發現男朋友出軌

拍拖以嚟成日見到世伯打畀我男友,一直覺得佢兩父子感情好好,幾個月後我哋同居,佢老豆依然晚晚打嚟,後來同佢家人熟咗,有次飲茶趁男友行開,我迅速同世伯伯母交換電話,聲稱第日阿朗(男友個名)有咩事,我可以第一時間搵到佢哋,父母聽到呢句通常會好放心。

同居後,世伯依然每晚打嚟,男友有時會入房聽,有時話唔聽住,真係當我咁蠢?

有一晚男友電話如常地響,caller display又係寫住Dad,佢匆匆入房閂埋門聽,出返嚟之後我問:「你同邊個傾電話?」

佢答:「老豆打嚟之嘛!」

我:「但我而家同你老豆傾緊喎。」當時我真係打咗畀佢老豆,表面上問星期日飲唔飲茶,實際上當然係check男友係咪講大話。

冇得再抵賴,男友承認一直同個女同事一齊,仲話自己已經斬欖,係個女同事纏住佢……哦,嗰晚我執嘢搬走,係咁先啦!

將第三者個名改做Dad,好心咁嘅智商就唔好學人出軌啦!

#讀者DM投稿

error: