痴女迷戀求職者 揚言人工多一萬

Hello我叫Matt,都係做headhunt,之前遇着個超級痴女,不過佢唔係睇中我,而係睇中一個candidate。

交代下個痴女嘅背景先,佢係我個客,身份係某新加坡集團嘅香港分公司HR,唔知佢真實年齡幾多歲,但憑我先後兩次上佢公司見真人,目測大約40中左右,我估around 45咁上下啦,總之佢就畀咗個position我哋幫手請人,我send咗3個candidate嘅CV過去,其中兩個有得去interview,兩個都係女仔。

當我嗰兩位candidate見完之後,循例當然要問下見成點,有冇機會second in或者直接出offer啦,呢個痴女HR同我講:「今日仲見咗個男仔,好靚仔㗎!外國留學返嚟嗰隻,講英文好好聽,最緊要都係個樣殺死人,我都畀佢電親呀!」

首先我自己都係一條仔,唔會有興趣知道佢睇中邊條仔,其次係我求財㗎啫,淨係想知我嗰兩位candidate有冇機會,係咁多。

我完全ignore咗痴女HR對個靚仔嘅讚美,單刀直入咁問:「你意思係今日上嚟嘅Stella同埋Joyce都冇機會?」(即係我嗰兩位candidate)

痴女HR:「我想請個靚仔囉!唔係話Stella同Joyce唔好,係呢個男仔太outstanding喇!」

冇問題,咁你自己匿埋發姣啦!我冇興趣知咁多,既然唔要我嗰兩位candidate,我就要再做下一隻job。

幾日之後,痴女HR打返畀我,佢話個靚仔turn down offer,咁我最關心就梗係Stella同Joyce係咪仲有機會啦?你想約佢兩個上嚟second in,定係想我再搵啲新嘅CV畀你?

點知痴女HR話:「我真係好想請嗰個靚仔,你幫我說服佢吖。」

我:「點說服呀?個靚仔唔係我啲candidate,我唔識佢㗎喎!」

痴女HR:「我教你點做,靚仔唔係經其他agency介紹,係自己send CV上嚟,因為我哋呢個position除咗搵headhunt幫手之外,自己都有出招聘廣告,我畀靚仔個LinkedIn你,你用headhunt身份喺LinkedIn接觸佢,問佢想唔想轉工,到時你開名話係我公司,佢一定又會turn down,呢個時候你同佢講,話可以爭取到最高33000人工,佢send CV嚟填個expected salary係23000㗎咋,而家我出多一萬,不過你試試由低叫到高先,唔好一嚟就話爭取到33000,試下27000、28000、30000咁上。」

我:「Sorry,唔好怪我直接問,咁如果用headhunt身份contact呢位靚仔,係咪當我介紹嚟?」

痴女HR:「梗係啦,唔會要你白做,因為公司唔知靚仔係自己send CV嚟定係headhunt介紹,得我一個睇之嘛,我咪當靚仔係你公司嘅candidate囉,總之佢肯入嚟我公司做就乜都得,佣我照計返,你用你嘅方法氹掂佢嚟啦!」

咁得啦!最緊要你講呢句,你要自慰,我都要自衛,一陣做咗咁多嘢原來冇佣收,我點同自己公司交代先,啱唔啱呀?

如是者我就去LinkedIn搵嗰個靚仔啦!佢張profile pic又真係幾煞食,難怪個痴女HR流晒水(我指口水),而且呢個靚仔又真係幾Nice同埋幾有禮貌,但係當我開門見山同佢講手上有隻job係XX公司之後,靚仔就即刻耍手擰頭,原來……

「呢間公司我上星期見咗(我梗係知啦),佢即時話請我,不過聽完啲細節之後,我覺得唔係好適合自己。」

我:「嗱,因為我都係同你LinkedIn溝通,未知你個expected salary想要幾多(我扮緊唔知佢叫價23000),不過我可以爭取到30000,呢個係好正嘅offer,你會唔會考慮下?相信你去見嗰陣應該唔會叫到30000咁高。」

「唔喇,唔好喇。」

我:「如果31000諗唔諗?」

「唔好喇。」

我:「33000呢?我保證拎到呢個價返嚟畀你。」

「其實呢,人工雖然重要,但我上完去interview之後,感覺真係麻麻,我想趁後生揀一間自己鍾意嘅公司。」(嘩,又handsome又學人講理想,我都濕呀,唔怪得痴女HR咁迷戀啦!)

我:「33000喎,如果我睇你LinkedIn嘅資歷,呢個已經相當於middle level咁上下嘅價,將來你再跳槽就差好遠。」

「講樣嘢畀你聽,不過你要保密。」

我:「冇問題,請講。」

「嗰日turn down咗offer之後,個HR連續幾晚打畀我,夜晚9點幾10點喎,佢係咁問我點解唔做?又問我平時有咩嗜好?問我做緊咩?問我係咪同女朋友去緊街?我覺得好冒犯同埋好恐怖,最後block埋佢個number,本身已經唔想做佢間公司,個HR仲要咁變態,所以我唔會做喇。」

明晒!原來痴女HR喺office hour以外煩咗人幾晚,又問埋啲私人問題,唔怪得咁好死畀埋LinkedIn我啦,搭晒雞棚畀錢我賺?人哋靚仔怕Q咗你呀!

後來我同返痴女HR講,但就冇出賣個靚仔,總之就話人哋真係唔鍾意佢間公司,個痴女HR好似哭喪咁,係咁問我仲有咩辦法,我都費事理佢,清醒啲啦!你四十幾,個靚仔得廿幾,你鍾意小鮮肉啫,小鮮肉唔鍾意你吖嘛!

=

可能$33,000仲係太少,會唔會好似呢個舊post咁,出5萬蚊包起人呢?
《26歲,文員,5萬蚊糧》
https://hkofficedaily.com/?p=7407

error: