喺荃灣福來邨掃街頭小食，等緊杯珍珠奶茶嘅時候，突然見到一個熟悉嘅面孔，佢係我舊同事Fiona，身邊仲有一個大約4至5歲左右嘅小朋友。
我：「好耐冇見。」
Fiona：「好耐冇見喇，你幾好嘛？」
我：「都係咁啦，過嚟呢頭行街？」
Fiona：「我搬咗嚟荃灣呀，住附近，子俊，叫姐姐吖！」小朋友好聽話，即刻叫咗我一聲姐姐。
我：「好得意喎你，雞蛋仔好唔好食呀？」個小朋友開始怕醜，匿咗喺Fiona後面，一路食雞蛋仔一路偷笑。
Fiona：「乖乜鬼吖，頭先扭完計嚟，呢個我個仔，有人喺度佢就扮晒嘢㗎喇。」
時間真係過得好快，原來Fiona已經做咗人媽媽，記得2013年嘅時候第一次搬出去住，當時Fiona就係我嘅Roommate，點解咁肯定係2013年？因為我嗰年畢業，亦係嗰年搵到人生第一份full time，公司喺將軍澳工業區，而我住喺屯門蝴蝶邨，返工真係迢長路遠。
Fiona唔好得幾多，嗰陣佢住元朗，仲有另一位女同事叫Julie，我哋三個女仔好friend好啱傾，基本上星期一至五都係一齊食Lunch，又成日放工去睇戲同Dinner，差啲數漏咗一件事，2013年我第一次食水煙，就係跟Fiona同Julie去Happy Hour嘅時候食，咳到我飛起，自此冇再食過。
記得嗰陣時有幾個同事都住喺將軍澳，唔知佢哋係特登搵呢一區嘅工作吖，抑或喺呢一區工作先至住將軍澳，總之我就好羨慕，返工咁近喎，年中慳好多時間，所以有一次我就同Fiona講：「唔知將軍澳有冇劏房呢？如果有就好喇，每日用咁多時間返工真係好辛苦。」
Fiona：「我最近都搵緊屋呀，想試下搬出嚟住，不如夾份租吖，一人一間房咪自製劏房囉！」
Julie：「係咪呀？預埋我吖，我都想試吓搬出黎住。」
我：「你好似住九龍灣咋喎，返將軍澳算好近，關你咩事呢？」
Julie：「雖然我唔似你哋咁住屯門同埋元朗，但我想搬出嚟住嘅目的係自由，唔使出夜街都同阿爸阿媽交代，預埋我啦，三個人一齊租，搵一間大啲貴啲都得，share之嘛！」
Fiona：「好喎！Sarah，你係咪講真先？」
忘記介紹自己，我叫Sarah，就係呢個隨便呻呻嘅開端，我就同咗兩位同事Fiona同Julie展開咗「同居生活」，喺將軍澳搵到個三房單位，其實都唔平㗎，真係要計嘅話，使費勁過同屋企人住蝴蝶邨好多好多，除咗每人要出幾千蚊租金之外，仲有燈油火蠟同埋三餐嘅使費，唯一慶幸係業主留低咗幾乎全屋電器，床架衣櫃乜都有齊，我哋只需要買新床褥同埋被鋪就住得，但正如Julie所講，搬出嚟住嘅最大目的都係自由自在無王管，後生有邊個唔想咁樣吖，就算份糧冇咗一大截都想換個人生初體驗。
其實我到而家都覺得嗰間屋有鬼，除咗成日有怪聲之外，又試過喺冇開窗（嗰陣開緊冷氣）嘅時候突然有房門大力嘭埋，總之我哋一致認為「有啲嘢」。
好記得有一次假期，我同Fiona各自出咗街，Julie打畀我哋講客廳盞燈無啦啦熄咗再開返，言之鑿鑿話聽到有人撳燈掣嘅聲，嚇到佢急call我哋兩個返嚟，而Julie自己就落樓下嘅餐廳坐，直頭唔敢一個人留喺屋企。
