男朋友隻貓救咗我一命

兩年前撮合過一對情侶,循例返轉頭follow up嘅時候,女方(Mandy)話兩個人相處得好好,唯一嘅障礙竟然係男方(Kelvin)屋企隻貓「波波」。

Mandy本身冇養寵物,佢對狗狗係ok嘅,但就特別怕貓,因為朋友屋企都有養貓,年中總會唔小心被爪到有傷痕,佢話:「貓仔唔係有惡意,不過佢哋就算開心興奮都會伸展貓爪,試過去朋友屋企被爪過,真係幾痛。」

Mandy同屋企人住,反而Kelvin自己住,呢兩年冇得去旅行,下下出街都會悶,故此想真真正正有二人世界,無可避免就要上Kelvin屋企。

「波波比起其他貓嚟講係好痴人,我哋兩個喺梳化睇電視,佢一定會跳上嚟坐喺我哋中間,好似死都要分開我同Kelvin,又成日將枱上面啲嘢推落地,有次將我支Apple Pencil推落地下搞到要換筆嘴。」

我:「隻隻貓都係咁㗎!」😂

「仲有一次返到佢屋企,地下無端端有撻嘔吐物,因為我冇養過貓所以唔知,唔小心踩咗落去,Kelvin話係吐毛。」

Mandy承認最初唔識得點同隻貓相處,仲話夜晚留喺Kelvin度瞓先至最煩,因為波波會跳埋上床,直接瞓喺佢個頭隔籬,用個屁股對住佢。

我:「隻貓應該係鍾意你先會咁做喎!」

「Kelvin都係咁講,不過有時朝早起身一擘大眼,成個貓pat pat對住自己,我都要時間適應。」

我:「波波好得意,搞到我都想同佢玩。」

「你知唔知我每次同Kelvin上床準備瞓覺,波波都會勁煩,因為我哋一進入被竇,手手腳腳一郁,波波就追住被竇每個移動撲嚟撲去,搞勁耐都未瞓到。」

我:「咁你哋咪唔可以做其他床上運動囉!」

「佢會喺一邊睇住囉,黑暗中一路做,一路見到波波發光嘅雙眼,呢啲究竟係乜嘢體驗。」

仲以為Mandy會一直視波波為佢同Kelvin之間最大障礙,點知一次經歷改變咗Mandy同波波嘅關係。

「嗰日我瞓喺梳化,波波一嘢跳上我個胸度,重量加上啲爪,我痛到彈起,然後接連兩三日都仲係痛,結果要去睇醫生,當時真係有啲嬲波波,點知醫生話畀貓爪或者踩唔應該會咁,提議做個檢查,一check之下先發現我有乳腺癌。」

我:「咁大件事?你而家點呀?」

「冇事喇,醫生話發現得早,腫瘤少過2厘米,冇擴散,總之而家冇事喇!係波波救咗我一命。」

人冇事就好!而家Mandy比起Kelvin更加錫波波,只要佢一上去男朋友屋企,波波就會唔要主人,係咁痴住Mandy,人貓相處融洽,調返轉係Kelvin呷醋。

將呢件事同同事分享,佢哋個個都話隻貓冇白養,仲話波波應該係喵星球嘅醫生,原來外國曾經有新聞,話有隻貓係咁聞個女主人大髀粒黑色痣,仲好幾次咬落去,最後個女主人去醫院檢查先意外發現係黑色素瘤。

點都好啦,聽到Mandy同Kelvin感情咁穩定,又同隻貓相處得咁愉快,我真係替佢哋開心,順便同大家講一句:情人節快樂!

error: