未睇第一集嘅朋友，可以去以下呢條link 👇
《燈神 1》同事拎$500買對家 一星期內贏$9000
https://hkofficedaily.com/?p=16986
＝＝＝＝＝
阿恆：「嗰陣老婆部電話壞咗，我想買過部畀佢，仲有佢鍾意食嘅日本餐廳，我到而家仲記得係邊間，不過冇機會帶佢去食喇，對唔住呀……」
佢老婆唔係見到債台高築就走，相反地，係阿恆睇唔到有曙光，主動提出要離婚。因為賭波而欠落好多錢，連浪澄灣層樓都供唔掂，結果畀銀行收咗，當時佢就算唔食，每個月都要找幾萬蚊嘅數，部分財務公司嘅分期更長達幾年。
阿恆：「欠緊債仲一直賭，只因為冇辦法，情況等如收入得10蚊，但每月還債同支出加加埋埋要13蚊，仲差3蚊點算好？周圍再借又唔係，慳又慳到最盡，所以就會拎手上嗰10蚊再搏一搏，希望贏多3蚊返嚟，結果又輸，手上嗰10蚊得返6蚊，又欠多咗，呢個應該係天下間所有賭仔嘅惡性循環。」
欠債高峰期，阿恆爭緊幾間「黑財」，即係嗰啲二線財仔，未去到大耳窿級數，係嗰種合約寫住借8000畀你，其實你只可以拎走4000，但一樣要分8期還，每期千幾，意思係你依然還緊一個8000蚊加利息嘅數。
係咪以為呢啲「黑財」食水好深？其實你成日見到嗰啲大名氣又日日賣廣告嘅財務公司，食水先至係最深，搵明星宣傳，或者模擬人物角色去包裝，一切只不過係糖衣陷阱，如果你細心去睇條款同埋計算方法，佢哋絕對狼死過「黑財」，阿恆當年嘅二線財仔數一早還晒，大型財務公司先至係無底深潭。
佢哋用明星、KOL、靚仔靚女拍廣告，美化借錢呢件事，個個主角都借得好開心，真係好想作嘔，其實背後咪一樣搵爛仔追數，仲會打畀你嘅咨詢人作出滋擾。當年阿恆有期數遲咗一日先入，某大財務公司即刻打去佢老婆office，咁啱佢老婆行開咗，追收部條友亦好精，唔會透露銀碼同細節，只會講一句：「XX打嚟㗎，你叫佢盡快覆電話吖。」聽語氣你已經知係追數，再開埋財務公司名，目的就係想你公司同事知，等你有壓力唔敢再拖，呢件事亦係阿恆妻離子散嘅導火線。
牛唔飲水唔撳得牛頭低，最大問題始終係阿恆賭波欠債搞到借錢，又唔準時入數，佢自己先至係最抵死，欠債還錢天經地義，不過大家唔好睇完廣告就覺得財務公司真心當你係兄弟。
如果我要做財務公司嘅植入式廣告，應該每個月都會有生意，早排仲有一間標榜冇分行，近年用勁爆身材女藝人做生招牌嘅財仔，跳過廣告公司agency，搵咗中間人接觸我，表示出post嘅收費就算貴啲都冇問題，因為佢哋宣傳方面嘅錢「水浸」。
咁當然，我個page唔賣財仔廣告啫，佢哋嘅宣傳一樣可以鋪天蓋地，大波女明星賣廣告都冇畀人鬧㗎，個個仲讚好睇，不過呢啲係人哋嘅事，幫財仔寫植入等佢哋去吸人血，我真係做唔出。
後來阿恆打幾份工，唔止清晒啲債，而家仲有檔小生意，但因為佢本身好鍾意足球，所以有時間坐低睇波嘅時候，間中會買20蚊助慶，當係睇得投入啲，外圍冇再掂，亦都冇再借財仔。阿恆發過毒誓，再賭波就買乜輸乜，點估到呢啲詛咒原來邪到你唔信，佢次次買20蚊一樣買大開細，買細開大，不過呢條友仔覺得好開心：「咁先好，買20蚊睇波已經好刺激，唔明以前點解可以用5位數買一場波，其實賭錢同吸毒一樣，真係會害死人。」
既然生活同財政重回正軌，點解唔追返個老婆？佢老婆幾年前已經再婚喇，而家生活得好好。
阿恆呢個燈神係真人真事，希望大家引以為鑑，千祈唔好賭錢，亦唔好亂借錢，財務公司唔會當你係兄弟，佢哋只會摧毀你嘅人生。（完）
＝＝＝＝＝
💡 其實之前都介紹過一個股壇燈神
《公司有個美股燈神 買相反足以致富》
https://hkofficedaily.com/?p=15346