後來我將件事同咗阿媽講，我阿媽唔知喺邊度搵咗個師父去間屋度拜下拜下，又唔到你唔信邪，接落嚟嘅日子再冇怪聲同埋怪事出現，而我哋為咗壓驚，大部份時間都三位一體喺屋企玩，所以當時感情真係好好，已經超越同事成為推心置腹嘅朋友。
雖然呢間屋疑似發生過靈異事件，不過我哋三個女仔搬咗入嚟住之後，桃花運又真係勁旺，豬兜如我都竟然第一次拍拖，初戀呀，係初戀呀！Julie當時分咗手一年亦再有著落，而Fiona不嬲都係玩家，所以不能作準，但係佢啲仔都係一個接一個無縫接軌。
科學啲講，或者唔係呢間屋旺桃花，而係大家自由咗，逃離咗父母同埋長輩嘅「法眼」，出街唔使交代，去旅行唔使攞批准，煲電話粥又唔使畀家人眼望望同埋問長問短，識到男朋友嘅機會當然大增啦！
住咗接近一年，三個女仔各自同自己嘅另一半進入蜜月期，但係友情同埋Roommate之間嘅蜜月期就開始keep唔到，租屋嘅時候明明講過唔可以畀男人留宿，就算男朋友都唔可以，點知Julie第一個破戒，有次我同Fiona分別拍拖講咗夜少少返，Julie竟然偷偷地「匿藏」佢男朋友喺度瞓，注意，係偷偷地。
由於我係好醒瞓嘅人，大約清晨6點鐘，個天已經開始光嘅時候，我聽到開門同埋鐵閘聲，其實當時我並冇諗過Roommate帶仔返嚟，首先係諗：「唔係咁猛呀？又有怪聲？」繼而再諗：「唔通有賊入屋？」結果我衝出去睇，見到Julie著住睡衣閂門。
我：「咩事呀？」
Julie：「下，做乜醒咗嘅你？」
我：「我問你做咩開門呀？」
Julie：「我…送男朋友走，你哋噚晚夜返，我一個人驚吖嘛。」
我：「搞錯呀！講過唔畀男人喺我哋屋企過夜㗎喎！」
Julie：「有咩所謂啫，你又見佢唔到，而家都走咗啦！」
後來Fiona知道呢件事，雖然話咗Julie幾句，但佢最後都有樣學樣又帶男人返嚟，最大問題係Fiona啲男友好似走馬燈咁轉，一時帶個西裝友上嚟，一時又換畫拖件MK仔，我已經接近忍無可忍。
我嘅底線一次又一次拉低，佢兩個都開始肆無忌憚帶男朋友返屋企過夜，有時夜晚仲聽到搞嘢嘅呻吟聲，有一刻直情覺得個單位似爆房樂園，我最後嘅要求只係帶仔返嚟都算，但唔該上嚟之前講聲，因為全屋都係女人，平時喺屋企真係會唔戴bra四圍走，早啲知道有陌生男人上嚟梗係要著返正常衫啦，點知Fiona連剩餘落嚟唯一嘅規則都守唔到。
有一晚，我沖完涼淨係圍住條毛巾行出浴室，當時入面係真空，一出嚟竟然比我見到條麻甩佬，佢上下打量我全身嗰種猥瑣嘅眼神，直至今日我都仲記得好清楚，呢個時候Fiona先喺廚房施施然步出，再喝我著返件衫，我真係又嬲又狼狽，即刻入房著返衫就出客廳同佢開拖。
我：「點解會有麻甩佬？我冇著衫㗎！講過帶人上嚟要通知聲先，你係唔記得定係特登呀？」
Fiona：「平時你臨瞓先沖涼，點估到你咁早沖啫，你自己圍住條毛巾出嚟怪我？」
同佢上嚟屋企條仔冇四十都有三十七八，當時Fiona仲係廿幾歲妹妹仔，我真係唔知佢嘅感情世界可以亂到咩地步，總之當晚我哋兩個發生激烈爭吵，Fiona又拖咗條仔離開唔返嚟瞓，自此大家嘅感情就大不如前，有時喺屋企撞口撞面都唔講嘢唔打招呼，日子變得好難捱。
呢個時候Julie仲要添亂，佢話準備遞信辭職，所以唔想住將軍澳，要即刻退租……
（未完待續）