辦公室不嬲多戀事，但最經典肯定係嗰一次，2018年𠴱陣未有疫情仲有春茗，喺尖沙咀香格里拉搞嘅，公司傳統會請隊Live Band，氣氛本來已經唔錯，及後有個男同事無啦啦走上台唱歌，全場即時high爆，當晚目睹「事發經過」嘅人肯定永世難忘。
男同事叫David，化咗名㗎喇，佢喺冇先兆之下突然走上台唱歌，單刀直入話要獻畀自己嘅女神Doris聽（Doris都係化名），佢揀咗吳若希嘅《越難越愛》，無懼世事變改，還是越難越愛，為你所以在期待……真係好貼切。
食緊蟹鉗嘅我即刻丟低筷子，伏喺枱上面流眼淚，唔係感動到流眼淚，係笑到標眼淚，因為我坐得好近個舞台，無謂咁唔尊重人啦，咪索性伏喺枱遮住囉！女歌男唱冇問題，走晒音先係問題，當時老細正好過咗嚟我哋張枱同幾個男同事飲酒，第一次聽到老細講粗口：「佢做乜L嘢呀？」
老細平時坐房可能唔知咁多，不過圍內幾個女同事一早知道David瘋狂迷戀Doris，有必要交代兩件事先，第一，Doris係David嘅直屬上司，第二，當年David得27歲，而Doris已經40，先唔講職位，淨講年齡就有13年差距。
以40歲嚟講，Doris係保養得好好，但睇落都明顯大過David，當然啦，戀愛呢樣嘢又冇年齡限制嘅，關鍵只係Doris根本唔鍾意David，對於男下屬猛烈追求，佢係覺得好困擾同埋無奈。
有同事曾經質疑David嘅動機，例如會唔會想喺工作上得到便利，不過睇落真係唔似，因為David平時係不斷喺我哋面前讚Doris，話自己好想有一個成熟嘅女朋友，強調interview嘅時候已經覺得Doris好有女人味，仲透露以前同細過自己或者同年齡嘅女仔拍拖硬係格格不入。
對於男下屬喺日常工作時不斷示好，又人前人後公開話鍾意自己，Doris曾經向幾個相熟嘅女同事（包括我）講過好反感，因為我哋成日笑佢有後生仔追求，David個樣唔算醜，中規中矩啦，只係做嘅嘢騎呢啲囉！
Doris話最難頂係David每日都會私下WhatsApp佢，真係當正佢係女朋友咁，會問食咗dinner未？凍咗有冇著多件衫？落雨有冇帶遮？有時仲會打一大篇深情長文，而Doris總係已讀不回，或者隔日先回，更加拒絕過無數次David約去街嘅要求，亦都兜口兜面叫過David唔好再喺office hour以外send msg過嚟……係咪好癲？上司求個下屬放咗工唔好搵自己，簡直係違反大自然定律。
David每次畀Doris話完之後就會靜一靜，然後隔一排又故態復萌，咁你炒佢又唔係，講到尾David都係死纏爛打追女仔啫，並冇講或者做任何變態嘢，佢係越級挑戰追阿姐，並唔係超越底線講鹹嘢，條仔真心愛Doris㗎！
由於之前只係私下WhatsApp，所以除咗我哋幾個女同事之外，冇人知道David係愛得咁交關，啲人當佢平時讚Doris只係講笑或者擦鞋，直至春茗高唱「無懼世事變改，還是越難越愛」之後，呢件事就變咗全公司都知喇，因為David唱完仲喺台上公開示愛，問Doris可唔可以做佢女朋友，全場同事依嘩鬼叫不斷大嗌，老細就係嗰個moment爆咗句：「佢做乜L嘢呀？」
人人當笑片睇，Doris就尷尬到面都紅晒，講真我替佢感到難受，好似少女咁奔走匿埋又唔得，發嬲反面又唔係，結果就只能靜靜坐喺個位度硬食，再以雙手打個大交叉加個勉強嘅微笑，回應David喺台上嘅「愛的宣言」，不幸中之大幸係當晚負責做司儀嘅一男一女同事察覺唔對路，即刻衝去台中央打個圓場：「好多謝David提供個咁搞笑嘅即興表演，好喇，而家到抽獎時間。」
其實抽獎永遠係壓軸上演，嗰陣餐飯只係食咗一半，兩個司儀真係好識執生，我相信如果殺人係唔使填命，Doris應該會拎起把餐刀一嘢插落David心口，搞咩要令到件事變咗公司史上永恆嘅話題呀？呢單嘢肯定講十年八年。
故事最終峰迴路轉，公開示愛後嘅David逐漸變得進取，反正全公司都知，追都追得大方啲。除咗繼續私下WhatsApp女上司之外，佢仲連日堅持要等Doris放工一齊食飯，你估下最後邊個擺平件事？
聽返Doris講，某日David死要等佢放工，仲跟到落樓話想一齊搭車，突然有個男高層行埋去拍一拍David：「小朋友，夠喇，其實我同Doris拍緊拖，佢唔想你再咁樣，我都好唔舒服，到此為止喇好冇？你已經搞到Doris喺公司好尷尬。」
據了解，David當時係難以置信，不過冇再跟住Doris去車站，之後亦都收斂咗好多，而嗰位男高層之後就日日同Doris食lunch同放工，做到出面畀全個office知道係情侶。
男高層同Doris原來已經地下情咗3年，唔想多是非先至一直收收埋埋，但係春茗《越難越愛》世紀事件之後，Doris話佢男友（即係個男高層）好唔開心，雙方共識之下決定唔再愛得偷偷摸摸，上年佢兩個仲註冊結婚，礙於疫情冇擺酒，不過今年有派利是，咁咪好囉，有情人終成眷屬！
未完，David求愛不遂之後依然喺度做，依然under Doris，上星期放完年假開工，Doris同男高層仲一齊派利是畀David，佢已經完全死心㗎喇，算啦，世界上仲有好多姐姐，希望佢快啲搵到新目標啦！