Day 1已經知唔對路㗎喇，入新公司門口同receptionist講：「Hello，我第一日返工。」對方嘅表情好驚訝，好似未見過人類咁，然後佢打內線搵同事了解，好快就有個女人行出嚟問：「邊個叫你返工？」
我：「HR囉！」
「我咪係HR囉！」
我：「但嗰日嚟interview唔係見你。」
「哦，你見Phoebe。」
我：「係呀，佢打畀我㗎！」
「Phoebe冇做喇喎。」
我：「咁…即係點呀？」
然後佢自言自語：「Phoebe隻衰妹，明知道自己要走都唔跟埋啲手尾。」
諗咗幾秒，佢又同我講：「你入嚟坐低先，我叫Rebecca。」
我：「麻煩晒，我叫Vanessa。」
都要跟佢入去㗎啦，唔係點呀？雖然你好似唔承認請咗我，但呢度本身有個空缺㗎嘛，又可以check返record啫，嗰個叫Phoebe嘅HR走咗冇follow up，唔會連我個position都消失埋啩，我嚟做Admin咋喎！
原來情況比我想像中複雜。
Rebecca入老細房傾咗半個鐘左右，我就一直戇居居坐喺個位玩手指，Office裡面嘅人比起當日嚟見工時少咗好多（雖然呢間公司坐滿都唔多人），但佢哋望我嘅眼神好奇怪，後來Rebecca出嚟畀張入職form我填，主要係填出糧戶口用邊間銀行同埋咩number，然後佢就同我講：「其實我哋公司畀人告緊，有機會做唔住，所以早兩個星期已經陸續有同事自動離職，Phoebe係其中一個，因為老細畀大家搵到工就可以early leave，Phoebe好快有著落走咗，太急冇通知你，我又唔知你今日返工，Sorry交接得唔好。」
我成個腦一片空白：「咁點解當時仲要請我？」
Rebecca：「你指一個月前？嗰陣公司嘅情況冇咁差，後來再收到律師信，成件事有啲複雜，頭先同老細傾完，冇提早通知你係我哋嘅責任，如果你唔介意，做得一日得一日啦，我都唔想公司執，希望過到呢關，想問下你係咪特登辭職轉工？」
我：「又唔係嘅，因為我都同Phoebe講過，之前間公司係裁員，佢唔係叫我哋即刻走，係提早一個月通知，可能同呢度情況有啲似，不過就唔係執笠，係close咗一個department。」
Rebecca：「哦，如果你特登辭工過嚟，我會更加內疚，點都好，做住先啦！」
我唔係想安慰呢位Rebecca，只不過唔想誇大件事，始終真係畀舊公司裁，唔係特登resign，加上除咗呢份工之外又冇其他offer，實際上冇咩損失嘅。
結果Admin嗰邊冇嘢畀我做，Rebecca留我喺人事部幫手搞下paperwork、影印、filing，目測好多同事已經冇做嘢，主力係傾計同埋睇求職網，三個字形容－－－末日feel！
Rebecca仲有另一個人事部同事其實對我幾好，有叫埋我食lunch，起碼唔會掉低個「末日新人」孤零零。從言談間得知，公司畀人告係因為一啲專利問題，如果要理解，你可以想像係Dyson出咗個冇扇葉嘅風扇，註冊咗專利，咁呢間公司又出咗個一樣嘅設計，結果就畀人告，個賠償額仲要好大，雖然唔係講緊Dyson，只係舉個例，不過處境係咁上下。
抄襲就一定唔啱，我唔知老細係咩人或者當中有冇內情，不過單單睇Rebecca同埋其他同事對我，其實就真係幾nice，好可惜返工第三日，公司終於要執喇，除咗兩個HR同事同埋兩個會計之外（佢哋要留低善後），其他人都要收信即走，據我所知代通知金同埋賠償都令佢哋滿意，不過又關我咩事呢？我返得3日工，同埋新公司返咗3日就執笠係咩玩法呢？
有個細節位想講下，宣布執笠當日，個老細叫咗我入房，佢話我返得3日工，銀行轉帳未搞得切，出票都有啲無謂，所以問介唔介意當呢3日係返炒散出現金，正確嚟講係轉數，個老細話用私人payme就咁過錢畀我，除返本來月薪，我3日嘅人工係$1800，雖然知道咁樣好唔正統，但站於個人立場嚟講，你肯即pay梗係最好啦，一陣執笠執到徹徹底底咪仲難追，收咗先囉！
而家又要再搵工喇，上一份被裁，呢一份返3日就執笠，睇嚟2021年冇人黑得過我。
投稿：Vanessa V仔
肯即pay算係咁喇，有人想claim返$1075都要鬥智鬥力呀…… 🤦🏻♂️
《員工告小額錢債，老闆小學雞手法報復》
https://hkofficedaily.com/?p=12110