我老公上年10月被公司裁員，當時接近年尾，佢努力咗幾個月都搵唔到工。
失業初期，老公的確好徬徨同埋沮喪，意志有啲消沉，見到佢咁樣我都好擔心，老公仲好認真計過數，如果繼續搵唔到工，銀行裡面嘅錢只係足夠用一年幾，因為我哋仲要供樓，之前公一份婆一份都係掹掹緊。
老公大我10年，而家44歲，佢send咗好多CV出去都冇回音，就算有得見，對方亦畀唔少說話佢聽，主要係嫌棄佢年紀，老公有次見完工返嚟同我講：「好耐冇interview，而家啲公司咁得意，叫得我上去應該係睇完CV覺得適合，點解面對面嗰陣又嫌我老呢？奇怪。」
我知佢好大壓力，亦好心急想有份新工，但又盡量抑壓心情，唔想喺屋企愁眉苦臉，其實佢好辛苦。
後來我老公利用失業嘅時間做咗好多嘢，佢親手整咗個鞋架、重新油過一面牆、換咗個新門鎖、整好咗廁所把抽氣扇、用玻璃膠痴返穩門口個地台、鑲咗幾格層架、清咗衣櫃裡面唔要嘅舊衫拎去回收……呢啲問題已經積存咗好多年，但我同老公一直以嚟都好忙，佢趁失業期間一次過搞掂晒。
我老公近幾年個肚經常會間竭性地感覺痛楚，但由於疫情之前佢係需要不斷出trip，真係好似俗語所講咁樣，得閒死唔得閒病，所以佢一直冇正視，就算係疫情期間，佢份工都係好忙，身體愈捱愈殘亦冇理會，趁住呢個空檔，佢走咗去睇醫生認真check一次。
檢查完，終於知道個原因係腎結石，原來好多年前佢買保險嗰陣送過body check，當時化驗所已經話佢有粒腎石，不過好細粒，唔建議佢做手術，因為任何手術都存在風險，咁細粒有機會自然排出，最穩陣做法當然係定時定候再去check啦！
由於工作太忙，老公根本冇定期check，結果粒腎石愈嚟愈大，所以近年偶爾會見佢痛得好犀利，仲以為食幾粒胃藥就冇事，今次醫生話再唔處理，遲啲有機會連小便都出現問題，最後老公就做咗個手術去擊碎同埋取出結石，順便好好休息調理身體。
因為裁員，老公之前覺得供保險都係一個負擔，佢曾經想cut，好在最終勒住，否則今次住院同埋手術費又要洗一筆。
其實失業唔係冇嘢可以做，以前唔想做嘅嘢，或者係冇時間做嘅嘢，都可以趁空檔做晒佢，而失業亦唔係世界末日，最緊要個人健康，人冇事先可以做冠軍吖嘛！
2021年嘅中秋節，我同老公食完飯就落街行公園，我哋冇小朋友，所以睇到其他細路仔喺度玩覺得好開心，咁普通嘅一件事，原來我哋兩公婆結婚後已經冇做過，足足八年喇，我記得有幾年中秋節老公直情係出咗trip，而家老夫老妻先走去行公園睇月光，真係別有一番滋味。
老公最近經朋友介紹接咗啲freelance job，希望一路做一路搵正職，老公問我介唔介意佢嘅收入少咗，我真係唔介意，天無絕人之路，相信佢好快會搵到工，最緊要係兩個人開開心心，健健康康，咁就於願足矣。
投稿讀者：肥師奶