嗰邊，其實根本唔係咁。當時受制於環境，我同Fiona唯有住埋租約剩低嘅幾個月，因為我體諒佢冇咁快搵到地方搬，不過關係決裂咗真係好難修補，兩個人喺屋企完全唔講嘢，例必各自匿喺房，返到公司都好似陌路人一樣。
更令我難受嘅係，Fiona連洗杯洗碗都開始分得好清楚，鋅盤得兩隻碗，佢都只會洗自己嗰隻，留低另一隻喺度唔郁，咁我仲可以點呢？有時我買飯問佢食唔食，佢又話唔食，然後自己買自己嘅外賣，雙方嘅關係仲疏離過旅行住民宿同唔識嘅人共處一室，最後嗰幾個月簡直度日如年。
最終租約到期，大家正式撤離呢個將軍澳之家，我返自己屋企住，聽講Fiona就同個做金融嘅男仔同居，我都係從其他同事口中聽返嚟。
後來我轉工，冇再同Fiona聯絡，估唔到相隔咁多年後會喺荃灣福來邨撞返。
Fiona個仔真係好可愛，我喺度諗，當時如果唔係大家喺度掃街（食街邊小食），拉低晒口罩冇得扮見唔到，究竟我哋會唔會相認呢？我深信之前大家對咗咁耐，就算口罩遮住半邊面都一定認到，問題係想唔想say hi啫。
短短幾分鐘，我哋冇提及任何當年嘅事，只係互相簡單問候，得悉各自結咗婚，就係咁多，雖然已經唔再熟絡，但總好過一齊住嘅後期搞到關係咁僵，或者呢啲就叫相見好同住難。
其實我仲記得三個女仔最friend嘅時候講過，將來結婚要搵對方做伴娘同姊妹，可惜呢個承諾最後冇兌現，不過唔緊要啦，而家過得好就得喇，相識一場唔需要記恨，希望Julie同Fiona生活安好。
（完）