距離日本通關似乎又邁進一步喇，因為早兩日已經有當地傳媒放風，指當局擬開放短期商務客、留學生同埋技能實習生入境，商務客如果滿足到一定嘅要求，隔離期仲可以縮短到3日，所以近日已經見到有啲日語學校出post推緊留學講座，睇嚟「好事近」。
其實喺疫情期間，全球都有唔少店舖捱唔住結業，日本當然唔例外啦，而隨住10月25號東京都宣布取消緊急事態宣言之後，好多食店終於可以正常賣酒同埋回復原本嘅營業時間喇，所以市面亦已經熱鬧返好多，市民屈咗咁耐都好似脫苦海一樣，蜂湧出去飲飲食食，搞到食肆對人手方面嘅需求大大提升，由於飲食業界同一時間搶人，搞到要請侍應都唔容易。
六本木有間叫「肉汁水餃子」嘅舖頭亦遇到相同嘅煩惱，請極都唔夠人手，又預計從而家直至年尾會喺生意高峰期，於是就度咗條橋出嚟，叫做「幫手打工就0蚊任飲任食放題計劃」，希望吸引到多啲人嚟幫手。
簡單啲講，呢個計劃就係搵人做「義工侍應」，係完全冇糧出嘅，水餃店會為義工set個立飲立食專區（立飲立食即係冇座位，企喺度食，日本好多呢類食店，鋸扒都會立食），所有義工們可以自由嗌嘢食同埋斟啤酒，代價就係要負責執枱、落單、傳菜，仲有洗碗等等。
未講睇法之前，先講下反應，呢個招募計劃係11月開始，即係幾日之前，應徵嘅人數遠遠超越店主想像，最搞鬼係大多數義工都係呢間店嘅熟客仔，咁會唔會多咗侍應但又少咗啲客呢🤣，無論如何，人手不足嘅問題已經暫時解決咗。
由於呢單嘢廣受日本當地傳媒報道，所以當地網民都有唔少正反兩面嘅睇法同意見，正面嘅留言就有人話：「睇住個侍應隊完啤酒，行埋嚟同我落完單又走返去隊啤，覺得好過癮！」
「個侍應拎住兩碟餃子過嚟，一碟擺低畀我，另外一碟拎咗埋一邊食，搞到我都想做埋一份。」
至於負面嘅睇法就有：「見到個侍應飲到醉醉地，好懷疑佢做唔做到嘢。」
有啲就話：「佢一路食一路捧餐，有啲擔心衛生情況。」
另外有唔少日本人民就考慮到做壞規矩嘅問題，佢哋覺得此計劃一開先河，將會有更多食肆有樣學樣請任飲任食嘅義工，將來可能會湧現「0蚊打工」嘅熱潮，變相以物易物返咗去石器時代，做飲食業嘅人會更加難搵嘢做同埋生存。
相信有啲「義工侍應」都係just for fun，甚至係街坊街里，見無無聊聊咪去餃子店幫下手打發時間，順便飲幾杯免費啤酒，據聞好多日本男人放咗工都唔想咁早返屋企見到老婆（定係全世界都係咁😂🙈），而家有啲寄託，難怪會爭住去做啦！