早排幫Sales Team請咗個新人，個男仔叫Jonathan，interview 表現好好，外型順眼，對答流暢，我同阿姐見完都覺得OK，跟住就幫佢安排直接見line manager，一take pass過關。
我哋呢間外資公司reference check好嚴謹，係新加坡嗰邊落order咁做，working experience會check上兩間公司，學歷方面除咗睇證書之外，都要睇埋張成績單，其實我阿姐都覺得麻煩，不過新加坡老闆要求亦唯有照跟。
Jonathan報稱上兩間公司都執咗，所以我哋係打唔到畀佢前僱主，至於大學畢業證書雖然show咗畀我哋睇，但已經同佢講咗要睇埋transcript，由於Jonathan見工嗰陣冇帶，佢個部門又趕住要人，結果就叫佢返工之後補返。
點知Jonathan答應完冇咗件事，咁我就follow up啦，Jonathan頭一日話唔記得，第二日又忘記，第三日就話搵唔到，咁我就同Jonathan講，公司會循例send個email去佢美國間大學查詢，當時佢仲話ok添。
間大學效率好快，隔咗一日已經回覆，佢哋話冇呢個學生，原因係1998年嘅時候，佢哋間大學根本未成立……我睇緊啲咩？
因為Jonathan嗰間唔係出名嘅大學，坦白講我都未見過呢個名，上網check的確存在，但就估唔到Jonathan證書上面個畢業年份，嗰間大學係未成立，當時我同阿姐都企咗喺度，懷疑就一定有㗎喇，不過都驚當中有嘢搞錯，冤枉好人就無謂，所以唔想咁快搵佢line manager傾，再一次叫Jonathan畀啲證明文件，會唔會係啲online course之類嘅distance learning呀？
Jonathan又一次話返屋企搵搵，點知隔日就冇返工喇，大約朝早11點幾，佢打返嚟同我哋人事部講辭職，原因係阿爸噚晚中風，而家喺醫院照顧緊屋企人，呢份工唔返喇。
辭職單嘢原來佢line manager係唔知，要我哋人事部轉達，行埋去Jonathan個department講嘅時候，坐line manager前面個同事聽到，擰咗過嚟搭咀：「唔好意思，前兩日食lunch，Jonathan先話佢父母喺美國㗎喎！」
Line manager：「喺美國唔可以中風㗎？」
佢前面個同事：「得，不過噚晚中風，邊有咁快飛到去美國睇屋企人呀？」
我阿姐本身都考慮緊好唔好講大學證書件事，但佢個line manager因為Jonathan做得好好地突然不辭而別，resign仲要搵人事部而唔係直接同佢講，所以有少少忟憎，淨係催促我哋快啲搵replacement，最後證書單嘢就冇提喇。
我哋公司仲有個規矩，如果新人返唔夠7日就走，嗰幾日嘅糧係唔會auto pay，只會開支票，所以我打畀Jonathan叫佢返嚟攞cheque，不過佢唔肯返，反問可唔可以郵寄。
我：「都得既，咁我跟返你application form個地址寄吖，沙田第一城係咪？同你對多次好冇？」
Jonathan：「唔好呀，我啱啱搬咗，早兩日冇住沙田喇，而家搬咗去天水圍，我畀個新地址你吖。」
真定假呀？啱啱搬咗？究竟係講大話會上癮，定係唔想同同事交心？不過唔交心係一回事，都冇理由地址又改，父母居住地又前後矛盾，大學畢業證書日期又同真實中有出入，我已經分唔到Jonathan邊句真邊句假喇。
最好笑係呢，有冇試過畀Facebook偷聽你講嘢？例如你同朋友傾開BB衫，其實部手提電話係接收緊，跟住你一開Facebook或者其他社交媒體嘅時候，就會見到好多BB衫嘅廣告。之前Jonathan畢業證書嗰件事，我除咗同阿姐傾過之外，仲用公司部電腦search過大學啲名，所以我而家個私人Facebook係不斷出現US 1.99 幫人訂做外國畢業證書嘅廣告post，睇真啲仲幾似Jonathan嗰張。