一個本來平靜嘅office，喺毫無先兆下突然激起千重浪，事情雖然發生咗一段時間，但直至而家仍然係公司裡面茶餘飯後嘅話題，因為影響到嘅人實在太多喇。
有位男同事某日食完lunch就請咗半日假，本來冇乜人為意，點知當日下午，佢嘅facebook無啦啦出咗個post，內容係話自己同公司一位女同事搞婚外情，好對唔住老婆，要公開向身邊嘅人道歉，仲話自己抵撚死之類嘅說話。
失驚無神公開自己出軌仲要喺facebook道歉已經夠晒奇怪，最癲係嗰個post直接tag埋同自己有路嘅女同事，公司裡面好快已經有人睇到個post，唔使10分鐘更加傳遍整個office，唔少同事都圍埋傾。
唔知邊個走去話畀老細聽，老細衝出嚟搵嗰位男同事，跟住先知個男仔請咗半日假，唯有轉而搵佢上司，我睇住老細好嬲咁責問：「搞咩呀？痴撚咗線呀？」
老細真係講個「撚」字，我第一次聽到佢喺咁多同事面前講粗口。
個上司把聲都震埋：「我啱啱先知咋，打畀佢又冇人聽，我再打多幾次。」
老細：「快啲叫佢delete個post呀！搵呢啲嘢嚟玩！」
呢個時候我細心睇一睇，係喎，地球post嚟嘅，原來唔使同佢係friend都會睇到，雖然呢對出軌男女唔係咩明星或者公眾人物，但facebook嗰度有標註自己做緊邊間公司（我哋算係大brand），有心人要起底絕對唔難，何況呢個年代連素人都會被起底，又唔怪得老細咁緊張。
交代下先，自認出軌嗰位男同事同埋被tag嗰位女同事，其實各自已婚，換言之一個係有婦之夫，一個係有夫之婦，而出post事件發生嘅時候，嗰位女同事仲身處office，個個望住佢又唔敢行埋去，真係超級尷尬，冇幾耐佢亦畀老細叫咗入房，出返嚟就執袋走話請半日假。
全office梗係未停過議論紛紛啦，然後第二日返工已經唔見咗呢對男女，聽講佢哋一齊resign，仲係賠錢即走嗰隻，至於係自願辭職抑或被炒魷就冇人知喇。
聽返同佢哋比較熟嘅同事講，嗰個post係男同事個老婆迫佢出嘅，好似話唔出就會有更嚴重後果，我哋估計係有更多證據，唔出post就擺上連登，又或者會衝上嚟大鬧office啩，因為咁樣出Facebook再tag個女同事已經夠晒嚴重啦，如果唔係男同事個老婆手上有更震撼嘅資料，照計都唔會行到呢一步。
直到而家仲有人講緊，除咗八卦之外，最重要係因為佢兩個走得太急喇，急到要其他同事幫忙執手尾，櫃桶鎖匙冇交低、啲password冇人知、好多文件又搵唔到、枱面啲嘢全部冇執，個男同事因為係sales，公司出咗部電話畀佢到而家都未還返嚟，所以咪搞到其他人嘈喧巴閉囉，職場係咁㗎啦，食花生冇問題，要同你執屎就肯定唔高興㗎喇。
投稿讀者：連美斯
今日有另一篇短投稿喺IG，內容同Facebook完全唔同，希望大家會follow埋辦公室日報嘅IG啦～～
https://www.instagram.com/p/CUKQm_-BThu/