公司有個男同事勁難頂，佢應該以為自己可以冧爆全office嘅女，但其實暖男同情聖唔係人人都啱做㗎，太over就同變態冇分別㗎喇！
反正公司咁多女同事，就算佢睇到呢篇文都唔會知係邊個寫，我哋成班女亦希望佢明白自己好難頂，所以用返男同事個真名 —— 浩賢。
浩賢嘅外型係四眼，肥仔底，矮，唔算係樣衰，但絕對未稱得上討好。佢平時已經做埋啲「多嚿魚」嘅嘢，試過喺淘寶買咗十幾廿個髪夾返嚟，然後每位女同事派一個，借問聲邊個想要呀？先唔計佢喺淘寶買，個款都好肉酸囉好冇？難為啲女仔收到嘅時候仲要畀反應同講多謝，我真係覺得自己好有修養，鬼叫當時未過試用期，費事咁快得罪人，佢而家試下再做一次吖。
仲有，浩賢會喺夜晚十一二點msg女同事，其實好多女同事都有男朋友甚至有老公，有冇諗過咁夜send msg嚟講無謂嘢，會為人哋帶嚟不便㗎！同埋唔好再扮飲醉示愛啦！其實女同事之間會交流㗎，起碼有三四個女同事凌晨收過浩賢扮飲醉打嚟，開場白例牌係：「可唔可以做我女朋友？」
我明，扮醉搏亂吖嘛，衰咗就當斷片，真係唔好再漁翁撤網喇，揚晒㗎喇！班女仔私底下笑緊㗎！
有次浩賢喺毫無先兆之下，突然將件西裝褸被落個女同事身上，唔好話當事人O晒嘴，連附近啲男同事都睇到呆咗，做咩啫？人哋講咗一句冷氣好凍，唔代表需要你件西裝褸，同埋普通男女同事唔好有咩身體接觸啦！
久而久之，其實浩賢喺公司已經出晒名，本來只係內部嘅事，點估到佢同一招都用喺外人身上，對方仲要係我哋嘅客，個女仔第二日打嚟搵老細投訴呀！
聽返成件事，嗰個女性客人已經多次喺夜晚收到浩賢WhatsApp，全部唔係講公事，人哋最初都算㗎喇，當你係熱情啲冇乜侵略性，點知浩賢又用嗰招，凌晨接近一點打畀呢位女客人話自己飲醉，然後話好鍾意對方。
就算有好感都覺得你痴線啦，何況個女客人肯定對浩賢冇感覺，你做呢啲行為咪好Disgusting囉！結果老細捉咗浩賢入房照肺，仲要勞煩其他同事打去同個客say sorry兼保證唔會再發生，我喺度做都覺得好瘀呀！
之後浩賢明顯收斂咗，不過隔咗冇耐又故態復萌，因為公司新請咗個receptionist，二十幾歲靚靚女女，浩賢成日行出去埃住接待處撩人傾計，放過妹妹仔啦！人哋有個6尺嘅男朋友，我哋見過個男仔嚟接receptionist放工㗎喇！保守估計起碼高浩賢一個頭。
其實男同事都唔鍾意浩賢，唔係驚佢溝晒啲女，而係呢條友對男同事同埋對女同事係兩個樣，佢對仔係超級冷漠，唔講嘢，唔say hi唔講早晨，但對女就會笑晒口好親切，就算我係女仔，係畀佢親切對待嘅target audience，但我都好怕呢種雙面人，唔係人人都有條件飾演暖男，收收皮啦浩賢！
《我代表全公司女同事》
再Loop返呢段舊文真係眾望所歸🙈
《男同事騎呢溝女，柒出鴻圖道》
https://hkofficedaily.com/?p=16418